Aikuchem Punn Monantlench Korchem

GULF-GOANS e-NEWSLETTER (since 1994)
www.yahoogroups.com/group/gulf-goans/ www.goa-world.com

PRESENTS

Aitaracheo Katkutleo
Lapitt



Aikuchem Punn Monantlench Korchem

Pedro Anton mhozo gott ixtt. Khoinchai mosnant to futtbol khellunk veta tedna, tannem mhaka aple saikolir bosoun vorcho aslo. Futtbol khellunk ekdom huxear aslolo. Khell’lole pavtti tannem zoitacho gol marchoch. Teg-chog khellkoddeank bol ghoddoun kainch nhoi korun golant toptalo. Tachi huxarki pollevn MPT, Sesa Goa, Vasku Klub, Goa-Shipyard hea vhodd klubanche coach tache ghorache humbre zoroitale.

“Age timai, ho timaim, Pedro Anton khoim asa ghe?”

Tedna hanv tera vorsancho. Futtbol khell mhonllear piso. Ani mhagelo ixtt Pedro Anton je disa khellta tea disa mhojea potan jevonn porian cholonaslem. Tea Aitarak, Banavlle Dhande moidanar to final khellcho aslo. Tea tempar (1960 doskean) Rajendra Prasad Moddganv, Ponnje Campal, MPT Vasku, Mazodd’de Musson, Colva, Verna, Nuvem ani yer nanvoste grounddar khellop mhonnchem, ek protistha (prestige) asli. Futtbol khellgoddeak man ani respest ditale. Ani oslea vhodd nanvoste moidanar mhozo ixtt Pedro Anton khellchea adlea disa, mhaka futtbol khellak vorchea khatir sodanch mhojea avoichi porvongi ghetalo. Punn tea Son’vara sanjer nhi mhunn Aitara sokallim amgher to yevnk nam. Mhojer tor akhant. Dekhunuch hanv tachea ghora ghel’lom.

”Kiteak? Aiz final asa kitem?” Pedro Antoniche avoyn mhaka ulott vichar kelo.

“Age na ghe! Tea khatir nhi. Kal meren to mhaka mellunk na.”

”Tunch tacho ixtt? Anink nant taka?”

Goddie asot, hanvem mhakach zap dili ani hanv ghora porttolom. Donparchim don vazlolim. Jevonn pottant vocho nam zalem. To mhaka vorunk yenam zalear aichi koddegant final chuktali. Mhoji saikol ponchar zalear tin sumanam odik zalolim. Saikol ghevn hanga-thoim heddta mhunn ti duruxtt korpak mhoji avoy koxich toyar nasli. Bejarlole poristhitir bed-ir ghuttli marli. Futtbol khellachea huskean nidhecho dollo kosoch lagim yenaslo. Donparchea sumar 3.15 vorar Pedro Anton saikolichi kapin vazit darant ubo zalo.

“Hey! Lin-Baptist. Ajun nhessunk na re?”

“Punn tunvem…?”

”Chol-chol. Time nam. Vatter sangtam”

Beg-begim nhessun ani mhojea avoychi porvongi ghenv tache saikolir bostana tannem mhojea hatant ek chitt divn vachpak agro kelo.
Mogall Pat

“Pat? Hi konnachi chitt re?”, mhozo vichar

“Arre tem mhaka mottvea nanvan Pat mhunnon ulo marta”, tachi zap

“Konn tem?”

”Chitt fuddem vachtoch kolltolem tuka”

Khub dukhin thoddeach utramni hi mhoji nimnni chitt tuka hanv boroitam. Konnem tori amchea guptea mogachi khobor mhojea ghorcheanchea kanar ghatli. Mhozo avoy-bapui eksarkim ragan fulleant ani amkam doxim korpak tancho vavr netan cholta. Mhonnchem, mhaka bouch pois boarding-an dhaddtat. Tannim mhaka ghorantuch koidi kelam ani tujea mogache ubav uktthaitam tedna tim mhaka khub tras ditat.

Mhozo daddy, tuzo ek vhodd futtbol-fan, punn amchea ghorchea moidanar tujea osle zatiche mon’xank khellche nhi mhunn tacho virudh amchea mogacher. Zat-khati mhonntat ti hanv nokom. Fokot ekuch monisponnache zatik hanv ollkotam. Atam bore bhaxen vach. Tum khellta tea ttimicher mhozo daddy sodanch poz (bet) marta. Panch hozar rupiam sokoll to keddnach poz marina. (Vachpeank ugddas kortam. 1960 doskean 5 hozar rupia khubuch chodd) Oxem khorun to khubuch duddu jikhla. Ani aiz, tumche ttimicher 25vis hozar rupianchem eka vhodd donddekara thaim apost marlam. Pat, upkar korun aiz tumche ttimink jikhoi naka. Mhojea bapaik haroun luksonant ghal. Tujea khanddar bondunk dovorun to khanv oddtta, mhonnchem duddu bhitor ghalta. Oslea mon’xank lisanv xikounk zai. Hanv sozmotam tum mhojem hem kam’ kortolo vo aikotolo mhunn.
Sodanch tujea bogleak ravunk sodtolem, Pamela.

Vhodda gonngonnean foggoteo ani vozneachea avazan final suru zalem. Bannavle Dhande moidan lokache ghordden ot’talem. Donuim vattani khell sullsullit zatalo. Futtbol khellpollenar borech umedir ani urber xeboi martale punn hanv ekloch vorixtt chintnachea khonddant buskelolom. Pedro Antonichi ixttin Pamela konn? Kitlo temp zalo mogan asat? Tem khoinchea ganvchem? Hanv guttacho ixtt astona, tannem mhaka tancho mog kiteak lipoun dovorlo? Khorench to aplea girlfriend-achem aikotolo? Aiz to aple ttimik har ditolo? Hem chintint astona Pedro Antonink ek ugto mell’lolo boreantlo boro bol, goal bar-achea voilean xevttilo tedna konnem tori don-char mottean gali-fosti ghatleo.

Mathear odik chintnanchi ras. Khellacheo 30 mintam somplolim. Moidanachea mhodekat thanv virudhi ttimichea eka khellgoddean voir bol pas kel’lo to tanchea dusrea khellgoddeak mell’lolo bol Pedro Antonink ani her dogank fottoun uboch ek bal koso zumzumit shutt marun zoitacho gol golant toplo. Tea vellar konn tori pirgovpak laglo. Pedro Antonink grounddavelo voir kaddcho mhunn. Tacho khell khub dhil zatalo ani mhaka somzunk zatalem to khorench aple girlfriend-ak khuxi korunk, ttimink har ditolo.

Khellacho dusro somoi suru zalo. Pedro Antonio matso netar ailo koso distalo. Tache ttimir poddlolo gol badobad korunk to don-tin pavtti boroch korchelo. Punn virudhi ttim ekdom gott asli ani defensive khell khelltali. Khellacheo fokot nimnneo panch minutam aslim. Pedro Antonichea ttimichea goalkeeper-an marlolo bol justuch tachea payank mell’lo ani tannem vell piddear korinastona chougank ket korun somptoch golan bol toplo ani khellacho nikall 1-1 tharlo. Khell sompunk don minutam aslim.

Khoincheanuch tannem virudhi khellgoddea koddsun bol aplea tabeant ghetlo ani dogank bol ghoddoun tannem ugtea zagear aslolea Caitan Pelek (to katin kalo aslo mhunn taka Pele mhonntale) pas kelo ani tannem vell piddear korinastana zoitacho gol marlo.
Inamam vanttni zali ani tournamentacho boro khellgoddi mhunn Pedro Antonink inam’ favo zalem. Tannem mhaka saikolir bosoilo. Tachi ttim jikhli mhunn mhoji khuxeallkai taka ugti korchea vellaruch tannem eka Rajdoot motorsaikolicher boslolea monxa fuddean vochun kraaaanch korun saikolicho brek marlo ani bosantli chitt kaddun sottasot uloilo.

“Mhaka zai zalear 25vis hozar rupianchem luksann tuka korunk zatalem. Hanv mhoje ttimink khelltalom. Aiz meren hanv, mhozo futtbol khell zababdaren khell’lam ani khelltolom. Futtbol khelop mhozo ek dhorm. Dhongi monxa porim zaumnaka. Mhoje zat-khatiche voir ulounchea adim mhojea khanddar bonddunk dovorun xikar korchi tuka sonvoim zalea, tem mat ollkottponn pois kor. Kan ugte korun aik. Futtbol moidonar hanv ajun haronk nam ani poilea ani ekuch mogachea moidanar har khanvcho nam mhunn tuka avhan (challenge) ditam. Ghe hi chitt tuje dhuvechi. Vachun niyall kor”

Voili ghoddnni ghoddlear don sumanam zal’lim. To dis Son’var aslo. Sanjecher 4.30 vaztam amchea ganvchea inter-ward futtbol tournamentan hanv khellcho aslom. Bhair vagnant prektis kortalom. Pedro Anton apli saikol ghevn mhojea fuddean ubo zalo. He pavtti to eklo naslo. Tachea saikolichea dhandear ek sundor choli bosloli. Tannem mhaka vollok korun dili. Ti choli Pamela aslem. Pamelachea ghorcheamni apli chuk mandun ghetli. Tea disa to Colva moidanar khellcho aslo. Saikolichea dhandear bospacho zago Pamelan ghetlo. Ani saikolichim pedalam marit saikoll vochot vochot…..


Lino B. Dourado

________________________________________







17-07-2010

DUKHOINASTONA KANTTO KADDCHO

GULF-GOANS e-NEWSLETTER (since 1994)
http://www.yahoogroups.com/group/gulf-goans/
http://www.goa-world.com

PRESENTS

AITARACHEO KATKUTLEO
Lapitt

DUKHOINASTONA KANTTO KADDCHO

Ponnjeche dixen spidin vetole Honda Civic motorin okosmat break marlo, ani reverse-an yevn Ribandar bos stendar bosik ubo ravtolea fuddean thambli. Motoricho arso dhenvoun bos stendar ekloch ubo asloleachea nanv ghevn, motor cholovpean ulo marlo.

Bosichi vatt pollevpi monis, apnnalem nanv aikun thotaklo ani tea vonn motor cholovpeak pollevn bhouch ojaplo. Kolejintlo ixtt to. Sumar char-panch vorsam uprant poilech khepek taka dekhtalo. Motorixim ailo. Motor cholovpi bhair sorun taka ghott veng marli. Motorvalean, bosik ubo ravpi ixttak, apnnale motorin bosoilo.

Motorvaleacho mobile vazlo. Tannem fonar nodor ghali ani mhonllem, “Bloody bas****”,
ani motoricho escalator dhamlo. Kolejin sangatat sarlolea disancheo yadi korit te dogui khobrancher gul’l zalole astona motorvaleacho mobile portean vazlo. Porot teach mon’xacho fon mhunn koll’lolean tachi tokli firli, Mottea talean avaz korunk sodi, punn susegadin mhonllem.

“Kitem zalem? Az mhozo ugddas kelo. You swine. Nam, nam. Tuka nhoi. Gaddie fuddeant dukor pasar zalo. Oi, oi. Hanv gaddi choloitam, dukra. Hea dukrank velluch nam rostear bhonvunk? Toxem kaim nam, uloit rav. Hanv hand free mobile set-ar asam. Mhaka ulovpak addkoll zaina boila. Ham! Kitem? Oi re! Chodduch gorvam rostear, speed-breaker koxim ubim zatat. Surokxit mhunn rostear gaddi cholounk zata reddea? Oi. Redde-boil khubuch zaleat dusreanchea rostear, sunnea. Sunni mhunn unni asat? You dirty dog. Motorichea ponddak poddpachem. Kitem? Gorjechem kam’ aslem? Hanv gaddi choloita nhi? Atam ulounk zaina. Pulis talanv ditole. Uprant uloitam rostada. Konn mhonnchem? Zon’voram!!!”

Denver ani Wency ekech kolejint xiktanachi ixttagott. Kolejin astona Denver ekdom thondd monis. Subeij ulovpi nhoi. Vicharta titlench sangpi, oso tacho sobhav aslo. Punn aiz? Je toren nigtoch fonar konna thaim uloila, to; toch Denver mhunn sotmandunk Wency-k bhouch kothinn zalem

“Denver, vichartam mhunn ragar zatolo?”, Ponnje pavtoch Café Bhosle-n bhaji-puri odor kortoch Wency-n mhonnlem.

“Chatt, chatt. Ragar ani tujer? Kednach nam. Khubuch tempan ami doddleat”

“Tum gaddi choloitana, gaddiechea fuddlean nhoi sunnem, nhoi-mhunn dukor, reddo, boil pasar zavnk nant. Tum uloila te toren, aikotolo monis somzolo astolo, khorench rostear tuka addkolli sampoddleat”

“Jea mon’xa thaim hanv uloilam to zaun asa mhojea timanagelea cheddeacho ghott ixtt. Amche ollkichea kuttumbantlea eka cheddvachi amizad tannem keli. Kazar zatam, zatam mhunn tannem tea cheddvacho faido kaddlo ani avoyponnacho bhes dilo. Fasak poddlolea babddea cheddvan somazache lojek poddche adinch, gupteam gorbpat (abortion) kelo. Ho ek kunn mhu? Dekhunuch, dolle foddun mhaka tachi tiddok yeta. Hoch boro chance taka hinsanvpacho (to abuse), mhunnonuch taka hanvem paddea utramni dula. Hi gozal sodd.

Tujem tem girlfriend nanv kitem tichem, tichem---ham! Fiona. Asa mhu borem?”
Denvaracho vichar Wency-k koddu laglo. Vicharlolea proxnachi zap dinastona tannem taka mhonllem. “Addle toren special cha piyepachi sonvoim ajun urlea. Oi?”

Denver sogllem somzolo. “Atanchim cheddvam, cheddeachem bolos kitlem pezad asa tem pollevn ixttagott zhoddtat. Eklo sokallchea vellar tor dusro sanjeche pasoyek vorunk tankam dog-dog boyfriend zai poddtat. Tem sodd. Tum atam khoim vochpi?”

