Sunday, January 31, 2010

Should Not Drink And Swim


AITARACHEO KATKUTLEO


Should Not Drink And Swim




Gõyant choddan chodd doryan buddon morpachem kharan mhollear soreachea nadar mosteaponnam ani jiv raknni korpeanchea (lifeguards) xiddkavnechi bheporva korun uchamboll doryan nhanvunk vo pevonk vochop Ani uprant…???



Adim konnu-i eklo monis doryant buddon melear tednanchea lokachi ‘curiosidade’ (curiosity) astali ani konn, koso, kednam melolo tem, hi choukoxi korunk ek suman tori lokacheo khobro ganvchea tintear ani sorea pompar netan choltaleo. Jiv dilo vo marun udkant udoilo zalear osle ghozalik zonn eklo apleak dista te toren uloitalo ani chukun buddon somplo zalear lok boroch churchurtalo. Saxttichea Navelim-Sirlim ganvant buddtelea dogam lhan bhurgeank salvar korunk tollent udki marleli tedna, Fr. Savio-n aplo jiv lukxonn korun ghetlolo to ugddas, az meren lokachea monantlo natak zalo nam.



Punn atam buddon mornam zatat tancho hixeob nam vo dusre bhaxen adle lokak kollvolle (sympathy) aslole tem atam disonant ani odik korun Gõycho bhailo monis zalear sorea vo vikallim vogddam nadar jiv ogddavok ek chalti vost zalelea porim polletat. Pavsallea khallant dorya ekdom uchamboll asta ani doryant pevunk vochpachem koddok bondi astanam Gõychea funkea sovai sorea noxer, jiv raknni korpeachi xiddkavnni kanar ghenastanam doryacho sumar naslele voile kumar doryan gustat ani lharanchea ‘under current’-ant tanchea noxibachem nokhetr palloulem mhonntoch, dorya dhegger aslole ixtt-mitr mathear hat dovorun villapun roddtat. Jiv raknni korpi mhunn kitem kortele? Zata titlo aplo jiv riskar ghalun buddtoleank (noxib aslear) salvar kortat na tor dusrea disa ‘Kolva veller dog buddun mele’ Gõychea disaleancher vachunk mellta.



Pordexi bhovddekarank Gõycheo vello pixar kaddtat. Nitoll ani nillea rongachem Arbi somdirachem udok tankam bhuloita ani vellecher vikalim vogddam sompeaponnim mellteleant ti khavn doryan udki ghetat ani tancho vell boro naslear mornancheo ghantto vaztat. Zori Gõycho sorkar doryan buddon morpachim mornam unnim korpak zaite toreche upai gheta punn ‘udka ani ujea kodden khellum nezo’ hem doryant sorea noxar vochpi monis mat chintinam.



Ani atam Gõyant lottun yevchele bhonvddekaranchem mousam chalu aslolean odikui-i mornanchi khobor Gõychea disaleancher vachunk mellteli. Ani fuddarak toxem nam zaunchea khatir Gõycho sorkar sogle upai gheta ani doryant nanvunk vetelea lokak surokxit rakchea khatir Drishti Group of Company-n, ek British ostorek Kerry Blewett lifeguard koxi vavurpak bhorti kelea ani hangasorle lifeguards asat tankam proxikxonn (training) diteli mhunn kolit kelam.



“Arre fon vazta. Fonank thekun boslolo asa tum. Konnacho to pollevpak tuje hat zhodd zaleat?” Vaztolea fonaxim vetana Lapittache bailen mhonnlem ani ti receiver hatant gheunchea velar fon bond zalo. “Itlo paper-ant bhitor gusla to, aichea paper-an kosli motti khobor chhapun haddlea?”



“Doryan buddtoleank salvar korunk Englanda thavn ek English jiv rakpin bail mon’xeak Gõyam haddlea.”



“Kiteak? Montreachea poranchi novi xikari zaunk?”



“Aghe, ti 22 vorsanchi ostori.”



“Tor kitem zalem? Vikallim vongddam ghetoch bholatkar korpi piray pollenant. Dekhunuch Scarlet oslea lhan poracher bholatkar zaun tacher moron ailem. German avoychea 14 vorsanche dhuvecher bholatkar zalo. Ani atam British ostori jiv rakpin ailea ti vigans ghevn nhi mure?”



“Oh baye! Keddo vhoddlo dubhau ghe tugelo? Mhojem sarkem aik. Sumar don vorsam adim Gõychea Poriotton Khatean (Goa Tourism Department) Gõychea bail mon’xank ‘lifeguards’ koxim bhorti korchea khatir Gõychea disaleancher jaharit ghatleli.”



“Ohh! Oxem? Anik tourist attraction korpak? Ghantt vattantle ravpi dexi bhovnddkarncho buddon morpacho ankddo vaddovpak? Bharotachea dusrea Rajean sobit vello asat. Thoim choddchim buddon mornam kiteak zainant”



“Sompeponnim wine, women, drugs Gõyant sovai melltat dekhun Gõyant tourism fullovpak Gõyche Montreamni amchem bhangara sarkelem Gõy infernant velam. Ani jednam tanchinch bhurgim produarponn, bholatkar, vikallim vongdam bhangodent sampoddtat tednam tech zaun bhurgeanchear poddleli lojechi ghantt (knot) sodoll korunk fottingponnache humbre choltat.”



“Ani sot asa tem tanchea tonddar marlem mhonntoch sotak zuzpeachim bottam katortat. Punn ek sang re! Itlem amche Gõyant chol’lam astana Gõykar ajun ogich kiteak?”



“Khoinchea bhivkurea Gõykarak zai tangelo katorlolo?”



Lino B. Dourado

http://groups.yahoo.com/group/gulf-goans/message/22174

No comments: