Aitaracheo Katkutleo: Paulo, GWS Mhonnchem Kitem?

Aitaracheo Katkutleo: 

          Paulo, GWS Mhonnchem Kitem?








Bhair tor dhull ani gormi. Kuveittan 50 degree Celsius gormencho kantto voir  sorlolo astona ghorantle bhair sorop mhonnchem tapsanicho funkea tap (fever)  angar ghevop. Mhojea oslea zantte pirayer pavloleanim, dhull ani vottache dhoga koddsun pois ravlear anink thoddim bhov vorsam sonvsari jivitantli favo zait.
Sunkrar! Kuveittan bhouxik sutti. Donparchem jevonn zatoch thoddobhov visov gheunk bed-ir addvo poddlom. Nidh lagli mista. Ani te nidhent kedde vhodd mhunn sopon ga! Bhouch vhoddlem sopon tem. Tumkam sanglea viret mhozo jiv dorta?

Atanch sangtam Kuveittantle famad Inglish potrancher ek jahir khollovni porgot keli. 'Konkani  Summer Classes'. Iskolachea bhurgeank hea disamni sutti mhontoch, Kuveittan thikann korun aslolea Konknni avoy-bapaichea bhurgeank Konknni path fukott xikovpak ani Konknnicho mog Goychea bhurgeam modim vistarunk mhaka ek urbha aili. Zaum tem Canada , Australia , New York ani her desant kaim ap-khuxen
vavurpi fuddem sorun bhurgeank Konknni ulounk ani borounk xikoitat. Ani oslea somajik vavurpeank, thoimsorle Goyche somudayeche fuddari (Goans community leaders) asat te, tankam arthik (financial) mozot kortat. Zaum tem baddean ghetlole klas-rumank ani bhurgeank khana-pivnnam (refreshment) adi ., adi.


Tachem bhaxen hanvem korchem, oxem mhaka dislolean hanv fuddem sorlom. Mhaka dislem choddan chodd panch tem sov bhurgeancho avoy-bapui khuxi dakhoitolo. Pollevnk ghelear, tis odik bhurgeanchi volleri lagloli pollenv mhojer akant. Ghorant tor panch tem sat bhurgeank zago aslo ani nhoi tisevoir. Kortolom kitem?


Konnem tori eka xannean budh dili. Don Bosco mhontlolea iskolachea vhoddilak sompork (contact) khor ani mhoji khuxi uktay. Ani hanvem toxem kelem. Mhoinombhor iskolacho fukott vosro mell’lo.


Konknni vorg suru zalear sumar podra dis odik zal’le. Bhurgeank hanvem mandde-dulpotam, bhogktti gitam, poromporik gayanna xikoilim zalear, kovita, nibond (essay), mottvi kotha ani her borpavoll koxi vachunk-borounk zai tem, tanchea mostokan sarkem boso meren xikoilem. Goykar ekvottan jiyelear kitlem porian eka khoddpar ghott ravun akhoch sonvsar jikunk zata tem, Otumbrache 10ver , 2003 vorsa 'Kuwait Goa Day' 'Yadostik'-ar (souvenir) chappun haddloli kovita 'Goenkarancho Ekvott' vachun dakhoili ani ekvottachem mothv tanchea tornnea gineanar cheppun ghatlem. Irlem-irlem korun Konknni ulounk ani borounk noko aslolim bhurgim Konknni vachunk-borounk xiklim mhunn, bhurgeanchea vhoddilam
koddsun disantlean fonar fon yetale tachea velean mhaka kolltalem.


Aiz tor hanvem ek general knowledge oxem kitem tori vixei ghetlolo.


“Bhurgeamno! Tumi zannant Kuveitt desan Goykaranche zaite klub ani sonstha asat.


Lamb nanvam aslolea klub/sonsthechi nanvam, sonkxepan (abbreviation) vo dusre bhaxen short form-an ulek korunk xikoitam Dekhik: United Club of Utorda-Kuwait hachem short form UCU-K zata. KIFF mhonnchem, Kuwait-Indian Football Federation.


Somzolim mhu tumi? Bore tor. Atam hanv tumkam vichartam. Hummm! ladies first.


“Mhaka dista, mhaka dista. Kuveitt Konknni Klas”


“Na, na na! Sarkem na! Bore tor. Klu (clue) ditam. Hem ek kendr. Somzuya, Konknni kendr. Atam sangat. Bhouch lagim haddleant tumkam”Choutea bankar boslolem Verona-n hat ubarlo ani mhonnlem “Mastor, KKK mhonnchem Kuwait Konknni Kendr”


“Karekt! Verona bayen sarkem sanglem. Ek sang, itlem vegim tuka koxem koll’lem?”


“Mastor, tumi klu dil’lo. Konknni Kendr mhunn. UCU-K ani KIFF hanchem K okxar Kuwait zata zalear KKK-chem Kuwait nhoi?”


“Borem huxar mure por? Tallio, tallio.”


“Kaytan, atam tuka vichartam. KGTS mhonnchem kitem?”


“K for Kuwait , Kuwait , Kuwait , Kuw…”


“Arre, kantar gaita vo..”


”Mastor, klu di nhi?” sovea bankar bosun aslolo Duming boballo.


“Borem. Hi ek tiatristanchi sonstha. Atam sangat”


“Mastor hanv sangtam”, laginch aslolea Lorry-n hat ubharlo. “KGTS mhonnchem, Kuwait-Goans Tiatristanchi Sonstha”


“Va, va, va. Huxear por! Mottean talio marat. Ek sang Lorry. Tuzo konn tori ghorcho monis hea sonsthen tiatrist asa?”


“Na mastor”,


“Tor tuka koxem koll’lem?”


“Mastor, tunvem klu dil’lo tiatristanchi sonstha mhunn. Mhonntoch, K-Kuwait zalem ani Goykara bogor hereank konank mhonntat tiatrist? Goans, hem utor zhoddun KGTS mhonnchem, Kuwait-Goans Tiatristanchi Sonstha zalem nam?”


Me and my big mouth. Hanvem monantuch gunngunlailem. Zalem zalear sarkem foddun divop? Mhoje osle mastor aslear bhurgim napas (fail) zaunk aileant?Atam hankam agvodd vichar korchoch poddlo.


“Bhurgeamno! Tumi kednai tori chukun perim grounddar futtbol khell pollevnk gheleant astolim. Thoinsor DHL Worldwide express boroiloleo bond ghaddio polleleat asteleo. Sarkem? Toxem tor, DHL mhonnchem kitem? Tum. Oi, oi tum Shabu. Hanv zannam tum too sharp vo very quick zap ditolo mhunn.”To eksarko khol chintnamni poddlo. Tachi tokli zhodd zait gheli.


Dolle pittpittait mhontlem. “Mastor, DHL-ant ‘K’ na mure re”


”Humm! Somzolom. Borem asa. Klu ditam. DHL ek courier service. Thomas Nationwide Transportation vo TNT asa te toren. Punn hi DHL courier service tegam ixttamni ektthaim zaun sthaplea. Tegaimchim nanvam zhollun DHL kelam. Atam tori sangat”


Thoddo vell voggi ravun pollelem. Bhurgeanchi zap nam ti pollevn hanvem mhonllem.


“Konnuch noko? Kaim nozo. Kadenar boroiat. DHL mhonnchem Dalsey, Hillblom ani Lynn . Borem tor. Fuddem vichartam tachi zap tumchea thaim astoli mhunn mhaka khatri asa. GWS mhonnchem kitem?” Klasin soglea von uchayen aslolea Ghaspaerik vicharlem.


Ghaspaer goddgoddlo. Klasintlea zonelanleant bhair nodor ghalit tannem mhonllem.


“Sorry mastor. Hanv nokom”


“Wilshan, tum tori zannam GWS mhonnchem kitem tem?”


Taka tekhun aslolea Suria-cher tannem nodor marli. Suria-an tokhli haloit na vo apunn noklo mhonn hixaro divn Wilshan-ank kollit kelem.


“Mastor, khub agvodd vichar”, Wilshan-an mhontlem.


“Xi baba loj bextti! Hi ek Goykarachea boreaponnachi sonstha. Tumi Goykar avoy-bapaichim bhurgim zaun GWS mhonnche, nokot? Tum re Shantush. Tum zanna zalear sang”


“Mastor”, pois konxeak boslolo Paulo utthlo. Gelea pondra dis, hanv taka polletam. Jitlem hanv klasin xikoitam titlench ekar-ek to aplea kadernar (note book) nond kortalo vo boroitalo. To futtbol khellant bhouch huxear mhunn hanvem aikolam. To mhaka lagsor ailo ani mhontlem.


“Mastor, nigtench proxn vicharlole bhurge, zaun asat bhav-bhav”


“Khorench? Hanv noko aslom”


“Mastor, tunvem survatekuch tumgelea 'Goenkarancho Ekvott' kovitevelean ekvottachem mothv amkam xikoilam. Veg-veglea zagevele DHL ixtt ektthaim yeun ek mozbutt yexvontt 'courier service' sthapunk zata zalear, hea amche tegui bhav fuddarak vhodd zatoch aplo kimticho thoddobhov vell Konknni somudayek dilear ek koddegant Goykaranchea boreaponnachi sonstha sthapunk zatach. Ani dekhunuch mhojea motan, GWS mhonnchem, Ghaspaer-Wilshan-Shantush zaunk zai.”


Paulo-chi xanneponnan borloli zap (?) aikun bhurgeamni iskolacho vosro gazosor nettan tallio vazoileo. Ani tankam somadan kortam mhonllear mhojim tera vazlim.


“Nam-nam-nam. Sarkem nam…GWS mhonnchem…..”


“Oi-oi-oi. GWS mhonnchem, Paulon sanglam toxem”, bhurgim aroddlim


“ Nam - nam - nam”, hanv


“Oi - oi – oi”, bhurgim


Nam, oi, nam, oi, nam, oi kitlo vell chol’lem ti mhaka khobor nam. Jednam darachi bell vazli ten’na mat mhaka nidhentli zag zali.






Lino B. Dourado
http://www.goa-world.com/

1 August 2010

* * *
Encounter hints (and more) of the Goan life in Zanzibar, Poona, Mombasa, Basra, Dubai, and even Nuvem andColva, Sanvordem and colonial Goa. Learn of experiences that shaped Goans worldwide. Selma Carvalho's *Into the Diaspora Wilderness* now available at Broadways Book Centre, Panjim, Goa\
[Ph +91-9822488564] Ask a  friend to buy it, before it gets sold out. Price (in Goa only) Rs 295. http://selmacarvalho.squarespace.com/

AITARACHEO KATKUTLEO: Aga Dukhra, Vittailem Muga

AITARACHEO KATKUTLEO:
Aga Dukhra, Vittailem Muga             



Jevnachea mezar voilo-poilo zago tum muga dhukor, chukoinastana gheta.Tonddank udkam haddtole tujea ruchik masache jinos aslea viret porbechem mez sobhona, odik korun festankar Goykaranchem. Jivo astana tum bhurxo asta khoro, punn tuka marlea uprant, gostan tujem mas khatana tuji voddvik uloilea xivai konnachoch soromb sompona. Tujea masachim poramporik chevrisam, her zon’vorachea masak sor korunk zainant, hem tor sot ani sotuch thartolem. Dekhunuch, ak’khea sonvsarak tum famad. Ek Konknnilean opar asa. Dhukor posunkui vhellear roddta ani marunkui vhellear roddta. Punn hea disamni tum roddonastana, tujea koddsun ail’li swine-flu dovdiri pidda akh’kea sonvsarak roddoita muga.


Lhan astana ami aikololem. Goyant aslole dhukor zatik May-Junh mhoineant ek pidda zatali mhunn. Ani ti pidda chodd korun kazum pikechea disamni kazu-pudde khavpak ganvantlim dhukram dongurlear vhetalim tednam tachem thaim ran’votti dhukram (boars), ghorchea dhukrim kodde som’bond zodddun piddeche zontu (virus)ditale khoim. Ani tech dhukrim kodde ghorche pelvont sologamni sombond zoddtoch tankam zontu lagtalo ani te menge koxe zatale. Magir ge!!! Dhukrancher duens ailam mhunn boball zatalo ani kaim disam uprant porot ganvchea festanchea nanvan, dukhranchim mornnam zatalim.

Bhat-bhens vo anik kosolai kharanank lagon zhogddem-kestanv pettlem zalear, kaim lok ragachea vellar ‘tum dhukrachea kastacho’ oxem mhonnon aplo rag-kirodd kaddtale ani atam kitem kai mhollear ‘you bloody swine-flu’ mhonnon kestanvam choddoitat. Adim soireank, ixtt-mittrank jevnnank amontronn dilear ‘dhukrachem mas-sorpottel’ astolem kaim mhunn vichari punn atam ‘swine flu’ na zalear partek dilolem amontron, svikar kortat. Eka kallar gostan tujem mas khavpi lok, atam tujer sapuch bejarla ani vittela mhunn tuka ugddas korpak, tujem ruchin mas khatolea, mhojea osleank vaitt dista.

 Atanch nhoi, jednam survatek prithum ani prithumicher jiv rochtolea Rochnaran dhukrak rochlolo ten’na thavn xirap asa. Dusri Somurt-in (Deuteronomy) Adlo Kororan dhukrachem mas khavchem nhoi ani melolea modeak hat porian launcho nhoi mhunn xiddkaileat. Ani Novea Kororan mon’xancher bosul’le devchar bhair sorun dhukramni rigle ani dhoryan vorun buddoun marle, oxem amkam St. Lukas-a vorvim kollta.


Yeo-yeo…!! Ge yeo..!, avaz dilear, xetantlo roilolo vepar chorun khatana to soddun, ulo martoleak pall divn dhanvun-dhanvun ghorantlem nigut dhonn ani uril’leo vostu khavunk beg-begim yetalo. Punn atam ganvbhor khochro (garbage) tuka melltolean ghorchea nigut khannachi fikir na. Ani te khochreant kuslolim ghann martolim khanna khavun tujea pottant aslole piddeche devchar challvolun Amerikent ani Europi desant poddlole ‘swine fly’ pidde toren Goyantui toslich pidda lagot mhunn bhirant asa. Ani tea pasot....


Amchea Goyant khubxea ganvamni dhukrank postat. Saxttintlean ani Bardesan chodd Kristi lok aslolea ganvamni dukhramchi zat chodduch dista vo asa. Chodd Hindu lok aslolea ganvamni thoddim Kristi ghoram asat ani bhov thoddea lokangher dhukrank postat. Adim thavn ani az meren amchem Hindu-Kristanvanche m natem bore chol’lam. Punn atam mhaka ek vhodd husko zala. Mhojem mon mhaka sotoita ani Goykarank ani Goychea sorkarak zagrut korunk vinonti korta. Hey Dukhra! Zori tor tuji swine-flu pidda Hindu vattarantleant suru zali ani ti zoddar poddli tor, Hindu bhav-bhoinnam Kristanvancher ragar zatolim, ani tuka lagon itlea vorsantlem amche borelem natem piddear zait zalear, khub vaitt zatolem. Dekhunuch, hanvem khor nichev korun ani soglle vichar mhojea mhorean dovorun xevottachea panvddear ailam. Ekuch urlam.

Mhoji yevzonn sorkari Bholaike Khatem odhikaranchea nodrek ghalcheli. Havem toyar kel’li yevzonn mhollear, Goybhor dhukranchi sonsot asa ti natak korcheli ani devchari swine-flu pidde koddsun Goychem vattovoronn nigut samballpachem. Konnacho virodh asa?
 


Lino B. Dourado
http://www.goa-world.com/

May 10, 2009

Goa World Super Goa (em Português) TGF Writers' Sketchpad http://www.colaco.net/
www.goa-world.com/goa/ music/ - The Online Music Station for KONKANI
THANKS TO ALL FOR YOUR PRAYERS http://www.jrsbible.info/bible.htm

EXPRESSIONS - THE FLOWER SHOP http://www.goa-world.com/expressions/

AITARACHEO KATKUTLEO: AXA DIUM NAYE

 
AITARACHEO KATKUTLEO: 
                     AXA DIUM NAYE 



Lapitt mhunn kitem kortolo?. Pavsan tor sarkench netan dhorlam. Ghos-ghoxo khorit zhoddot ravla. Suman sompun ghelem. Sukallo hova (dry weather) Gõychea mollbacher disloch na. Atth dis suriyan Gõyche dotorer apnnalim kirnam fankarlelinch nant. Disacho pavs, ratcho pavs. Pavs, pavs pavs…




"Don dis zale tum kompuittorak veng marun boslolo polletam hanv. Soperan soup ghalolo to thondd zait veta. Itlem sogott internet-ar kam’ koslem?’




"Mhagelim kama hea pavsan addaileant nhi ge? Vell koso sarum? Tum asa ti kuzin gheun boslea. Mhonntlem, yahoo chat-ar boslear borem."


"Punn soglo vell chat-ar? Itlo khas ixtt konn gavlo tor tuka?"




"Chat sonspotam-sonspotam ek Gõykarn tornatti cholli online-ir gavli. Tinnem mhoji pirai vicharli ani hanvem sanglem 26 vorsam."


"Kitem? 53 vorsancho zodd’dean 26 vorsam sangun koslo tir marlo tor?"


"Age mhoje baile, zori tor mhoji kori idad tika sangleli zalear, tuka dista ghele don dis ti mhoje thaim chat korteli asli mhu? Tichi sukha-dukachea khobramni mhojem fottkirem tel votoun odik tika fulo’it ravlom. Ani ti apnnalea kallzantlem vonkit ravli?"


"Ho koslo khell? Ani ti tuka sodunk aili zalear?"


"Koxi ietli? Hanvem mhozo ganv nhoi mhunn mhojem khorem nanv dilelem na. Tinnem apleak mellunk mhaka amontron dilem ani hanvem bexttench Moddganvchea jardinant mellta mhonnlem….", to anink kitem tori fuddem sangunk vetalo teddnach darachi bell vazli. Ani ugtea aslelea darantlean xezarchem Clementina bhitor sorlem. Sogttech khuxeal distalem.




"Bai Clement, az tum okosmat ghora?" Donparchea vellar poilech pavttti offisantlem ghora ailelem polloun Lapittache bailen vicharlem.


"Aunty, tum sodanch mhonntali nhi ge? Ek boro bhurgo polloun kazar za. Ani az hanv, taka (vach nhovreak) pollounchi asam. To mhaka mellcho asa. Avoy-bapaicho ektoch put khuim to. Benkin kam’ korta. Tea bhair tacho lhanso import-export dhondo cholta."


"Novea bhurgeachi vollok khuim zali go bai."

"Don dis zale. Hanv yahoo chat-sonspotana mhaka ek Raymond nanvacho 26 vorsancho
tonatto mell’lo ani tannem az mhaka…………….."



"Moddganvchea jardinant mellta mhonn sanglam astelem." Tachem sompche adim
Lapittache bailen mhonnlem
"Age! Tuka koxem koll’lem?" Clementinan ojapun vicharlem


"Onkolachi ani mhoji poilich bhett Moddganvchea jardinan zaleli tacho ugddas ailo mhaka", Lapittak polloit tinnem mhonnlem ani fuddem uloili, "thoddeank aslelem naka punn sandlelem zai. Hi ghost tuji zali bai."


"Aunty, tum oxem kiteak mhonnta-i?

"Tujea morean unchlem xikop ani bori nokri kortele novreank haddun tuje avoy-bapain dovorlele punn tunvem te osle ani tosle vo tancheo ‘kedio’ kaddun noikarleat. Ani yahoo chat-ar sampoddleleak tum lagim korta to, konnank khobor to kitlo zodd’do poi to." Lapittak poiloit tinnem mhonnlem. fuddlem pavll uklim na. Ani tech khatir hanv tujexim aileam. Poilech khepek
mhaka yahoo chat-ar mhojea vicharank dhados zapo mell’leat ani mhaka zai aslolo
novro vo fuddaracho ghorkar melltolo."

"Bai, ek sangum……….."


"Sang aunty. Tujem utor hanvem keddnach sokoll dovorlelem na."


"Hem! Kitem tem? Ham! Internet yahoo-bahoo chat mhonntat tem zaitea zannank trasant ghalta mhunn hanvem potrancher vachlam. Ani toslem tujea sovem ghoddo na zaunk uncle ani hanv magttat." Tiddkechi nodor Lapittacher ghalit tinnem mhonnlem

"Mhaka puro visvas asa mhojea yahoo chat-a velea ixttacho. To mhaka mellunk ietoloch. Tumcho axirvadd gheun hanv vetam" ani sogllo bhorvonso dovorun tem bhair sorlem.


Lapittachea pottant bara vazlim. Atam tannem bailechi CD aikochi asli. Ani fuddlea tuffanank fuddo korcheak tannem mottoch kajucho peg glasant ottlo. To ghollea sokoll denvoilo ani ietelea moddak fuddo korit ravlo. Punn tinnem zap kaddli na. Monneaponnan ti aplem kam’ kuznant kori. Lapitt ghuspolo. Vag koxi angar ievpi bail az mendreachea rupan? Hem taka vichitruch koxem laglem. Ti khorench ragar asa vo na ti pollounk tannem mhonnlem.


"Clementina nodre mukhar tunvem mhaka lojen ghalunk na. Fattle don dis yahoo chat-ar tacheo moskoreo korpi hanvunch aslom oxem sangonastana dovorlem.


Kiteak?"


"Kitem sangchem aslem? Mhojem moddem?" Tinnem damun dovorleli tiddok sodoll keli. "Tuka ani mhaka vhodda visvasan ani respetan vengoita tem. Tuji lapittponnachi kornni tache samkara haddun tagelo visvas amche velo thoddcho aslo? Sodanch tem tuka, aploch zal’lea vorim polleta ani tunvem dil’leo bori buddi (advises) apnnaita. Adle zanttele pavsachea disamni bhonkanvanchea umbrear bosun ghora samkara rostean vetelea lokak polletale. Vollkicho dislo zalear zapoitale. Thodde pavtti ganvant konn boro na vo konnagher kitem xizta tem
bolkavant bosonuch purai ganvchi khobor gheun aplo rikamo vell sartale…….."


"Kiteak, atanche zanttele bolkanv soddun kompuittorar bosun suklolea rogt-xirank glucose divchelem kama kortat. Are, tunvem tea porak naka zalelem sangun, axa dilea. Ani tich axa gillun tem Moddganv ghelam. Zoxem hanv aikotam internet chat mhonntat tem khubuch lokak trasant ghalta mhunn. Ani az khoreanich kollun ailem mhaka."


"Age , mhaka khoim khobor wrong number-ar mhojem chat aslem mhunn?"


Kompuittor mhonntat tem saddon eka borea kamank upeog korchelem. Ani tacho be-upeg (misused) kelo zalear monis trasant poddta mhunn az hanvem khas mhojea ghorkara koddlean xiklim. Mon’xan, ji vost apli nhoi te vostuchi axa korum naye.

 Ani toxench peleak axa dium naye. He nem’ amchea tthovancher (principles) add vetat. Tuje bhaxen anink kitle monis……….Hem kitem korta re tum? Key board-ar type kortelea porim mhoje kule chidditta " Tika boddboddchi ogi korpak hoch ek sompo upai aslelean, ti uloit astana, Lapitt tiche kule possetalo.


"Bede-bede-bede korit ‘kansar’ zalea poros, donparchem jevonn zatoch chat-ar ieunk free asteli kai mhunn signal ditalom."



"Uzo lai tujea chat-ak", ani tinnem kuznantlem dar rostin bond kelem. 






 Lino B. Dourado
libado23s53@yahoo.com
www.goa-world.com/goa/poems/

Aug 31, 2008


Konknnintlo borovpi ani kherit toren dor Aitarak internetacher 'Linocheo Aitaracheo Katkutleo' hea nanvan aplim borovpam korpi Xri Lino B. Dourado-chea 'Aitaracheo Katkutleo' nanvachem pustok uzvadda ievpachi soglli toyari zalea. Ho pustok-ugtavnnecho dobazo Utorda ganvchea Lourdes iskolachea vosreant, Setembrache 8ver, 2008 sanjechim 7.30 vaztam zatolo. Hea dobajeak Konknni kothakar ani Sahit'ya Akademicho Puroskar man'kari Xri. Damodar Mauzo mukhel soiro astolo ani tacheach hatantlean pustokachi ugtavnni zatoli. Dobajeak manacho soiro mhunn Dalgado Konknni Akademicho (DKA) Odheokx Xri Premanand Lotlikar hajir astolo. Zalear, Konknni borovpi Xri Jose Salvador Fernandes hea pustokacher aplem ulovp kortolo. Pustok ugtavnne-cho dobazo United Club of Utorda-Majorda ghoddun haddta, ani to sogllea Konknni mogiank ugto asa.

- Gaspar Almeida
http://www.goa-world.com/

Aitaracheo Katkutleo: Lok, Gozali Kiteak Uloitat?

http://www.goa-world.com/
Aitaracheo Katkutleo:




             Lok, Gozali Kiteak Uloitat?


Modlo vell (interval) aslo. Iskolachea kenntinaxim pavtoch mhaka gomlem mhoje 2 rupia compass box-an visron urle mhonn. Klasint bhitor sorlear, roddkulem tondd korun mhoji avddichi ixttinn Luiza, bankar boson aplo uzvo dollo ghonstitali. Klasint anik dusrim vorgmitr (classmate) naslolim. Tichi dukhavoll somzuchem oxem mhaka dislolean hanvem vicharlem tednam, tinnem sanglem.


“Mhojea dolleant kisor (speck) asa tem sokall savn mhaka tras dita. Upkar korun dolleant aslolem kisor kaddpak, tuzo adhar korchi?”


Khoinchea vellar mhonn hanvem tika vicharlem? Anik thoddo vell tichexim pidder kelear kenntinantle gorom-gorom botat-panv mhaka mellchenant asle mhonn, hem hanv zannam aslom. Tea disa ghora kodden kofi borobor khavpak choppatti nhoi mhonn tandlanchi bakri mellunk nant. Upaxi pottar hanv iskolak ailolom. Mhoji avoy xezarche Filomena antiche konna tori mornnachea Misak hajir zaunk sokall fuddench Bettpateche igorjent ghel’li. Dekhunuch tinnem iskolachea kenntinant, modlea vellar kitem tori khanvchea khatir mhaka 2 rupia dil’le.


Orxim 17 chedde ani 18 cheddvam vidhearti asun vorg aslolo amcho. Ami amkanch, klasint aslolea cheddvank vattun ghatlolim. Mhonnche; Agnelo-n Rita-cheo oddchoneo pollouncheo zalear; Carlosan, Irachem voir-sokoll zatoleacho husko asunk zai aslo. Ani oxem toren amchem ixtt-ixttinnichem natem ekdomuch ghott aslolem. Punn Luizacho ankddo cheddvam modim subeij aslolean tem eksurem urtalem. Tichi vrut’ti (attitude) veglech torechi asli. Ticheo moskoreo kelear tika sonso naslem ani tiddketali. Konnam thaim odhik uloinasli. Dekhunuch, mhojea xivai vorgantle dusre chedde tika lagim kori nasle khore, punn her kamanim amkam sodanch Luizacho sohokar melltaloch. Hich tigeli khaxalai asli. Ani mhaka ti kiteak posond lagtali tem viskovttun sangunk, az meren hanv mhakach gospolun urtam.