“Eka ghorjechea kama khatir hanv Ponnje ailam. Hanga lagsoruch”

“Hanv Miramar vetam. Hem mhojem business card. Ixttagott porti zagoiyea. Fon korunk visornaka”

Wency-k, ek lhanxem punn, ekdom ghorjechem kam’ Hotel Fidalgo-n aslem. To hotela lagsor pavot ailolo. Itlean mobile vazlo. Pollelear adle girlfriend Fiona-cho. Tachea mostokak tiddok choddli. Fon korcho nhoi mhunn xembordam xiddkailolem astona bhi tem, khubuch favtti fon korun taka sotaitalem. Taka Denver-achea utranchi bas zali. Dukhonant tosle, punn chintpa sarkele thomble marun isultar korchili hich ek sondi gavlea ti piddear korchi nhoi, oxem taka monaposond dislem.

Tannem fon kanank lailo ani movall talean, “hello! Oi, oi. Hanv uloitam. Khoimsor asa kai mhunn vicharta? Infernant!!! Kitli gormi nhi gho yea kallea mazra. Aago toxem nhi. Tum kallem mhunn tujeo moskori korchea khatir mhunnonk nam. Ponnjechea rostear choltana mhojea samkara kallem mazor pasar zalem. Tuje katicho rong kallo zait, punn tuji xir samki sexy, you bloody chick. Oh no! Ek kombi motorichea pondink poddun rogtacho xinvor zala. Stupid! Konn mhonnchem? This lausy mad fool chikon. Tum khoim asa? Yea? Ham??? Tunvuim Ponnje asa kut’tre. Tuka mhonnonk nam gho yea!"

Rostear bhonvtolem kolug mhoje pattik laglam.
Khoim asa mhontlem tunvem? Kitem??????

Fokot dha metr mhojea pattlean? OH, ohhh!


Lino B. Dourado

(c) www.goa-world.com
Aitar, 23vi Mai 2010

DEV KONNANCHO? (Mottvi Khota)

DEV KONNANCHO?
(Mottvi Khota)


To ganvcho ek vhodd bhatkar. Hixeob korunk yena titlo tache thaim duddu. Tachean zai te toren vilaxi (luxurious) jivit jiyeunk zata. Punn ekdom sado monis. Vortea molacheo vo margeleo motor-gaddi tachean ghevn zatat, punn to adlich pornni Lambretta skuttor moddlear mekanika thaim vorun dadai-budoi korun portean rostear cholpa sarki korta. Dekhunuch taka ganvche bhurge imtto bhatkar mhonntat.

Tachem bhitorlem doyallponn fokot ganvche igorjechi seva korunk ail’le padri-bab zanno astat. Ghelea panch doskean, mhonnchem ponas vorsam sumarak ganvche somydayechi ani igorjichi seva korunk ailole padri tache ghott ixtt zatat. Ani hachem kharan mhonllear, to lip-choriam ganvche igorjek, iskolak, durbbolleank uzvea hatant dan dita tem dhavea hatak koloinastana dita. Hench tachem gupttim kelolem vhoddponn

Orxim choddso to dhormik khariavollin igorjent disona, punn konnui ganvcho somplo zaler kosloch bhed-bhav, lhan-vhodd, girest-durbholl ho veglozar dovorinastana somploleachea mornank chukoinastona hajir zata. Ani hakach lagun ganvche malgoddeank (senior citizens) tachem hem saddeponn vakantat. Punn ganvche tornnateank mat to ek imtto-chamtti bhatkar dista. Ganvchea klubak to keddnach ek domddi dinam, nhoi mhunn klubanchea vangddeank lagim ghena. Hachem kharan toch zanna asta.

Eke sanjer, pavsachea vaddoll-moddan ganvche dortorer thorthorlo haddlo. Rukh-zhaddam umtun rostear pattlayle. Igorjicche padrink ravpacho rabito ghorar (residential home) tekhun aslolo vhodd ambea zhadd koslun poddun ghorak sumar 10-12 lak rupianchem luksan zata. Devache vhodd upkar. Tea nixttur disache sanjer Padri Vigar ani adhari padri, Pilarche seminarint eka dhobajeak hajir zaunk ghel’le astat.

Ganvcho lok utthlo. Kristanv–Hindu ho veglozar pollenastana ghor-ghoramni bhovun dhengi magli, punn ekloi te ganvche bhatkaragher vochunk raji naslo. Tannem sodam porim lip-choriam Padri Vigaraxim yevn padrink ravpachem ghor portean bandchea khatir vhodd duddvanchi mozot keli. Tori astona, ektthailole duddu novem gor mandpak pavonasle. Konn tori eka igorjichea kharbarean ganvcho ek vhodd donddekarak (business man) fon marlo ani padrinchea ghorachi poristhiti uktaili. Ekach farak don suknnim marpak tannem ek bud’dh dili. Sorti vo lottery ghalun duddu ektthaicho. Ani tannench zaun poilo inam’ Hyundai gaddi ani her moladik inamam motor-saikol, laptop, TV adi, adi basailim. Punn dor ek sortir tachem ani tagelea dondeanchem nanv chhapun haddunk zai aslem. Ganvant, xezarchea ganvamni ani pordesant porian sorti vhodda promonant kopunk lagleo. Ganvche iskolant vochpi bhurgeanchea hatamni sorti divn ganvant kopovpak head-mistricho hukum. Bhurgim babddim teo sorti kopovpak aplea avoy-bapai thaim ditalim zalear, thoddim bhurgim sota apun kopoitalim.

Lhan toxim vhodd poram sorti ghevn tea bhatkaragher vochunk toyar naslim. To ekdom darun kallzacho ani imtto mhonn, tim zannam aslim. Ani chukun tachea darant pavlear to dengxe ani boball korit, danvdaun ditalo. Punn tea disa boltench ghoddlem. Chovtte klasik xikpi Sylvia tachea durgan pavlem ani bel vazoili. Bhatkaran dar ugoddlem ani Sylvian aplea tonddar amurko hanso haddun tachea hatant sorticho book dilo. Hatant kitem dilam tem pollenastamna bhatkarbab tea inosent hanso ditolea porak pollenvkuch urlo ani tachea dolleam samkara ek veglech torecho sobhav tea choliechea mukhamollar khelltolo dislo. Tichem gunest rup ani nitoll hanso eka anj-bodveachem disnem koxem zollkunk laglem. Tichem sobit rup pollevn bhatkar tothaklo ani taka dislem monisponnache rupan dev-dhutt khorench sonvsarant bhonvtat mhunn. Poilech khepek tannem thonddayen ani movalle utramni tea porak zap dili. Taka salantle kodelir bosoilem. Te khoinchea vaddeantlem ani avoy-bapaichem nanv vicharlem. Thondd piyepa borobor bhouch margeleo biskiti khavnk dileo. Tinnem dil’lea sortichea book-avelo sogleo sorti vikot ghetleo, ani por ghorantlem bhair sorun vetamna tachea hatant foren chokleti ghatleo. Thank you uncle munit ghelem. Bhatkarachea ghorant konnuch dusro monis naslo. Sokallchea adesa vaddeantli ek ostori ani daddlo monis randunk ani ghorachi sap-safai korunk yetalim. To kazar zaunk naslo.

To dis ailo. Sortichem abertur vo draw tea Aitarak dusrem Mis somplea uprant aslem. 25 lakh rupiancheo sorti kopun khobar zaleo mhunn Padri Vigaran sermavan, ganvchea lokak kolit korche korun adhar ani dhengi ditoleanche abar mandle. Ganvchea lhan bhurgeanchea hatantlean sortiche ankdde kaddche mhunn Padri Vigaran poilench sangun dovorlolem. Sortichem inamachem ek-ek korun abertur zatalem ani thoinche thoim topasnni korun inam’ konnank labla tem jahir kortale. Xevottak vhodd poilo inam’ Hyundai gaddiecher pali aili. Ani ho lucky number kaddpak Parish Councilachea odheoxan Sylvia-k apoun velem ani tinnem 230953 ankdo kaddlo ani thoddeach vellan poilo inam’ jikhpi bhatkar Sebastião-chem nanv mikacher sadoilem.

“Dev konnancho? Asloleankuch dita?”, sorticho poilo inam’ jiknarachem nanv aikun Menino challvolo.
“Dev girest asloleank girest korta”, sokoilea vaddeantlem Philun mhonnlem. Ani oxem toren poilo inam’ eka vhodd ganvchea dusmanank favlolea porim lok apleak zai te toren uloit ravlo.
Dusre disa sanjer bhatkar Sebastião, Padri Vigarak mellunk ailo ani sortik favloli motor-gaddi vikun te duddu igorjek dovorpak suchnna keli. Padri Vigaran Hyundai motorichi chavi tachea hatant divn mhonnlem.
“Polle Senhor Sebastião, Igorjichem moddlolem ghor porot ubem korpak zai aslolea duddvam vonn odhik duddu bhitor aila. Tujem lagim motor-gaddi nam mhunn Devan hi tuka bhett divnk nam.. To mon pormonnem dhon dita. One gets wealth according to one’s psyche. Tujean, osleo don-tin mottor-gaddi vikot ghevn tujea gireskayechi takott dakounk zatali punn tum pollki bodai dakhoina. Gupttem kel’lem dan Devak mandtta tea khatir tujea borea vavra khatir Devan dil’lo inam’ igorjek portean divn, Devak opman korinaka.”

Lino B. Dourado
(Utt'tordekar/Kuwait)
__._,_.___

KRISTAK POROT KHURSAR KHILLAYTAT

KRISTAK POROT KHURSAR KHILLAYTAT


Niallanchea somdirant jivitacho arso polletana
Motlobponnanchi karnni dolleam mukhar aili
Ontornskarnache tagdden mhellim kortubam zogkttana
Khursar; mon’xache patkani khillailoli murti dixli.

Dev To! Monisponnachea rupan sonvsarant ailo
Borem-vaitt jivitacho marg xikovnk laglo
Pangle-thontteank, kurdde-bhereank boro kortalo
Sandlele xelliancho To ek boro gonvli aslo.

Kallkhantlean uzvadda lagim vhorpi borea mon’xeak
Razacho Raza mhonnon mathear kanntteancho mukutt ghalo
Xanti ani peleache mogachi bori vatt dakoitoleak
Dogam choram modem ghalun khursar khillailo.

Hea ghozalik khup-khup vorsam bollandun ghelim
Punn amchi mhellim khortubam azun chalu asat
Khursar morunn amche mhull patkachi soddvon zali
Disache disa vaitt karnneamni Kristak porot khursar khillaitat.

Tuje bhavak ragache nodrean polleta tedna
Jezuche horddear zal’lo gavo porten ugtte zatat
Tuje peleak onitache foddant lotun uddoitana
Jezuchi povirt dolle rogtache dukhani bhortat.

Lino B. Dourado
(Utodd'dekar)
www.goa-world.com

2 April 2010

Gobra Budhvar

GOBRA BUDHVAR


Gorvan ani polki bodayen jivit sartat

Otornskorn mhelem dorun dan ditat

Bhavachi talli khali, jevonn sunneak ghaltat

Roddtolea xezareak bhuzvonn divnk fattim ravtat

Aichea mon’xanchim patkam sorgar bob martat



Bhorpur hixeob-bhair ekttaim kelea tor gireskay

Udar monan tannelachea jiber udok ghal

Dukhan buddtolea tujea borea peleak

Hat divn voir kaddchelo ho prachit kall

Vhetana ailo toso dhul zaun vetolo

Aichea disa kopolak lailoli xinz yad korta

Rochannar Bap soglleanchi patkam ekech tagdden zoktta



Lino B. Dourado

(Utodd'dekar)

www.goa-world.com


Budhvar, 17vi Febrerachi 2010

Konkani Kovita: HAPPY VALENTINE'S DAY

Happy Valentine’s Day



H anso lojist mukhamollar khelloun
A bolim fulam matheak mallun
P onti mogachea inglean pettoun
P ainzonnancho avaz jogak gazoun
Y eo sundore mogan nachu-ia

V attsure svater sanddum naka
A izchea disak visrum naka
L haram porot vorot tuka
E ksuro mhaka dovri naka
N achta nodi, gaitat sunknni
T uje yenneank molob hansta
I rvea rongache zhadda panamni
N idhlole buimek zagrut kelea
E klench tum tara mhojem
S avlli mhoji zavn ravchem

D is sorum rat vochum
A xelole kallzak khuxi korunk
Y eo sundore mogan nachu-ia


Lino B. Dourado
(Utodd’dekar)
www.goa-world.com

Konkani Kovita: MHOJEM VALENTINE

Mhojem Valentine


F ultolea moga fullak
E vkar divncheak
B hitorle kallzak
R ompeo fulleat
E k-ek pakllicher
R up tiche chitrailam

C hukli kay ti vatt?
H usko vhoddot veta
O rdo dis sompla
U gddas bhouch yeta
D havun yevnchem tinnem
A xelollem kalliz tikach ravtta

T ichea sangatak
A mrutacho sonvsar
R osroxit kortana
I ngle mogan zoloitam, ani
K horea mogak jivit ditam



Lino B. Dourado
(Utorda, Goa)
www.goa-world.com

Bhurgeam Thaim Uloitana Chotrai Dhorchi

Bhurgeam Thaim Uloitana Chotrai Dhorchi


Shrimati Margarita sokall fudench kombiancho guddo
ugto korta. Kitlech dis sorle tichem ek tolog (tantiam
diunk pavil’li lhan kombi) hanga thoim udna martali
ani borich koketali. Tea tolgak dhorlem ani tichea
bokant aplem kirantechem bott ghalun tantem addkolta
zalear pollevpak lagli. Hem choltana, tichea panch
vorsanche Fiona dhuven pollelem, ani aple avoi thaim
vicharlem tinnem toxem kiteak kelam kai mhonn.
Shrimati Margaritan dhuvek sanglem kombiechea pottan
‘baby chicken’ asa mhonn.

Tech sanjer Fionachi mavxi Magdalena pavun sorli. Ti
sathvea mhoineachea gorbestponnar (pregnant)
axill’li. Dhaktte poran mavxechem pott borech ubhar
asa tem pollelem ani tichea pottak hat bhonvdaun
mhonnlem.

“Aunty, tum borich jeulea kitem?”

“Tum oxem toren kiteak vicharta bai?” Aunty-n vichar kelo.

“Mhojo daddy jeulea uprant aplea vhodd pottar hat
bhonvdaita ani mhonnta, az boroch gostan jeulo”
Fiona-n mavxek zap dili.

“Tujea daddychem pot chorbien vaddlam. Mhojea pottan
tujea thaim khellunk tujem sobit ‘baby cousin’ asa”
Mavxen Fiona-ak umedin sanglem

“Tujea pottant ‘baby cousin’ asa mhonn mhoji mummy zanna?”

“Hoi bai”

“Mhojim grand-ma ani grand-papakui khobor asa?” Fionan
aple dolle pittpittaun vicharlem.

“Hoi bai. Tujo daddy passun zanna.”

Teach vellar Fiona-cho daddy kamank sakun salant
bhitor sorlo, ani ghov ailo mhonnon Shrimati
Margarita-i aili.

“Hoi? Mhojo daddy zanna?” Fiona-n aple bapaichea
dolleank pollevn portun vichar kelo.

“Na tor daddy thaim vichar.”

Fiona, bapaik sangunk laglem “ Daddy, sokallim
mummy-n eke kombieche bokant bott ghatlem ani tichea
pottant ‘baby chicken’ asa mhonn mhaka sanglam..
Daddy, mhaka ek sang. Aunty-chea pottant ‘baby cousin’
asa mhonn pollevpak tuven kedna bott ghatlem re?”

Sogot eka-mekachea tonddakuch polleunk urlim.



Dekhun hanv mhonntam: Bhurgeam thaim uloitana chotrai
dhorchi




Lino B. Dourado
www.goa-world.com

"Lokanchim Tonddam Bondh...!

"Lokanchim Tonddam Bondh...!




JAKIN: Hello, hai, Ritin? Kedna ailem Goem sakun?

RITIN: Poir sunkrarak.

JAKIN: Koxi geli tumchi sutt’ti (vacation)?

RITIN: Pavs, pavs, pavs. Hea pavtti Goeant bhorbur
pavs go. Khoimsoruch bhair vochunk sarkem mellunk na.
Amgelo boroch khuxeal. Orxim taji kornn’ni tum zannai.
Konnagher vochpachem nanv genam. Ghorakoden kaju feni
xekoi-xekoi. Tea bhobalan mhakai irloso ‘branco’
melltalo. Bhurgim sarkinch ubgelim go pavsak.

JAKIN: Sangtam mhonnon ragar zainakai ham? Pavsacho
koslo dox? Amchem Goem vauradanchem. Ami xetam roitat,
ani xetak pavsachi ekdom goroz asta. Boro pavs zhoddlo
mhonnchem bori xetachi pikavol zata.

RITIN: Tujem sarkem go. Hea vorsak xetam borim asat.
Xetkar khoxalkai dakhoitat mhonn hanvem Goeam astana
pottramcher vachlelem.

JAKIN: Zavn saiba. Kitem tori tum vachta.Tem bogum,
mhaka kitem haddlam Goeam thavn.

RITIN: Tuka haddunk na zalear uprant tujem tondd bondh
korunk zata go. Paro, miskut, kharem, rachadd masalo
ani khub haddlam. Tuje main, aple zanviank ghora
bhazlelo kaju bhieo dileat.

JAKIN: Itleo sogot vostu haddleo zalear mhojem tondd
bonduch zalem na? Tondd bondh mhollear boro ugddas
ailo. Fuddlea mhoineachea-Setembrachea 12ver-amchea
ganv bhavacho tiatr asa.

RITIN: Ago Jakin, Kuwaitan Konknni tiatr machier
haddttat titlech digdorspi tuje ganv bhav?

JAKIN: Tuka khobor asa hanv Saxttichem. Mhojo ganv
Calata. Sant Roquechea kopela lagsor, uzvea bhazun
nillea ronganchem ghor asa tem amchem.
Majorda-Utorda-Calata tin ganv, ponn amkam ekuch
Ponchayat. Chalu vorsachea survatekuch-Janerant-
United Club of Utorda, "Konkani Ek Anki Nattkuleanchi
Spordha" keli. Tea uprant Juneachea 13ver Bab Rafael
de
Majorda hannem “Tukai Tench Ravta” tiatr dakhoilo ani
atam Lokanchim Tonddam Bondh…..

RITIN: Kitem??? Zhorintlem udok vhaumtam tem bondh
zait. Nodhichea udkachim tonddam bondh korunk zait.
Mhojem tondd bondh konn kortolo go?

JAKIN: Modench tondd ghalun tiatran martat tosleo
‘dialogues’ uloinaka. Poilem purai aikun ge. Hanv,
tuka sangunk soddtam triatrachem nanv ‘Lokanchim
Tonddam Bondh’ mhonn ani tacho borovpi ani digdorspi
mhojo ani ek ganv bhav Utodd’decho Bab Laurente
Pereira.

RITIN: Oxem sang mu go. Mhaka dislem bhailanchim
tonddam bondh korpak anik konneklo fuddem sorlo mhonn.
Tiatrant khoimchea kolakar asat?

JAKIN: Mhojeo vostu vorunk ieta tedna tuka tiatrachem
‘hand bill’ ghevn ietam. Tacher polle Sangpachi gozal
mhollear Goeam thavn Young Chico-cho dhaktto cheddo,
Jr.Chico ieta. To aplea gitani tiatr pollenarank
montrmugdh (mesmerized) korta khoim.

RITIN: Goeam aikoleli tachi khobor. Amgelean pavsachem
nib ghevn Goeant astana ekui tiatrak mhaka vorunk na.
Tumi amgher ieta tedna, amgeleak matxe fuslai. Tujem
to aikota. Hea tiatrak vochunkuch mhaka zai. Tikett
kaddtana sangattak kaddcheo.

JAKIN: Hangasor hea dissanim nettan gozal mhollear
Kuwaitchea Trio king, Bab Cajetan-Marcus-Mario porot
ektthaim aileat ani te “Lokanchim Tonddam Bondh” hea
tiatran bhag ghetat.

RITIN: Kitem?? Kitem mhonnlem tuvem? Trio king CMM
porot ektthaim? Praise the Lord. Hanv sarkinch……..

JAKIN: Ago, ago itkem ‘excited’ zatai kiteak go?

RITIN: Tem anik vichartai? Tuka khobor asa amgeleachea
trio king sarkech ‘favourite’ Jea tiatrant tancho
aspav asta te tiatr to kednach soddina. Mhonntokoch
mhojem kam’ piklem. Tuje Upkar, hi mahiti tuvem mhaka
dili mhonn.

JAKIN: Ghelea vorsachea, 2002, Abrilache mhoineant
Rafael de Majorda hachea tiatrant “Hanv Noko Zalom”
trio king CMM nimnne sagattak disti poddlele. Ani atam
sumar dhedd vorsan porot sangatak machier ietat.

RITIN: Ponn ek go!! Itlo khall tannim ‘divorce’ dilolo
to kiteak? Ani lok uloitalo te pormonnem……………

JAKIN: Lok mhonntalo te porot keddnach ektaim machier
choddchenant nhoim? Atam kitem? Mhojem tondd soddun
“Lokanchim Tonddam Bondh…!” mu go?

RITIN: Jakin falleam ulovchim. Amgelo ailo go. Chavi
kaddtta.

JAKIN: Tuji?

RITIN: Mhoji nhoi go malsuada, darachi. Choll, choll.
Fon bondh kortam.


Lino B. Dourado
lino dourado
http://groups.yahoo.com/group/gulf-goans/message/3145

www.goa-world.com/goa/poems/
_____

http://www.geocities.com/lara_production/LTB.html
Remember it's LARA Production Entertainment
So be there - September 12th - Hawalli Hall, Kuwait
_____

www.goa-world.com
Goa's Pride where everything Goan!
Website created by Goans in Kuwait
_____

Gulf-Goans e-Newsletter www.goa-world.com
Get all the news and facts as it happens
www.yahoogroups.com/group/gulf-goans/
THE GOAN FORUM www.thegoanforum.com
www.yahoogroups.com/group/goa-goans/

Kaminn zalea? Kazar postpone !!

Kaminn zalea? Kazar postpone !!



RITA: ‘Just a minute’ mhonnllem ani fon ‘hold on’ dovorpak lailo
ani tum khoim pavlo re?

TITA: Sangpachem mhollear fon vaztalo tedna hanv
nanientlo udok navun bhair sorlolom.

RITA: Tor kitem zalem? Ulounk zai naslem? Mhaka
fonacher kiteak umkailem?

TITA: Mhaka loz disunk lagli.

RITA: Kitem? Loz? Ani kosli?

TITA: Hanv nanientlo bhair sortana mhojea kamrak
(bendak) tuvalo bandlolo aslo. Tuka fonar ‘hold on’
dovorlem ani hanvem, mhojea hangar khopdde choddoile.

RITA: Oooh! Bori loz dista tuka. Thoddeach disani tum
mhojo poti zatolo. Tuji ghorchim ghorant nant.
Kazarachem ‘shopping’ korun bazarant gheleant, tori
astana………

TITA: Mon’xak loz mhonnleli asa nhoim? Ostere thaim uloitana, ti mhorean vo pois asum, daddlea mon’xean sogli mansugi samballun ulounk zai.

RITA: Itko lojist tum? Kazar zalea uprant oxich
mansugi samball ham?

Tumchea salant tujea grandpapa-chem adlea kalachem vonotichem godial (wall-clock) asa nhoim?
TITA: Hoi.Daddy sodanch sangtalo tem godial grandpapa-n tarvar viajik astana poilea pogarak viktem ghetlolem khoim. Tem amkam ek iadostik (souvenir) ani ami tem ‘antique’ koxem dovorlam.


RITA: Tem gadial cholpak taka ek umkaltalo ‘pendulum’ asa. Ek-ek khin (second) tok-tok avaz korun to ‘pendulum’ ievtin-tievtin halta nhoi?

TITA: Hoi. Tujem sarkem asa.

RITA: Toxoch, tuvalachea pondik lipon aslolo ‘pendulum’ haltalo mhonn, fonar ulovpak loz distali?

TITA: Hanv tujem somzunk na.

RITA: Somzotolo koso? Thoddechem ‘common sense’ mhonnlelem bezean asunk zai nhoim? Hanven fon kiteak keloloi tem zanai ?

TITA: Sanglea viret koxem gomtelem ?


RITA: Tumkam sangpak amchem kazar fuddlea sumanan aslelem tem Otumbrachea nimn’nea satoleant dovorlam.

TITA: Kitem? Kazar postpone? Ani kiteak?

RITA: Nokoi tum tumchea Ponnjent kitem chol’lam tem? Kamnnichi pidda veta thoim posorlea.

TITA: Kitem zalem? Kamnniche piddek lagun amchem kazar ‘postpone’ kelear zata? Kitlem luksan?

RITA: Tum itlo voir sokoll kiteak? Tumkam koslem luksan? Tumi bhikaream baxen magleli titlich dot-dennem dilam, tea bhair kazaracho ordo khors bhagovpak nogod (cash) duddu dileat.

TITA: Polle kazar koxei toren fuddlea mhoineant vhorunk zaina.

RITA: Kiteak zaina? Somoz tuka kazara disanim kamin (jaundice) zali zalear?

TITA: Mhaka koxi zatli? Ami nitoll udok pietat ani jevonn jevtat.

RITA: Zanam hanv. Kaminnichi pidda Ponnjent suru zavnk karan kitem tem. Jitle pavtti tuka mellunk Ponnje ietalim titlech pavtti tuvem mhaka borexea restaurant-ant vhorchea svater amlet-pao vikpi lhan gaddiancher khanna ditalo, imtto koimcho.

TITA: Duddu asle mhonntokoch bextoch tacho dur upeog kounk zaina. “A” class restaurant-an vochun khanna khaun duddvancho ibadd korcho? Amkam fuddar asa. Ami fuddarachem chintunk zai.

RITA: Atam tum sarko zagear ailo. Haka mhonntat gineani monis. Tum Ponnje xharant astai, zhoim kamnnichi pidda suru zavn dusrea vattaran porsolea.
Tumkam nitoll udok mellona. Tujim khanna lhan gaddiancher zatat. Tuka kamin zalea asot hea bhirantin hanvenuch kazar pattim vhorpak tharav ghetla. Tum sangta tea pormonnem mon’xan fuddarachem chintunk zai. Sogllo nitt obeas khela ani hanvem mhojem chintlam.

TITA: Tuvem kitem chintlam itlo obeas korun?


RITA: Kamnnichi pidda laglolo ‘pendulum’ novi godial koxi choloitolo kai mhonn. Somzoloi?


- Lino B. Dourado
http://groups.yahoo.com/group/gulf-goans/message/3163

Saibinichi Ladain Chalu Astana.....!

Saibinichi Ladain Chalu Astana.....!




NATTY: Betty, vicharta mhonn ragar zainaka. Poir Setembrache 8ver, Saibiniche zolm disa, Kuwaitche Igorjent misak ail’lem tem, tujea mobile fonacho ‘advertise’ korunk?


BETTY: Ooh dear. Sorry man. Khorench mhaka ugddas na go. Amgeleak sotailea uprant tannem mhaka novo mobile viktto ghetla. Mhojea novea mobilacho ankdo (number) boroun dovor 9455---

NATTY: Hanvem, tujea mobile fonacho ‘number’ magpak fon korunk na. Fokt vicharpak, mobile fon ghevn Igorjechea kompoundant Saibinichi Ladain chalu astana, tuje nokre kosle choltaleat?


