Nhidant Amcho Atmo Kuddi Koddsun Pois Zata ?

PRESENTS

AITARACHEO KATKUTLEO

Lapitt 

 

 

                  Amchi Nhid, Amchem Mornn Ani Amcho Atmo

 

Nhidant Amcho Atmo Kuddi Koddsun Pois Zata?

 

Ami sust nhidlole astona, amcho atmo amchea kuddi koddsun pois zaun eka dusrea ojeapeanchea sonvsarant amkam pavoita. Hea khinant ami sopnant astat kivam amkam sopnam poddtat oxem amkam nischit dista. Hea mhojea zannvayen tumkam kitlem sot distolem tem hanv sarkem sangunk nokom. Punn ami nhidlole astona, amchea toklolea jivak  suseg mellunk vo divnk, amcho atmo kuddintlo bhair sorun Rochnnar Bapaxim veta. Tannem portean, amcho atmo amche kuddint dhaddlo tor, ami zagrut zatat nam tor amchi kudd atmea vinnem sansnank tata vo meleli zata.

 

Zaite pavttim chaltea utramni mhontat: Tachi nid, eka melolea monxa porim. Thoddea vellachem mornn, nidlolea monxache kuddik mellta mhunn, bhov thodde lok sot manttat. Dekun, borem mornn favo zaunk nidunk vechea adim choddxe magnnem korun nhidtat.  Novembrache 2^rer meloleancho dis (All Souls Day) kiteak paltat?

 

Mhonnctoch, Kristi somudai atmo morona mhunn hem sot manop korta. Amche jive kuddint, atmo asa. Ani taka ami svas (breath) mhonntat. Ani ho svas bond poddtokoch amcho atmo amche melole kuddik soddun Rochnnar Bapaxim veta. Ani tea khatir hanv, sodanch; hanv nnov vorsancho astona mhojea tticherin xikoilolem inglez magnnem mhunnon nhidtam:

Mathew, Mark, Luke and John, Bless the bed that I lie on. Four angels are round my bed. Two are at my head and two are at my feet; one to watch and one to pray. And two to carry my soul away.       

 

 

Melea Uprant Kuddintlo Atmo Khoim Veta?

 

Ho ek proxn sodanch mhaka gondollant ghalta. Khoreaninch amcho atmo nimnne zhoddte meren amchea kuddi sangata astolo vo nam? Melole kuddi sangato atmo-i sust nhidun zhoddte disa zagrut zata kai? Zait ghoddie, amcho atmo kuddintlo bhair sorun Devachea rajeant bhouch unchlem sukh sontos bhogunk veta. Kiteak, Devan rochlolo atmo ken'nach koxtt ani nhi mhunn vollvole sonschona ani melole kuddi sangata kusona.

Povitr Pustokar ani Povitr dhormik pormonnem, monis melea uprant tacho atmo kuddi sorxilo pois zata. Jezu Krist khursar prann soddchea adim oxem mhonnta: Bapa, Mhozo atmo Tujea hatant Hanv sompun ditam (Luke 23:46).

 

Him utram nivol sangtat, Jezu melea uprant Tacho atmo Tachea kuddintlo pois zaun Devachea hatant pavlolo mhunn. Jezu uprant, poilo Kristanv martir Istevak fatramnim martale tednam tannem oxem magnnem kelem. "Somia Jezu, mhozo atmo Tujea hatant ghe." (Dhormdutancho Itihas 7: 59)

 

Kaim ghosti kholl khollayen niyallear, orombak thavn atmo aslo. Ani to Deva sovem aslo ani To atmo, Dev aslo. Devan, mon'xak dhull matiecho rochlo ani taka svas ditana, apnna sarkelo atmo tagelea dhull-matiechea kuddik dilo. Povitr Pustokar vachunk mellta. "Parveachea rupan sorgar thaun Atmo denvlo ani Tacher tharlo to hanvem dekhlo” Juanv Batista-chea hatantlean, Jordan nodixim Svami Jezu snan ghetana. Juanv Baptistan ajir aslolea lokak sanglem.

 

Khorea orthan, jea mon'xak apnnale jive kuddicho mog asta titloch kuddik jivit ditolea atmeachi apurbai taka asunk favo. Punn ami monis, urfatem kortat.

 

 Lino B. Dourado  

www.goa-world.com

 

    Lapitt

 http://aitaracheokaskuleo.blogspot.com/