BETTY: Ago Natty, tum khoim aslem go? Hanvem tuka pollovnkuch na. Ham! Saibinicho ters zalea uprant Ladainik survat zali, tech vellar amgealean fon kelo ani vichari sunkttam (prawns) bhair kaddun dovorleant tanchem kitem korchem kai mhonn.


NATTY: Borem asa. Poilo fon vazlo, uprant tori tuvem
‘switch off’ korunk zai aslo nhoim?


BETTY: Ago, dusro fon rokhddoch vhoddlea cheddvan
kelo, ani mhaka kolit kelem mhojem ID kard ghorach
visorlim mhonn. Tea uprant dhakttea dhuven hukum
ghatlo, ghora iett’na Ceasar-antle ‘chicken puffs’ haddpak.


NATTY: Kitlo tokos ghevn Bab Albino ani tanche
sangateani Saibinichea grotto-chim manddavoll keleli.
Kai bori svaddik talleani ‘Latin’ bhasen ladain cholltali.
Xevottak Konknni bhasen gaien ghailem.. Tuvem tattunt
bhag ghevn ghaiche svater, tum mobile fonar boddboddtalem.
Him koslim tujim nattkam?
Thoddeanim Net-ar boroun vichar passun keleat
“Kuwaitche Igorjent Mobile Fon Kiteak Vaztat?”.
Padri Vigar tor sangun-sangun tokhllo, Igorjent bhitor
sortana mobile ‘switch off’ korcho mhonn.


BETTY: Igorjent mis choltana ‘mobile off’ aslo go,
uprant bhair ietokoch ‘on’ kelo.


NATTY: Kiteak? Je svater ami bhavartan magnni kortat
ti svat povitr asta mhonn tum noklloi? Igorjecho
‘compound’ tiatracho vosro dixtta tuka? Kristi somudai
bhavartan magnni kortat tedna tumchea sarkeanlo mobile
fone ‘disturb’ kiteak korop?


BETTY: Hanv tuka ekuch karanank lagun mandttam. Tum
soddanch tonddar uloitai. Dusre kepek toxem korchi na.
Amgeleacho oprad . Taka sanglelem misak vochunk zai.
Nimn’nea velar okosmat fon kela ani sanglem Kattyche
barrabor vochunk.

NATTY: Mis somplea uprant tum rostin chollun,
Saibiniche porbecho ‘regist’ ditalo to passun
genastana, ukoddlole chonne vanttaleat thoimsor tuji
lutt kiteak zali?


BETTY: Mhoje maim ghe! Ago barghea, hem tum soglem
khoim thavn poletalem?. Tum igorjek ieta tem Devak
magnni korpak vo lokak pollovpak?


NATTY: Ho tuvem boro prons kelo. Chonne ghevn tum
fuddem chollot gelem ani eka khambeak tekun ubem
ravlem. Tin tem chear metr (meters) tujea fattlean ami
ubim aslelim. Tuje soglle nokre thoimsor savn distale.
Sorbonvttim dusro lokui aslo, tovui polletalo. Kitleim
kelear, lokachim tonddam bondh korun zatat? Lok apleak
zai toren ulounk laglo.


BETTY: Hi chuk amgeleachi. Tannem mhaka nimn’nea velar
apunn misak pavona mhonn sanglem ani goddboddan hanv
bhair sorlim ani oxem…….


NATTY: Goddboddan bhair sorlelem tedna tuka khobor
asli tuvem tujea angar bhailen kopdde toxech bhitorlio
mustaki sarkeo ghatleleo mhonn?


BETTY: Ago malkireda, tuka koxem gomlem, goddboddan
visorli mhonn …


NATTY: Ixttinio ami, ponn amchem natem (relations)
bhoini sarkelelem. Tujeo vaitt, boreo sovoim (habits)
hanchi zanvi mhaka asa. Tum porot-porot kuleak hat
laitalem. Polle Betty, ami ostoreo, mhonntokoch amchi
nespam moriadik zavnk zai, nhoich Igorjent ponn
rasvoll suvatantr (public places) passun. Ghorantlim
bhair sortana kednach takhttin ani goddboddan bhair
sorchem nhoim. Tujech porim visortelim khub zanna
astelim. Ponn don-don pavtti ukoddlole chonne magpak
mat visrunknant.


BETTY: Ago chirputea, Spy Satelite mhonntat tem tum ?



LINO B. DOURADO

http://groups.yahoo.com/group/gulf-goans/message/3179
(c) 2003 All rights reserved
by www.goa-world.com


Everything Goan !

MOG mhataro zaina !

MOG mhataro zaina !



GRANDMA: Samkoch udas zavn kiteak boslai? Dhuve ani natichi iad aili? Nigtich vetat thuinch asat. Ge, gorom-gorom cha haddlea ani khavpak polio (rice-cakes) chun’nn ghalun bazleat.

GRANDPA: Dhuvechi iad kelea viret amchi ek khin mukhar sorona. Tem por'r kitem mhonn kortelem? Taka khuxi asli ani ek dis ravpak. Zavoim-cho ‘Import-Export’ dhondea
fuddem taka vell na, tori astana dedd mhoinean don disank kulara ieta tem.


GRANDMA: Putak vogddailo nhoim? Voddlem ghor-bhat, gireskai asunui tuvem taka London-ank dhaddlolo fuddlem xikop korcheak. Thoim tannem Inglish cheddva
thaim mogacho obeas, bhes boro kelo ani mogachem lisanv pass kelem. Sat vorsam zalim…..


GRANDPA: Vhoddlo put to. Taka tacho fuddar asa. To thoim dhadoxi asa titlench puro amkam. Dhor satoleak telefon kortach. Bhail-bhurgeank ghevn Goeam ietlo khoim.

GRANDMA: Kedna ietlo? Amchi haddam zattokoch? Hi soglli fott.

GRANDPA: Kedna tori ietlo nhoim? Tum itlem chintest zainaka. Bos mhoje mhorean. Ek poli di…..va-va… boreo gostacheo zaleat.


GRANDMA: Donparam vechea adim cheddvan bazun dhovorleleo
GRANDPA: Aiz, sokalcho nosto kelea uprant, Sophya natin mhaka ek gomoticho prons kelo. Tem vichari, hanvem tujo poilo mog kelolo vo tuvem mhoji poili ‘line’ marleli kai mhonn.

GRANDMA: Polelem aizche sonstik? TV poletat ani naka zalelem ulounk xiktat. Amchea tempar oxem cholltalem? Tuvem natik kitem mhonn zap dili?

GRANDPA: Hanvem porak sanglem, amkam mog korpak velluch mellunk na, ani zannai tannem kitem mhonnllem tem? Toxem tor, apli ‘mummy’ zolman aili koxi?

GRANDMA: Age mhoje Saibinni. Bombli pekunkna tachi, sekxachem ulounk xiklem.

GRANDPA: Tempa pormonnem mhateak kurponnem ek opar asa nhoim? Ponn ek Sophya-che grandma, natiche vicharan, aiz mhaka fattlea iadichea somdirant buskailo. Tuka kitem ek sangchem asa

GRANDMA: Aikopa sarkem asa tor sang nhoim?

GRANDPA: Mhorean ievn tekun bos. Zannai, amchem ghorchea jardinan veg-vegle torechim fulam zhaddam, tukach lagun vhomplelim mhonn? Tuje guttachi Dalhia

ixttinin mhaka sanglelem tuka fulamchem pixem aslem ani ozun asa.

GRANDMA: Amkam, sokoilea vaddeantlea lokak, tedna ekuch vatt asleli. Igorjek vhetelim zalear tumchea ghora samkara roste velean vhechem poddtalem. Tumi

disonant tedna hanv fulam chortalim.
GRANDPA: Ani tum ek dis oxench ful chortana tujea botak kantto topun rogtacho vall zalo. Bhoionkor mhaka dukhlem. Hanv bhitor ravun lipun polletalom to bhair dhanvun ailo ani tujea hatak dorlem.

GRANDMA: Rogtan vhaumtelem bott tujea tonddan ghevn, rogot chivun bhair uddoichea svater, tum, mhojem rogot tujea pottant giltalo.

GRANDPA: Tea vellar hanv sarkoch bizud (nervous) zalolom. Eke vatten poilech pavtti tujea hatak dhorlolem ani dusre vatten tujem bott mhojea tonddan. Tuvem koxem ani kedna lotlem, tem ozun meren iad iena

GRANDMA: Tum ailo ani chorachea hatak beddi ghaltat toxem mhojea hatak dorlem. Tedna mhaka, mhojea kallzak mogachi beddi ghatli vori dislem. Hea nirmoll vellar

mhoji bhavna (feelings) ugtim korpak, fokt mhojem vhaumtelem rogot, amrut mhonn somzun tujea tonddan bott lotlem.


GRANDPA: Uprant amcho mog zalo. Mog mhollear boro ugddas ailo. Dhuven vetana mhonnlelem, hea disanim xikareak gelo zalear ani ran dukor (wild boar) gavlo tor, apleak masacho dhaddpak visronaka mhonn.

GRANDMA: Aga grandpa, tum dadlo koslo ga? Khobro sangun-sangun platin asleleo sathui polio ekleanuch jiroileo mum ga.

GRANDPA: Age, tonddan lotpak tum huxear asa nhoim? Aiz tujo sobav dusrech torecho lagta. Hanv gozal sangtam ani tum ek-ek poli mhojea tonddan duhkholta. Tem

bogum. Bhitor vochun, xikareak vhorpachem don nallianchem bonduk (double barrel gun) khoimchea kon’xak poddlam tem polletam.

GRANDMA: Mogachea grandpa, don gullianchem bonduk vell ibaddinastana topas, borexem limpez kor ani bondukacho kaum (trigger) chollta toso toiar dovor.

Khub dis sopun gele. Goddie aiz ratik ranant veche badlak, xikar ghorantuch mellot.



Lino B. Dourado
http://groups.yahoo.com/group/gulf-goans/message/3202

http://www.goa-world.com/goa/poems/
http://www.goa-world.com/goa/poems/lino/

MARRY ANN, GET TEN FREE

MARRY ANN, GET TEN FREE



Kallchea Brestarak, Kuwait Igorjechea hall-ant, Holy Family Choir
hannim vorsavolicho ‘Parent’s Day’ manoilo.
Hea nimtan Bab Mario Fernandes hannem borovn-digdorxit kel’lem
nattkulem machier dakhoupant ailem.
Hem vinodhi nattok polloupak hall-ant lokachi vordoll (gordi) axill’li.
Ponn, hea kepek bhailanchea vorn dadleancho ankddo subeij laglolo.
Kiteak zannai?
Nattkuleachem nanvuch suchoitalem nhoim?
MARRY ANN, GET TEN FREE !!.


Nattkuleak sakun, boroch huxir korun, Martin ghora pavlo. Luhan dharachi chavi kaddun bhitor sortalo, titlean ‘Home Minister’ Shrimati Merlin sofa-r
boson axill’li tache nodrek geli. Martin bhitor sorun aple potinink mogacho
beij ditna….


MARTIN: Hi sweet heart. I think I am late.


MERLIN: Na, na, tujem ghoddial ghora lagim visrun gel’loi nhoim?
Voram kitlim zal’lim mhonn koltelem?


MARTIN: Angavele kopdde boddlun ietam.


MERLIN: Tondd bond kor ani bos hangasor. Mhaka sangun gel’lo,
mummy-chea ghora vochun rokhddoch ietam mhonn.
Tum kitem kai mhollear, Edwyn, Selwyn, hankam ghevn Igorjichea
vosreant nattkulem polloupak pavlo? Tuka bailecho khol husko
assunk zai aslo mu?


MARTIN: Actually, kitem zalem tem zanai darling?


MERLIN: Chup!! Tuka khobor asa hanv khoimchea poristiticher asa tem.
Ho mhojo nimnno mhoino. Mhaka eksurem sodun vetai?
Khoimchai vellar tras zavn dukhavoll (labor pain) ievnk xoktta.
Poiloch ‘parto’ mhojo. Zata titli zotnai gheunk zai ami. Ani tum kitem kai mhollear ‘mobile off’ korun MARRY ANN, GET TEN FREE polloupak ghela. Hamm ??


MARTIN: Igorjen bhitor toxench kompoundant ‘mobile off’ korcho mhonn tujich xiddkaunni asa nhoim?


MERLIN: Tiatrachea vorsrean ‘off’ korcho oxem sangunk nai.


MARTIN: Kednai-kednai tea hall-ant dhormik misachi bhettouni zata, te katir ‘mobile off’ dovorlolo.


MERLIN: Puro, puro. Hanv zannach aslim tum soglle ‘excuses’ toiar korun astolo mhonn. Bail tuji hanv, kombea. Tuka fattlean-fuddlean pok’ko
ollkhatam. Gelea Brestarak ‘night vigil’-ak voch mhonn poratlelem.
Poilench amchem bhurgem. Ir'rloso teag kor ani borea baxen mhoji
‘delivery’ zavnk Devak ulo kor mhollear, tuvem mhaka sanglem ‘week end’
ani nak sokoilem gheuchem chucktta... Ani te dogui tuje mevn’ne Edwyn,
Selwyn khoim gele?

MARTIN: Tuji boddboddi akaxvanni ‘on’ zatli mhonn tannim poilinch ghora
poll marli.


MERLIN: Ek sang. Tum mhaka sangonastana mudd’dom
‘Marry Ann, Get Ten Free’ nattkulem pollovpak kiteak pavlo?



MARTIN: Mhaka dislem.....mhaka dislem....


MERLIN: Tuka dislem, kaim dukhannar (shopar) vikri asta BUY ONE, GET ONE FREE. Ani oxench kitem tori nattkulean ANN-a sovem ghoddchelem
asa. Tichea lagim logn zatele novreak anik dha Ann-acheo bhoini melltelo, oxem tum chintun gel’lo. Ponn sermanv firgea bhasen zalo nhoim?
Khobor na tuka, ‘never judge the book by the cover?’

MARTIN: Mhaka khoim khobor, borovpant chuk asli mhonn?
Paper-ar ani Goa-world.net-ar jahir kelelem ‘Marry Ann, Get Ten Free.
Ponn xevottachea porddeant dakhoilem, Marry Ann, Get TAN Free.
Ho TAN mhonntat to Ann-cho bhav zaka sasupai funkot diunk toiar aslo
Ann-a thaim kazar zotelea novreak. Zoxe tuje dog bhav Edwyn,
Selwyn mhaka poddleat.


MERLIN: Ekuch nakar marun nak chepoitelim. Mhoje bhav ankvar.
Tankam osle khell sobt'tat. Tanchi pirai hi. Hea dis tanche. Khoimchei
darar tannim marunk zata.


MARTIN: Mhoji xir meli kitem?


MERLIN: Mhonnchem? Ho nnov mhoine purmentacho ‘speed breaker’
ghalun tum pois-pois bhonvunk soddtai kitem?


MARTIN: ‘Speed breaker’ asta thoim gaddi ‘slow’ cholovpak poddtta
nhoim?


MERLIN: Heach khatir tum hevtten-tevtten heddtta to, ‘fast lane’ melltta
kai mhonn….Avois…m-u-m-m-y....
Martin, please…. help me.....m-u-m-m-y......


MARTIN: Honey kitem zalem?


MERLIN: Come on Martin, baby coming. Vegim mummy-k phone kor.


MARTIN: Tumchem bailachem borem mugo.
Poilech amrut logn-ratik killoch marchi m-u-m-m-y........
Ani bhurgem zanvchea vellar bi dukhin m-u-m-m-y ?????



Lino B. Dourado
http://groups.yahoo.com/group/gulf-goans/message/3229
=====

Umollxik Kuwait - Goa Dis monoitana.....

Umollxik Kuwait - Goa Dis monoitana.....


Vhodd dobajean ‘Goenkarancho Ekvott’ bhavtte khala, Goan Welfare Society-Kuwait hannim "Goa Dis" Otumbrache 10ver, 2003 manoilo. Kuwait-che Goenkarank to dis bhouch anondacho dis zalo zalear poilech khepek hajir zalelem Miss Mirsang, hika, boreoch nakantleant xinkeo khaddcheo poddleo. Tea disak United Club of Utorda hanchea Jevnnachea Stall-a fattlean ek torni zhoddi zhoran uloitali. Amcho, guptim bonvandde ghalpi LAPIT babache, sokoili gozal kannar poddli.

CHEDDUM: Please leave me alone. Do not talk to me. What the hell you…

CHEDDO: Shu..uuu. luhan uloi. Polle, vorsak ek pavtti ho dis ieta. Chodda tempan soirim hangasor melltat. Iskolant, kollegint sangatak xiklele ixtt-ixttinink pollevn ani tankam mellun Goenchi umollxik laglea vori dislem.

CHEDDUM: Hoi? Tuje fuddarachi bail zateli ixttinichi umxik lagunk na? Fonar fon korun hangasor apoilelem tem, tum dusrea thaim mirouta tem pollevpak?

CHEDDO: Kitlech pavtti, tum aslele zagear ievn, bhonvandde ghatle. Ponn tujo bodyguard tuje mhoreantlo haloch naslo.

CHEDDUM: Mhojo daddy, kitlinch vorsam Kuwait nokri korta. Kednach hea vhodd Goenkaranchea mellaveak hajir zavnk na. Forsan taka ghevn ailelim, ani tum kitem kai mhollear Goem savn ailelem ‘band’ Purple Rain vaztana, zambli rongacho vistid ghalun aslelea cheddva thaim nachtalo, tem konn?

CHEDDO: Ho-oo tem? Tem mhojea timan-achem cheddum.

CHEDDUM: Timanachea cheddvachem ubhar hodd’ddem tujea hodd’ddear xittkun dostalem, ani tuje hatachi bottam typing kortalea bhaxen tachea kulleancher khelltalim. Kitem check kortalo?

CHEDDO: Kitlo tempuch zal’lo mhojem cousin mellunk na. Apurbahen vegen dorun dislem, zalear pap zalem?

CHEDDUM: Mhojea dolle samkarakuch osle hollxik sombond tor, fattlean kosle khell astele?

CHEDDO: Mon’xak dubhavachem patok asunk favo na.

CHEDDUM: Patok ani patkachi somorth mhaka xikoita? Donparam jevnna vellar hirvea rongachem bomble voir sakun polko (blouse) ghalun ani dhimpra voir matxem voddou ghatlear nillea rongachi pantie dixtti poddteli skirt nessun aslele cheddva sangatak jevonn jievtalo. Sorpatel kullerant bhorun, tum mud’dom tajea tonddan lottalo, tem konn?

CHEDDO: Te…m? Tem mhojea maxenachi dhuv. Novench Kuwait ailam. Mangaf mhonntat thoim ravta ani tem Kuwait ailear mellunk na. Maxenagher vetana ami oxinch eka mekak xit borovtalim.

CHEDDUM: Korem?? Ubo ravun kiteak borovtalo tor? Tuje mander ghevn borovchem nhoim aslem? Ani Game Stall-ant, tum fattlean ravun bharik xirkuttiche hatak dorun rings udoupak uttavollir aslolo. Tem soirem konn? Mama-chem cheddum?

CHEDDO: Ago, tuka koxem gomlem? Tujech porim tenvuim poilech khepek Goenkaranche mellaveak pavlam.

CHEDDUM: Chup…!! Tenklelim mov kavpak mhaka xikoinaka ani tujeo pokeo fottaxio marinaka. Fattlean polle, hockey stick dhongeachem asa tevuim soirem tujem? Tachea hatak dorun ladies toilet dakovpak vollttam martalo mure tum. Hangasor anik kitlim soirim bhorlelim asat tujim? Choll baba choll. Umxik laglea nhoim tuka? Tankaim golleak podd.

CHEDDO: Please…please. Try to understand me.

CHEDDUM: Borem bhaxen vollkilo tuka, mhojech hatan mhoje hat kapche adinch…..

CHEDDO: Deva katir tondd bond kor. Boro vell asa to tuka samballun dovorla. Thoddea vellan sonskrutik kariokram (cultural programme) suru zatlo. Ami dogaim ekech kodden sagantak bosun to pollouncho urla.

CHEDDUM: Mottvacho vell aslolo to tuvem soireank(!!?) dilo. Jedna Purple Rain vaztana tujea vegent ravun nachunk distalem, ponn te vellar tuka timanachem cheddum poxetalem. Game Stall-ant tuvem mhojea hatak dorun rings uddoichem, ponn na, mamachea cheddvan zago ghetlolo. Tujea vangddak ruchik xakuti, sorpotel kaun dislelem, tevui vellar mavxechi dhuv handdir asli. Vicharlaim tuven, hanv jeulim vo na tem?

CHEDDO: Chuk zali, xoma kor. Chodd soirim zalim nhoim? Tuka cheuris pao gheun ditam.

CHEDDUM: Zana zav, somdirant khub masli asa mhonn. Mhaka naka tujem chevris. Lokak cheurisachem mas aslem tem khavoilam ani surkuteo (mirio) poddleli kat, mhojea hatant divpak aila?


Lino B. Dourado
http://groups.yahoo.com/group/gulf-goans/message/3266

Kopachem chodd zatokoch…

Kopachem chodd zatokoch…




Shri Baltazar sadea sumanachea disani (weekdays) konnachech party-k vochpak ekdom fattim. Ponn kalchea Budhvara, upai nassun party-k vechoch poddlo. Ektich mogachi mevni Isabela. Putacho poilo zolm dis aple avoi-bapai ani ghorcheam sangatta somorpak, khas London savn Europi ghovak ghevn Goeam ail’li.

Birthday Party Calangute-che eka nanv voste hotelant ani tivui zalear ratchi dovorleli.

Shri Baltazar choddan chodd, kopachem ghetolo zalear tin peg-am voir vocho naslo. Mevnni Isabelache Europi ghova sangatak foren Black Label Whiskey gonttana Shri Baltazar-an poilech khepek so odik whiskey peg aple tank-int domxil’le ani sarkoch alegri zal’lo.

Ghora pavtokoch bail Rozad-an tache angavele kopdde kaddle, khatir ghatlo ani apunui nhidli.

Sokallim goddialacho alarm vazlo. Shri Baltaz-ar dolle poxet-poxet utthlo ani dolle dhamplelech astana angar kopdde choddoile.

Uprant offisant pavttokoch.................



ROZAD: Hello Baltu.

BALTU: Offisant pavtta thoinch asam. Tujem ferem ferem naka. Azun mhoje tokleantli noxea dhevnleli na. Ratim chodd zalem ani vellui konnunk na.

ROZAD: Tum utthlo tedna mhaka zagoichem aslem.

BALTU: Ami ghora pavttat mhollear sokalchem dhedd hor vazlelem, tea katir tuka zagoipak borem disunk na. Orxim zalear tum khub tokhlelem nhoim?

ROZAD: Tum sarko zur zal’lo. Dhedd nhoim tin horam vazlelim. Ti gozal sodd atam. Tum zanaim tuvem utthun kitem kelam tem?

BALTU: Hanv utthlam, kopdde nhesslam, tondd dulam. Bos dorli ani offisant pavlam. Mhojem bulbul, upkar korun fon bond kor.

ROZAD: Mhojea ghova, zata titlea vegim ghora ieo.

BALTU: Tum toklen sarkem asa mu? Mhoineantle nimnne dis, ani hanvem kamdarancho pogar toiar korun, mhoineamcho vako (report) divnk zai.

ROZAD: Tujem nak lojen katorche adim vego-veg ghora pav Motor saikolin Mapxeam savn Calangute ievn-vochunk fokt pondra minutam lagtat.

BALTU: Kitem zalam tem tori sang ?

ROZAD: Tuka ek vaitt sonvoim asa. Kumis (shirt) matxem bhair sorlem zalear kalsanv purai sokoll dhenvoun porot kumis bhitor lottchem. Tujem kalsanv sokoll astana konnui tuka polloit mhonn mhojer akant aila.

BALTU: Tujer itlo akant ievpak gozal kosli.

ROZAD: Sokallim kopache jonnjolicheruch tum utthlo ani tuje kopdde angar choddoitana, goddboddan mhoji chedd’ddi nhessun gelo.

BALTU: Kitem ??????



Lino B. Dourado
http://groups.yahoo.com/group/gulf-goans/message/3296

http://www.goa-world.com/goa/poems
http://www.goa-world.com/goa/poems/lino

Ambea ambea dink tuka........

Ambea ambea dink tuka........




MATTARI: Aiz kitem tor ekloch bhair bosla? Sodanch
sanjechi cha bhitor ghetalo.

MATTARO: Amchea vaddeant bhurgim nant dista.

MATTARI: Kiteak oxem mhonntai tum? Bhurgim asat tancho
hixeob mellchona

MATTARO: Gheleant khoim?

MATTARI: TV serial na tor internet polletat astelim

MATTARO: Mhojem gonit chuklem astelem. Adim amkam
khoim cable TV, computer aslo? Fokt ek dhaktulo radio.
Iskolak thavn aile mhonntoch donparchim Konkani gitam
ani kednai ratcho khell/tiatr ailear amchi avoi chalu
kortali.

MATTARI: Aiz avchit fattlean volt (reverse) ghetlem
mu?

MATTARO: Tum zanai? Hanv tujea mogan koso poddlolo to?

MATTARI: Mhonnchem? Mog kortat toso nhoim?

MATTARO: Kitloch vell varandan bosun asam. Ddop-ddop
korun musraddache ambe zhoddttat. Amchea bhurgeaponar
ek ambo zhoddlo mhonntokoch sogot xezarchim bhurgim
chedde-cheddvam ghorantli bhair sorun zhoddlolo
ambeak mellovpak, bonkak paim tekoit dhanvtalint.

MATTARI: Ambea-ambea dink tuka fuddlea vorsak ambo
mhakach. Ambechea zhaddak meulolo ambo ghostitana
mhonntalint nhoi?

MATTARO: Sarkem uloilem tum. Ani aiz polle. Ambe
zhoddttat ani soglim dhukram dhanvtat. Heach khatir
mhonntalom hanv. Amchea vaddeant bhurgim nant kai
mhonn.

MATTARI: Hem poi cheddum rostean chollun veta tem
konnachem gai?
MATTARO: Rav, pollevpak dolleank okllam ghaltam.
Novench koxem hea vaddeant nhoi?

MATTARI: Bhurge nant mhonntalo nhoim re tum? Polle ho
poi scooter ghevn Remedianacho cheddo bhair sorlo.
Amchea Timoticho motor saikol ghevn bhair sorta.
Are..e!! Domingacho cheddo bi bhair sorlo. Paskinacho
hea vellar khoim vochpi nhoim, tovui apli scooter
bhair kaddtta. Aiz Aitar, khoim tori ‘Beat-Show’
astolo.

MATTARO: Ago aik. Polleunk nai tuven rostean ek sobit
cheddum chollun ghelam tem? Taka polleun bhurgeani
fatafat scooter/motor saikoli chalu keleat. Noxib jea
porachem, zo tika ‘lift’ dita.

MATTARI: Adim ambo zhoddtalo tedna ambeak mellovpak
ghorantlim bhurgim bhair sortalint ani atam ek cheddum
rostear chollun laglem tor ghorantleo scooteri/motor
saikoli bhair ietat. Oxem tum mhonnonk soddtai?

MATTARO: Mhojem gonit sarkem zalem nhoi? Tem soddun
di. Tuka vicharlelem tujea mogan koso poddlo kai
mhonn? Ambe zhoddtat te polleun mhaka ugddas ailo

MATTARI: Hea mhattare piraier addleo mogacheo ruchi
kaddpak tujeo meloleo xirio porten ugtteo zatat re?
Oi oi… hanv feriadank (holidays) mukhailea ghorantlea
Sakru maxenanger ietalim, ani tum lembddo koso bovande
gali

MATTARO: Tea disachi gozal ti. Malkurad zhaddacho ambo
zhoddlolo. Tum bbair dhanvun ailem ani tuka polleun
hanvuim bhair sorlom. Dogaim, dhanvnni (race) laglelea
porim dhanvunk laglim. Barraboruch zhoddlolea ambeak
hat ghaltana tuji tokli nibran mhoje tokleak
apttol’li. Dolle dhampun tuven “avois maim”
mhonnlelem. Tuven hoddou ghatlolo aslo. Hanven ambeak
hat ghalche bodlek zhaddak aslele ambe-ambech
polleunk urlom. Somzolem nhoi? Tujea mogan koso poddlo
to? Atam mhojem rot (walking stick) di. Ek dhakti
pasoi marun ietam.

MATTARI: Soukas soukas. Dhenvtana panvddenvelo nisrun
poddchi. Ponn rav re! Tum mhonnta ambe ambech pollele.
Tea disak zhaddavelo ekuch ambo zomnir zhoddlolo.
Ha...am...!!! Atam mhoji ‘tube light’ pettli.
Somzolim! Mhattaro kombo khoimchea ambeanchi gozal
korta to. Dekunuch jevnank chepnnechi toram borim
lagonant tuka. Are..e .Hey..ey aikotam tum..?? Gelo
ambeam chor........

Lino B. Dourado
www.goa-world.com/goa/konkani/

http://groups.yahoo.com/group/gulf-goans/message/3001

DUDDVANCHO ZOR TOKLEK CHODDTTA TEDNA

DUDDVANCHO ZOR TOKLEK CHODDTTA TEDNA




Dog xezari Devak argam diunk Igorjent bhitor sorle.

POILO: Deva Tum zannai mhojea dhukanar vechea adim dor
dis Tuji puja korpak igorjent bhitor sortam. Mhoje
dhave bazuk asa to mhozo dusman xezari sumanank ekuch
pavtti lokak dakovpak igorjent ghusta.

DUSRO: Deva! gelea sumanant hanv pavunk na .Ievpak
bhair soril’lom, punn vatteruch Timotichi avoi gavli,
ani sanglem tichi sun dukin khouxtouta. Porsut
zauncho vell lagim paulolo. Tichea barabor
hospittolant gelom thoinch vell zalo. Mhaka bogos
Saiba.

POILO: Igorjecho modhlo novo altar mhojea poixeamni
bosoila. Hi Tuka khobor asa mu? Mhoineache xevottak
igorjeche vhoddil aplo dhormik kariogram somplea
uprant mhojem nanv uchartat. Hanven kosli-kosli
denneachi bhetto dileat teo sangtat.

DUSRO: Poir mhoje thaim ek chuk zali. Kamank votna
vatteruch Shrimati Basanti doddli. Roddkulea tallean
iskolachi chiptti (fee) farik korpak poixeancho unnav
asa oxem kolloilem. Bizlechem bil farir korpak
bolsant poixe axil’le. Tantle tiche gorjek dile .
Iskolachem por tigelem, na tor klasintlem bhair
poddttelem. Gelea mhoineachem bizlechem bil vellar
farir korunk na mhonn (orxim pondra dis pasun sarki
bizli nasli) dusreach disa amchi bizli katorli. Bizli
katorpachem karan mhoje ghorkarnik sanglem tedna
tinnem, mhojo dubav khailo. Basantichea mogan poddla
oxem bogllant mhojer thaplem. Tiddok aili . Ticher zap
korun kansular vazoilem Mhaka bogos Deva.

POILO: Polle, polle Tuka dolle kaddinastana polloit
asa. ‘Malkriad’ mhojeo chukleo sangta astolo.
Xezareancheo sangta astolo. Mhojem kitlem vhodd
terrace axill’lem ghor ani ho to futtlelea nolleachea
ghorant ravpi kiddo kitem somzota? Kednai tannem Tuka
ek poixeachi domddi dilea? Tujea monddirak kitem tori
tannem kelam? Velean lok tajench borem uloitat,
thoknnai ani apurbai kortat.

DUSRO: Mojea uzvea bazuk asul’lo xezari kitem korta
tachi zanniv Tuka asa nhoi? Kaluch mhoje anik eke
kombiek vikh ghalun marli. Tachea durgant mhojem
kosleim zonvar pavlem tor, tem porot jivem ghora
pavona. Sodanch aplea ghoracho kochro haddun to mhojea
porsant uddoita. Hanv ti mellsann kaddtam ani vhorun
painddint uddoitam. Tum taka bhogos Saiba, to apunn
poixeanche forsar kitem korta tem nokllo. Kal mhojea
dhaktte dhuven il’loso kagddacho kuddko porsant
uddoilolo mhonn hanvem tichea kensank dhorun
zoddpaili. Mhaka bhogos Saiba.

Eklo xezari aplem hodd’ddem duddvanche podven dhoddaitalo zalear dusro xezari aple chukhichem bogsonnem magpak monddirant bhitor sortalo

Ek dis oxem ghoddlem. DUSRO xezari ojaplo kitlech dis zale POILEA xezarean tachea porsant kochro uddounk na. Goddie sudhorlo zait oxem tannem chintlem. Mhoino
odik zalo. Igorjent dixtti poddlo na. Taka husko zalo. Duent asa kai? Tachea monant ailem ani Devak mukhar ghalun tache ghora gelo. Poilo xezari khoreamnich duent aslo.

Utthonk bosonk zai naslem Xezareak polleun duent axill’le xezareachea dolleant dukham bhorlim. Itlem vaitt kelem astana to aple khobreak ailolo polleun fugar zaun roddunk laglo. Guneanv bhogsunk tannem donnui hat fuddem kaddle. Dukhan bhoril’le
dolle voir kaddun mhonllem. “Deva hanvem hea borea ani doiall xezareak khup tras dile, ponn tannem mhaka portem kednach vaitt utor diunk na. Tache monzatik vikh ghalun martalom ani mhojo kochro tachea porsant uddoitalom. Toch monis mhoje khobrek poilo pavlo.

Hanvem dusreank zaitem dilem ponn tantlo ekloi mhoje khobrek ienvk na. Ek mhoino odik zalo. Mhaka guneanv bhogos Deva. Mhojea xezareachem ghor upott denneamni
bhor. Hanv hea sonvsarant asun faido na Deva mhojer moronn dhadd”

Ani to tech vellar somplo.

Lino B. Dourado


[July-August 2003 The GOAN REVIEW uzvaddak haddlolo ek lekh]
http://groups.yahoo.com/group/gulf-goans/message/3041

=====
http://www.goa-world.net/poems
http://www.goa-world.net/poems/lino

- Forwarded by www.goa-world.com

ZOLMOTAT KONNAK SOTAITAT KONNAK?

ZOLMOTAT KONNAK SOTAITAT KONNAK?


Panch vorsamchi eklich morgad dhuv. Avoi-bapaichi subeij apurbai zavn khub mosti ani mosteponna korpi utorli. Zai mholleli vost zai, na tor rodd-modd-fodd kortali. Mosteponna korit Dev martolo, portean zap diit tonddak uzo laitolo, ani maglear kainch divnchona, oxem kednai-kednai sangun, avoi dhuvek bhirant ghaltali.

Ek dis Devak fone korpak dhuven avoik sanglem. Deva thaim fone na oxem avoin dhuvek sangtokoch mezar asul’lo fone hatant ghevn zomnir marchea vellar avoin bovall kelo. Dhuv roddunk lagli. Avoik churchure disle. Avoi chintunk poddli. Dhuvek fuslavpak ani
somzavpak konn melltolo? Tika ghavnchea padri vigaracho ugddas ailo.Tovui zalear gorom toklecho aslo. Taka dhuvechi gozall sangli.Dhuvek fuslavpak ani bharabor thoddichi bhirantui divpak vinonti keli. Dev ulounk sodta oxem dhuvek sangun fone tichea hatant ditana devak rag ailear dev taptolo mhonn xiddkavnni dili

BHURGEM: Hello konn uloita? Dev?

P. VIGAR: Bhurgeam thaim ulovpak mhaka borem dista.
Tuji mummy sangta tum khub huxear bhurgem mhonn. Tum
fuddlea mhoinean thavn iskolak vetelem khoim.

BHURGEM: Mhaka mummy sangta bhurgim mosteaponna korit,
dev marta mhonn

P. VIGAR: Na bai na. Dev bhurgeank kednach marina. Dev
bhurgeanchi apurbai ani mog korta.

BHURGEM: Mhaka mummy sangta, subeij uloit ani
vhoddilank portean zap diit tedna dev tonddak uzo
laita.

P. VIGAR: Borim bhurgim vhoddilank portean zap dinant.
Bhurgim bore tench uloitat. Deva thaim bhurgeanchea
tonddak lavpak uzo na.

BHURGEM: Ujeachem emkond asa mhonntat tem kitem?

P. VIGAR: Tem na zait tor, vaitt monis asat te odik
vaitt zatele bai. Emkondantlo uzo fokot patkeancho
‘barbecue’ korpak dovorla

BHURGEM: Mostiponna kortat tea bhurgeank tum kainch
dina khoim.

P. VIGAR: Bai, tum mag ani tuka melltelem. Devachem
ghor borlelem asa.

BHURGEM: Mhojo daddy mhaka fokot ‘toys’ haddta. Hanvem
daddy-k sanglam mhaka ‘baby brother’ zai mhonn. Baby
brother-ra thaim mhaka khellunk zai. Daddy sangta baby
brother zai zalear Deva thaim mag. Mhaka ek baby
brother di nhoim Deva.

P. VIGAR: Bai, ho prons matxe gombir asa. Uprant
chinttun zap ditam.

BHURGEM: Na..na..na.. Mhaka atanch 'baby brother' zai
mhollear zai. Tuven divnchoch poddtolo. Vegim gheun
ieo. Devachea borlelea ghorantlo gheun ieo. Ek 'baby
brother' divpak kosli haddkoll asa? Mhaka atanch
zai….baby brother atanch zai…..

P. VIGAR: Chup!! Ogi rav. Kortam kortam chodd zalem
tujem. Mummy-k sottaitai, daddy-k sottaitai ani atam
mhaka? Tumi zolmotat konnak ani sotaitat konnak go?
Baby brother zai? Hoi? Hem kam tujea daddy-chem. Taka
sang

BHURGEM: M-u-m-m-y....Dev khorench taptta muge.....



Lino B. Dourado
http://groups.yahoo.com/group/gulf-goans/message/3055


=====
http://www.goa-world.com/goa/poems
http://www.goa-world.com/goa/poems/lino
http://www.goa-world.com/goa/konkani/

Ailem Tum?

Ailem Tum?



Yeo baye Yeo. Ailem nhoi tum? Mogan yevkar ditanv
Khoxem ailam, kitem haddlam vicharina tujea lagim hanv
Apttun-dopttun, voir-sokoll zaun xevttim pavlem marun danv
Kallokantlem ubharun uzvaddan vhortelem axea ballgitanv


Tum yetana, chomotkar gheun yetelem kai dista
Punn donunch disamni tujeo bhitorleo karnni zollkota
Tsumani, bhuimkamp buddtecho pavs borobor haddtta
Vetana, sonvsarechem nixontton korun porot veta.


Boreaponnanchi dori tujea hatant keddnanch disli nam
Bhirankull zuzam, akantvadeanchim mostiponnam, unnav zainam
Ekvottan jiyeteleank, tujea sukhachi savlli bilkull melonam
Monis prani xantik axeta, hi tujean haddunk ghoddonam


Sang, keddna tum ekvottacho bhavtto gheun yetelem?
Ani monis kullak huskea mekhlem jiyeunk ditelem?
Vikalem varem, bhukechem vojem, piddent lastolem
Anik ek voros mog, xanti dinastana oxench somptolem?


Lino B. Dourado
(Utoddekar)

Kaju feniecho VIRUS choddta ten’na

Kaju feniecho VIRUS choddta ten’na



Ben novo kompiuttor vikto gheta. Tachi bail Jen,
poilech pavtti kompuittor polleta. Kompuittor challu
korpak Ben-ache fattik lagta. Thoddeach velan
Ben-acho bhouch avddicho programe ‘Sport Week’ Cable
TV-ir ienvcho asta. Ben-ank naka kompuittor challu
kelolo. Tori astana Jen-ank khuxi khorpak SHORT CUT
korun sompoitolo oxem chinta. Jen, kompuittorachem
kainch noko asta. Week-end mhonntokoch Ben cola
sangata kaju feni-cho glass mezar dovorun kompuittor
chalu korta. WINDOW 98 screen-ar dista.

JEN: Hem re baba kitem? Kompuittorak 98 zonelam asat?

BEN: Nokoi tum tem kantar? Saxttichim cheddvam mottich
pamprelam, ratchim ugtim dovortat zonelam....

JEN: Puro...puro....Saxttichinch kiteak? Tumchea
Tiswadichim unim asat? Poir, xezarchem Sakruchea
room-ant konn eklo zonelantlean udki marun bhitor
sortana Kaitun pollelo khoim.

BEN: Taka mhonntat entry. ENTER vo bhitor sorlo
mhonntokoch uprant kompuittoran khoimsoruch gusunk
zata.

JEN: Tujea uzvea hatant asa taka kitem mhonntat?

BEN: Taka MOUSE mhonntat.

JEN: Ha...ha...ho...Mouse?...Undir?

BEN: Jen, moskoreo kori nakai. Xikta, gombhirponnan
xik.

JEN: Ok baba Sorry! Mouse, borem asa. Tachea voir don
dolle distat.

BEN: Tankam ‘mouse button’ mhonntat.

JEN: Ani tujo davo hat mhojea hodd’ddear kitem korta?

BEN: Goddie undrancho butanv soddta astolo.

JEN: Tujo hat upkar korun sokol kaddchi?

BEN: Zhangddar dovorlear zata?

JEN: Horkot na. PROGRAMS mhonnchem kitem ani koso
chalu zata?

BEN: Thoim vochunk zai tedna tuvem click button
dhampcho ani tuka zai to program ugto zata.

JEN: Ben tum mhojem zhanggod dhamtta.

BEN: Polle Jen, tujem dhean (sintid) hanv kitem sangta
tacher dovor ani nhoim hanv kitem korta tacher.
Kompuitorak rokhddoch VIRUS lagta

JEN: Hi anik kosli pidda re?

BEN: Hem tuka somzupak boreach pavsal vochunk zai..

JEN: Hanv zanna, tuka khoxi na mhonn mhaka xikovpak.
Noko mhonnon kaichea kai sangu naka. PAGE UP mhonnchem
kitem? Tem tori sang.

BEN: PageUp..PageUp...Ham! Somzolom. Jitle pavtti tum
‘click’ korta titlech pavtti kompuittor tujo hukum’
mandun geta. Tujeo sugur keleleo ‘files’ voir kaddun
pollevpak PAGE UP hangasor vechem poddta

JEN: Mhojea ghorkara PageUP….PageUP korun tuvem mhoji
‘skirt’ vhoir ubharli.

BEN: Kompuittor oxech toren bosoilolo asa nhoi?
PAGE DOWN hea zagear ‘click’ korit kompuittoracheo
bhitorleo mustaki soroll sokol dhenvttat.

JEN: Oxem? Puro kor tujem! Sasumain dhadlolem
kaju-chem choddtta mista. Mhaka khobor nasli
kompuittor xiktana barrabor ‘practical’ xikpachi goroz
asta mhonn. Bond kor tujo kompuittor.

BEN: Bond korpak STOP button marunk zai ani tea
uprant.... Ago vochum naka. ‘Sports Week’ program
TV-ir ievpak anik dha minutam asat. Tea mhonnosor
program chalu kela to sompoilear koso?

Lino B. Dourado

{Aitarachea aitara Lino B. Dourado hancheo Kaskuleo
vachun vironaka}

=====
http://www.goa-world.com/poems
http://www.goa-world.com/poems/lino/

_____
www.goa-world.com
Everything Goan!
____

EXPRESSIONS - The Flower Shop (Goa)
www.goa-world.com/expressions/
Email: expressions@apexmail.com

Pavs Trasant Ghalta Tednam...

AITARACHEO KATKUTLEO
Pavs Trasant Ghalta Tednam...





Sotri vorunk visrum naka

Sundoren xiddkailo mhaka

Bharik-motto pavs zhoddta

Bizlear thonddi zait tuka



Kitlo mhunn tigelo husko

Mhojea bholaikechi kallji gheta

Pavs zhoddum vo na zhoddum

Sotri mhojea hatant dita.



Bazarak vetanam sotri dileli

Khoim gha tunvem dovorli?

Vetana pavs, yetana ôt

Oxem toren chouti sotri xennoili.



Naka ghe! Sotrechi goroz na

Mollbar uzvaddik surya porzollta

Pavsacho temp, atam pavsak nem’ na

Vetana ôt aslear, yetana pavs ghosghoxeta



Ani tea disa toxench ghoddlem

Pavsan mhaka chikan kelem

Bazar sompoun ghora yetana

Thambonastana pavsan dhorlem.



Xezarnnin aple sotren asro dilo

Ghora meren mhaka pavoilo

Mhoje sundorecho bezo udlo

Zogllamni nastana goddgoddo suru zalo



Hozar sotreo xennoilear zatat

Punn lokachea bailank tenkum naka

Pavsant bizun thonddi-zor ailear zata

Punn lokachi ub ghevn mhojea fuddean yenaka


Lino B. Dourado
(Utodd’dekar)

http://groups.yahoo.com/group/gulf-goans/message/21195
____________________________________


"AITARACHEO KATKUTLEO'' pustok hangasor mellta: Family Book Shop (Zito Almeida) Margoa, Rmedian Vaz, Old Market-Margao, Narayan D. Munz, Margao Bombay Cafe lagsor, M.P. Raikar Book Stall, Margao-Bank of India lagsor ani Pilar Prof. Jose Salvador Fernandes Mobile 9881810832

Congratulations Lino B. Dourado

Congratulations Lino B. Dourado



I had the opportunity to visit Utorda for the book release ceremony of Lino B. Dourado. It was indeed a special day in the life of Lino-bab.

Was pleasantly surprised when I leafed through the pages and found Gaspar Almeida's 'prostavona' (preface) which makes interesting reading. As he rightly said, "Aitaracheo Katkutleo" could well become a collector's item.


Lino-bab has a way with words and although I have read only a few of the articles from the book, I must say that he is witty and funny indeed.


Given the fact that Lino-bab has been writing consistently all these years, he must soon think of a second volume of AK! Congratulations Lino-bab!



Walter Menezes 22/Sep/2008
42, The Mustard Seed, Cusmene, Quepem, Goa 403705, India.
Mobile:+91 9370569296 E-mail:walter_menezes@yahoo.com


http://groups.yahoo.com/group/gulf-goans/message/21228

Kaide Pallpi Bhou Thodde……..

Kaide Pallpi Bhou Thodde……..



Don rodanchim dhanvterim choloitana toklek helmet ghalpachi ek koddok kaido amchea mankulea Gõyant zala. Toklek helmet galinastana skuttor vo motorsaikol choloitana sampoddlo zalear pulis dondd vo talão diunk matui churchure korinant. Khorem sangpachem mhonnlear, don rondanchim dhanvterim choloitoleamni aple surokxe khatir helmet-acho upeg korukunch zai.



Kaim dis fattli ghozal hi. Marcelantlo Suresh ani tageli ghorkarn Sarita, Ponnje eke khas bailanche dotorik (obstetrician) mellunk ghelelim. Dotorexim vochpachem kharan, Suresh-Saritachea lognank tin vorsam somptam mhonnlear tannim dog bhurgeank zolman haddlelim. Anik bhurgem, nakach naka mhunn dotorichi bhudd vo advise magchea khatir tannim dotoricho appointment ghetlolo. Dotor bayen zaite toreche upai tankam suchoile. Bhurgem zavpachi pisvi kaddunk sanglem tedna, tem ek pap, Saritak dispak laglem. Lign vo sex ghenvche adim bail mon’xen I-pill (Contraceptive)ghetlear 99 tok’ke gorb yena, oxem dotorin suchoilem tedna; kednai I-pill gheunk visorlim zalear porot gorb yeit mhunn Sarita bhiyelem. Dotoricheo suchnna tichea favorak nasleo mhonntoch, anik upai naslolean Sureshan condom-acho upeg korcho mhunn dotorin suchoilem tednam Sarita khub khos zalem.



Farmasint vochun unchli surokxit aslolim margelim condoms vikot ghetlim ani ghora yevpache vatter astana Sao Pedro igorjechim pavtanch xirxireamni pavs zhoddunk laglo. Suresh-an, aple toklek helmet aslolem tem Saritache toklek ghatlem ani tim dogaim gozali marit skuttorin rosto tanktana, kedna meren Banastari pular pavlim tem tankanch gomlem na. Pullache dusre vatten tankam vahatuk pulisen (traffic police) addailim.



“Punn sir…”



“Punn-bunn kainch na. Skuttor tum choloita mhonntoch tuvem helmet ghalunk zai aslem”, talão boroitana pulisen mhonnlem.



“Pavsant tiche kens biztat mhunn havem tika ghalcheak dil’lem…..”



“Dusre pavtti dogaimni helmet ghalear odik borem. Obseog ghoddlo zalear tumche toklek mar bospacho chances unnem astole.” Sureshachea hatant talão ditana pulisen sol’lo (advise) diit sanglem.



Xembor rupia dondd farik korun, anik kainch ek utor Sarita thaim uloinastana Suresh aplea ghora veche vatter aslo. Funkea 100 rupia dondd farik kelo mhunn Saritachea monar sontab marle. Tichem mon sarkench tika khaunk laglem. Banastari pul par korchea adim tinnem apnnalea tokler aslelem helmet ghorkarachea tokler ghalelem zalear 100 rupia vanchtele asle.



“Punn Suresh..” ghorache umbre choddtana Sarita kitem tori vicharunk kori



“Kitem vicharunk sodta?” Sureshan, modench aplem tondd ugoddlem.



“Hanv mhonntalim. Skuttoricher konnem eklean helmet ghalem zalear kaido zalo na? Hanvem ghatlem vo tuvem ghatlem ekuch nhi? Talão kiteak?”



“Pulisen dondd ghala to skuttor cholovpeak ani nhoi fattlean bosun asul’leak.”



“Mhonnchem? Ho kaido koslo? Chukun obseag ghoddlo zalear skuttor choloipeacho jiv vattoucho ani fattlean bosil’lo to morcho?”



“Mhaka bexttench sotainaka. Tuka kitem vicharchem asa te traffic department-ank vo kaide korteleank vichar. Punn mhozo vichar tuje thaim ekuch.”



“Koslo?”



“Ami sokall fuddench dotoroxim ghel’lim nhi?”



“Oi.”



“Kiteak?”



“Chukun meren porot mhaka gorb (pregnancy) na yevche khatir kaim upai magpak.”



“Xevottak dotorin koslo upai bhasailo? Fuddarak chukun tuka obseag ghoddum na zaunche khatir mhaka safety helmet dilem mhu?"



Lino B. Dourado







AITARACHEO KATKUTLEO’ Pustok hangasor melltat:

KUWAIT: Goa-World.com, Tel: (00965) 9300257

MARGOA: Zito Almeida (Cine Lata lagsor), Remedian Vaz Book Stall (Pornnem Bazarant). M P Raikar Book Stall (Bank of India lagsor), Narayan D. Munz (Bombay Café lagsor)

PANJIM: Singbal’s Book House (Igorje lagsor), St. Paul ’s Book Store (Bombay Bazar lagsor) Varsha Book Stall (Ponnje-Betim dokea lagsor)

PONDA: Roop Rohan Agency (Public Café lagsor) Parish Youth (Mount Carmel Chapel)

PILAR: Prof. Jose Salvador Fernandes (9881810832)

MAJORDA: Nile Gen. Store & Book Stall

Heo Bhangoddeo Mhakach Kiteak ?

Heo Bhangoddeo Mhakach Kiteak ?


Kalchea Sunkrarak (Otumbr 17 ver) mhojea vorsavollichi sutti sompoun Gõychea vimantolla velean Kuveitt yeunk bhair sorlom. Mhoji boska A16 vimanachea zonnelaxim asli. Hanvem mhoji boska ghetli. Ani viman Kuveitt yevpachi udnna korche adim hanvem ek nimnni nodor sobit Gõychea vimantollacher bhonvddaili. Viman sodam porim orddem hor huxir korun vattek laglem. Tea vellar mhoje uzve bazuk 16B sitar bhoslole ostoren khalteaponnan mhonnlem.

“Hanv poile khepek vimanan bosun Kuveitt vhetam. Viman uddni (take off) kortana, bhailo distavo pollounk visrum nakat. Oxem mhagelea ghorkaran sangil’lem. Upkar zait. Tumchi suat mhaka dixeat…?”

Viman-poinnaranchea surokxe khatir ani on’toraxttrik kaide pormonnem viman varear uddchea adim soglea poinnaramni seat belts koddok kaidean vimanan bandche astat. Mhojea bosker yeunk bostole ostorek hanvem hi kaideachi ghozal sangli tedna tinnem mhaka poratlem.

“Toxem zalear ani tumi mhaka chance dilo tor..” ani purai tigelo voilo bhag mhojea zangddar dovorun ti ostori Dhabolim vimatollacho dekavo viman chalu astana zonnelantlean pollounk lagli. Azu-bazucho konnui tea vellar amkam pollovpi somzotolo aslo ti mhojich bail koxi. Ken’na kai viman Arbhi dorya vatteavelean voir sorun kupantlean bhitor rigchem oxem mhaka dislem ani kaim vellan toxench zalem. Viman kupam voir bhonvdder pavlem punn mhojer vozonn dovorun asleli ostori mat kitloch vell toxich poddun bhair polloit asli.

“Puro korat”, hanvem tichea donui buzank dorun tigelea sitar bospa sarki keli ani fuddem mhonnlem. “Atam viman voir pavlam. Ani bhair dista fokot Arbhi doryachem udok.”

“Oh….sarkem tumgelem”, ani tinnem mhojea dolleank aple dolle lait mhonnlem ani fuddem sanglem, “viman udna kortana khoreanich bhailo dekhavo pollounk vegllich urbha aili mhaka. Punn tea vorn, tumchea zangddar astana bhitorlem viman voir choddtalem ti mouza ghevpak onek torecho sontos bhoglo. Kuveittche poile tripichi yad mat hanv visorchina.”



Lino B. Dourado
http://groups.yahoo.com/group/gulf-goans/message/21691

Mhaka Vell Na...

Mhaka Vell Na...


Mogacheamno,



Upkar korun nusteachi xikari kortelea bhukelelea suknneank tumchean adhar korunk yeta? Mhaka vell naslelean tumchea thaim vinonni kelea.


Karveanche sonsthen (All Goa Fishermen’s Co-operative Association Ltd.) Gõychea sorkarak nivedanpotr (memorandum) diun ulo marla ghelea 2 vorsam nisteacho dukhavoll jahir korcheak (declare last 2 years as fish famine).


Zori chalu vorsachea moisomant survatek nustem zallek vo rampnnink favo te porim sampoddlam zalear ghelea sumanant thavn nusteacho unnav zalolo pollela. Ani favo te porim nustem marpachi podd’dot sambalinant zalear ‘tourist season’-ank mar bostolo mhunn husko porgotaila.



Zalear mogacheano. Nusteacher jiyetelim suknnim ani xit-kodi-nustem khatele Gõykar kortele kitem? Ho prons mhaka sottavunk lagla. Tuka vell asot zalear sorkarak zagrut kor.



Lino B. Dourado
http://groups.yahoo.com/group/gulf-goans/message/21554
AK******************************************************AK

AITARACHEO KATKUTLEO’ Pustok hangasor melltat:


KUWAIT: Goa-World.com, Tel: (00965) 9300257



MARGOA: Zito Almeida (Cine Lata lagsor), Remedian Vaz Book Stall (Pornnem Bazarant). M P Raikar Book Stall (Bank of India lagsor), Narayan D. Munz

(Bombay Café lagsor)



PANJIM: Singbal’s Book House (Igorje lagsor), St. Paul ’s Book Store (Bombay Bazar lagsor) Varsha Book Stall (Ponnje-Betim dokea lagsor)



PONDA: Roop Rohan Agency (Public Café lagsor) Parish Youth (Mount Carmel Chapel)



PILAR: Prof. Jose Salvador Fernandes (9881810832)



MAJORDA: Nile Gen. Store & Book Stall

'AITARACHEO KATKUTLEO' pustok khoinchea zagear mellta?

---'AITARACHEO KATKUTLEO' pustok khoinchea zagear mellta?


---Mhojea ghoddear boson vicharunk zai?


‘AITARACHEO KATKUTLEO’ Pustok hangasor melltat:



KUWAIT: Goa-World.com, Tel: (00965) 9300257



MARGOA: Zito Almeida (Cine Lata lagsor), Remedian Vaz Book Stall (Pornnem Bazarant). M P Raikar Book Stall (Bank of India lagsor), Narayan D. Munz

(Bombay Café lagsor)



PANJIM: Singbal’s Book House (Igorje lagsor), St. Paul ’s Book Store (Bombay Bazar lagsor) Varsha Book Stall (Ponnje-Betim dokea lagsor)



PONDA: Roop Rohan Agency (Public Café lagsor) Parish Youth (Mount Carmel Chapel)



PILAR: Prof. Jose Salvador Fernandes (9881810832)



MAJORDA: Nile Gen. Store & Book Stall

Mhojea Pustokak PUROSKAR Lablo?

Mhojea Pustokak PUROSKAR Lablo?



Ghelea sumanant Setembrachea 28ver Aitara disa, Fonddem ravpi mhojea dusrea bhavagher ghel’lom. Tagelea cheddeacho zolm dis aslo. Soirim, xezarim, ixtt–mitr asun tagelem ghor bhoril’lem. Toddea soireanchi vollok kortana samkarachea dusrea flat-an ravpi tanchi ek xezarnn mhaka porbim diit uloili.



“Aitaracheo Katkutleo pustokantle lekh vachtam-vachtam sonvsari rattovolichem vozonn tokler asa tem, unnem zata kai dista. Vachteleak hanspachim pirlam dileant. Ani itlench nhoi. Kalchea disa amche Kristi Somudayechea zomatin tujea pustokant aslolo “Duddvancho Zor Toklek Choddta Tedna” ho lekh vachun, ami tacher ‘niall’ kela. Khoreaninch, boro example tujea borpavollin tuvem dila. Dusrea-i vaddeantle Somudayek ami ulo marla ho lekh muzrot tanchea sumanache zomatimni vachun niall korcho mhunn. Amche Holy Family Somudayechea nanvan porbim tuka.”



“Dev borem korum,” mhaka porbim dil’lea bodol hanvem tiche upkar attoile ani hanv dusrea kuddint vochun boslom. Itlean mhoji sundori (bail) aili ani mhojea vhoddlea bhavacho logn vad’dis (wedding anniversary) mhunn ugdass kelo. Sokallcho ak’khoch ades soddun donparchea vellar tinnem yad keli mhunn hanvem sundorecher xinn kelo. Punn tichi mhunn kosli chuk? Mhoje porim tichea mendvachi memory card piraye pormonnem unnem zait veta.



“Happy wedding anniversary” mhoje sundore fattlean hanvem vhoddlea bhavak vad’ disache porbim dilelim tim svikar kortana tannem mhonnlem.



“Az, amche Utodd’deche igorjentle padri vigaran, tuji khobor sanglea.”



“Mhoji khobor? Ani kitem mhunn?” hanvem ojapun vichar kele.



“Aichea sermavant, xezareamni koxe toren ekvottan cholunk zai te bhes bore nomune (examples) ditana tujea ‘Aitaracheo Katkutleo’ pustokantlo borea ani vaitt xezaream vixim ek lekh asa to igorjent ekvottlelea lokak vachla ani tujea borpavollichi tust kelea.”



Bhavachim utram aikon mhoje khuxallkayek xim-mer na zali. Mhojea poilea pustokantlo ek lekh zaum ti Kristi Somudayen ani Igorjent pavo sarkelo astolo mhunn hanvem sopnant porian chintunk na. Mhojem pustok bhair sorlear ek mhoino zait ailo ani okosmat pustokachi tokhnnai dhormik mon’xanchea tonddantlean bair sorleli aikon khoinchea borovpeak obhiman bhogcho na? Hea vixim Vigar Fr. Britto Fernandes thaim vicharlem tedna tannem sanglem.



“Todde pavtti boro vixei povitr vedicher ubo ravun amchea sermavant loka meren pavoitolo zalear dhormik pustokuch nhoi, punn lokachea jivitak lagu zatelim borpavoll tumchea oslea lekhokancho aspav asta mhunn lokak sangchelo kaido amcho. Tujea pustokan xazareanche ixttagotticher attapun aslolo lekh justush mhogelea aichea provochonan bostalo. Dekhunuch hanvem upeg korun xezareancho mog koso togunk zai to ugddas kela.”



Foddemche Holy Family Somudayleant ani Fr. Britto koddlean vhodd vakanni mhaka eksarkeli favli ani mhaka ek puroskar vo award mell’lelea porim dislem. Dor ek potr-masikar ani internet-ar mhagelea lekham vixim toknnai toxich constructive ttika marlealeank hanvem sodanch ugtea monan mandun ghetleat ani tanche abar mandleat. Ani hech toren tumcho sohokar dusrea novea borovpeank mellot zalear Konknni mollar amkam anikui Konknniche fulte bonge melltele.



Lino B. Dourado
http://groups.yahoo.com/group/gulf-goans/message/21424





‘AITARACHEO KATKUTLEO’ Pustok hangasor melltat:



MARGOA: Zito Almeida (Cine Lata lagsor), Remedian Vaz Book Stall (Pornnem Bazarant). M P Raikar Book Stall (Bank of India lagsor), Narayan D. Munz

(Bombay Café lagsor)



PANJIM: Singbal’s Book House (Igorje lagsor), St. Paul ’s Book Store (Bombay Bazar lagsor) Varsha Book Stall (Ponnje-Betim dokea lagsor)



PONDA: Roop Rohan Agency (Public Café lagsor) Parish Youth (Mount Carmel Chapel)



PILAR: Prof. Jose Salvador Fernandes (9881810832)



MAJORDA: Nile Gen. Store & Book Stall



UTORDA: Parish Youth (O.L. of Lourdes Church )

Gõyant Fuddle Dis Marekar?

Gõyant Fuddle Dis Marekar?



Susegad ani xant aslolem Gõychem vatavoronn (atmosphere) az-kal uchambollachea tufanant sampoddlolea vorim zalam. Gõyant chorio, kirmi, bholatkar, lutmar, nagovnneo, lonch ghevpi vaddot vetelean kaim Gõycho lok aple surokxea ani rakhnne khatir kaidean armam-pistolachi porvongi (license) magunk Gõychea Ghor Khatean lokachi khett zata mhunn halinch ami disaleancher vachlam.



Durig naslolim ghoram huske mekllim ugti soddun adlea lokamni bhirante vinem dis sarle. Chukonn keddna-i ganvant ek chori zali zalear, ghorcho bedi bhailo chor, hem lok mhonntalo ani chôr konn te lokak rokddench ghomtalem. Ganvant khoinchea mon’xank choriecho hat asa hem ganvcho lok zannam astalo. Chori zali mhonntoch tea-tea mon’xank ganvche vhoddil vichar kori ani sarki zap mellona tednanch pulisent kagall (complain) nond kori.



1960 doskent jednam hippie lok Gõyant yeunk laglo tednam pordexi bhonvddekar Gõychea soimbik suropaek bul’lo. Lohu, lohu korun tannim herank kolit kelem. Dorya kinarer lhanxim shakam ailim, hotelam bhandlim ani oxe toren Gõy sonvsarik mapar ek bhonvddekarancho sorg zalo. Tourism-a nanvan zaitem bhitor sorot ravlem. Kuddicho dhondo vidhexi ghore khaticho lok ugtea mollar cholounk lagle. Night life asunk rave party vikallea vogddamni (drugs) suru zaleo ani night bazaar ani flea market hi funkea sovai mouja polloupak desi tourist bhitor sortana sabar toreche tovnaxi monis, chôr, kirmidor bhitor sorle ani atam akantvadi.



Adim Gõychea disaleancher sumanank vo pondroxik ek motoricho akxident zalo mhunn vachunk melltalem. Mhoineank ek motti chori zali zalear paperancher chappun yetali. Doryant buddon vorsantlean eklo melear borem aslem. Ani krim mholeli zavop mhonnchem ek vhodd bhirankull gozal Gõybor ghaztali ani thoddo lok mudd’dom tea-tea ganvant vochun odik mahiti ghevn yetalo. Punn atam dhor disa potrancher lhanxea Gõyant dha-bara obseag ani tatunt 4 mornam. Chori zatat tacho hixeob na ani chôr pulisank mellonant. Doryan buddon mornnancho dor vorsak ankddo choddot veta, ani kirmi ani inosent ostoreancher bholatkar adim kallokant zatale, atam dis-uzvaddan zatat tem vachun ang xirxita. Fattim Sao Jose Areal ganvant konn eklea iskolachea bhurgeak zobordosten riksant ghalun vortale to tanchea chopkeantlo vatovlo. Dusrea rajeantlo lok vo on-Gõykar Gõyant vaddot veteleant voir nodrek haddleat teo bhangoddeo disa-dispottim atanchea potrancher chhapun yetat.



Ghorantlem vahan (vehicle) bhair gheun ghelolo monis amche rosteancher nodor ghalear to surokxit ghora porto pavtolo hi guarantee diunk zainam. Ghor bond korun thoddea vellak bazarak vo dhormik khariavollik ghelear bond kelelim daram ghorvaleak automatic yevkar diunk ugti zalolim melltat. Atam lok flat-amni ravunk laglelean khuxik aslolea flat-an dharun kunn zalo zalear melelea moddeacho sosunk zaina toslo vas poddlo mhonntoch sorbhonvttim ravpi xezareak kollta. Ostoreanchea golleantleo vostu, hat-begam faraitat, ani 10 rupianchem magic nott sokoll udoun dhondekarank luttat. Itlem sogott dis-uzvaddan cholta astana amche kaide samballpi pulisank kagall dilear sotasot nikall ditele mhunn bhorvonso na. Ani dhekunuch ghelea sumanant Moddganvche Kamraxim ek ostorechem skustorintlem hand bag gheun pollun dhanvteleachi fattik lok laglo ani taka lagxilea jardinant dorun, ani kaido aplea hatant gheun chorak boroch bodoitoch pulisanchea hatatant dilo.



Novembrache 26ver Mumbai zalelea nixttur akantvadanchea akromonnan 183 zannacho jiv luksonn zale 300 lok zokmi zalo. Hea dharun akantvadeanchea akromonnan Bharot desh halun poddlo ani Gõy surokxea vatten zagrut zalem. Ani dekhunuch hea disamni Moddganv-Khareband, Pornne Nistea Bazara lagim, Vasku- Khariwado, Zuari Nagar, Cuncolim Industrial Estate, ani her sabar zageancher bhailo lok (migrants) ravpeancher pulisamni dhadd (raid) ghatli. Favo te somikoronn (identification) naslolea mon’xank dorun bond keleat tanchi koddok choukoxi zateli vo nam ho Gõyche porjek husko zala. Ani tea khatir pulisancher visvas naslolean atam Gõychem porjen armam-pistolanchim porvongi magunk Ghor Khateant orjo keleat. Mumbaiche ATS Chief Hemant Karkare, Vijay Salaskar, Ashok Kamte hea unchlea odikareamni aplim kamachim pistolam akantvadeancher upeog korunk bhair kaddlelim tednam akantvadeanchea AK 47 armamni tankam sasnachi nidh dili. Gõykar aple surokxe khatir pistolanchi porvongi magta to nhoi akantvadeanchea AK 47 fuddo korunk punn voir thavn lottun yetelea (thoddea Amdar-Montreachea axirvaddan) bhailea chor, kirmidor ani tovnaxi mon’xancher upeog korunk vo tankam bhirant diunk.



Armam-pistolanchi porvongi khoreaninch favo tea mon’xank divnchi oxi sorkarak vinonti kortanam, favo nhoi tea mon’xanchea hatant poddchi nhoi mhunn xiddkaitam.



Konn eklo fattim ap-raknne (self defiance) khatir pistolachi porvongi mellunk orj boroili Lagu zatelea odhirean tachi orj-portr topaslem.



Amdar……………..Nam

Montri……………..Nam

Khasdar (MP)……..Nam

Mamlatdar……… ..Nam

Zila Parishad………Nam

Sarpanch…………..Nam

Dhondekar………...Nam

Bhattkar…………...Nam



Orji ghetelean taka vicharlem “Tum Amdar nhoi, Montri nhoi, Khasdar, Mamlatdar, Zila Parishad vangddi, Sarpanch, Dhondekar, ani Bhattkarui nhoi. Zalear tuka pistolachi porvongi kiteak zai?”



“Mhoje sasumaink mhojea ghorant yevchi bond korunk” Odhikarachea dolleank polloit tannem soroll zap dili.



Lino. B. Dourado

http://groups.yahoo.com/group/gulf-goans/message/22609