Amchea dolleant illoso mhell vo anik dusrem kitem-i bhorlear kosli usavoll zata ti ami zanant. Konnem tori funk marchi vo udok marun dolleant poddlolo mhell beg-begim kaddunxem dista. Dusreanche dolleantlem kisor kaddtolo zalear, kaddtoleache dolle poile nigutt asunk zai. Mon’xan, apleachea dolleant patti (log) astanam dusreachea dolleantlem kisor kaddchem nhoi mhonn, oxi kitem tori kisor-pattichi khobor Kristi Povitr Pustokan (Luke:6, 41) amkam vachunk mellta. Luizachea dolleant aslolem kisor ani Povitr Pustokar asloli gozalik sor korunk zai nasli. Hangasor, dukhin kostovtoleachi kanni mhojea mhorean poddloli ani hanvem tika adhar korunkuch zai aslo. Zori mhojea pottak bhuk lagloli tori astanam ghorjevottank ani duentink poilem panvchem mhonn amchea vodhilanim amkam xikoilolem asa.


Ghostun-ghostun thamddo zal’lea tichea dolleank polloun mhojea dolleant dukham ailim. Mhozo dhavo hat tichea bhuzak dorun ani uzvea hatachea bottanim dolleachi paklli ugteo kotanam tinnem apnale hat mhojea buzancher dovorle. Tiche dolleant polloit astanam tigele kallzache lubddup (heartbeats) vaddle. Ani hanv dolle topaspak odikuch tigelea dollea lagsor pavlolom astanam klasintlea bhair varandantlean pasar zatoli tticher Libian-an amkam pollelim ani klasint bhitor sorun vhoddlean aroddli.

“What is going on here? Why are you holding each other? What do you think? This is the place to express your love. Wait! I will complain to headmaster”

“No teacher no. Please! I am helping her” Hanvem mhollem


“Helping? What types of help?


Padd poddlolea ‘kisor’-ak Inglez bhaxen kitem mhonntat tem, tea vellar mhaka yad zainam zali. Eka borea Samaritana bhaxen hanv Luizak adar kortalom. Punn amchi, koslich malis nastanam eka-mekak chitkon bospachi doxa (situation) pollelear somzutoleak kitem somzuchem tench kollnam aslolean tticherigelem toklechem pintt challvololem. Ani hanv tticherichea tonddak polloit Luizachea dolleant funk vo varo marunk zai mhonn mhojea gal folloile tednam tticherik kiteak rag ailo to hanv sangunk nokom. Hanvem mhoje gal poskotea porim motte kelole polloun tinnem mottean mhojea tokhler kutt’ti marli borobor fuuuu korun mhojea tonddantlo varo just Luizachea dolleant boson tika tras ditolem ‘kisor’ bhair sorlem ani sontosan Luizan mhonnlem.


“Thank you Lino. Now I am feeling alright” ani tinnem aplea dolleant poddlolea kisorachi gozal tticherik viskavun sangli. Punn mhoje toklecher kutt marloli ti mat tticherin apli chuk mhonn svikar keli nam. Tticher, Luiza ani mhoje modim choltolo open serial, bhair ravun kaim dusrim vidhearti polletalim. Thoddea vellan kitem tori khavn pottantle chalvollole bhukeche undrank thonddayer ghalunk zai mhonn hanv kenntinant gelom. Kenntinancho dhoni Santan, mhaka polloun hansunk laglo. Hanvem sanglolea proman botat-panv ani cha toyar korun mhojea mhorean dovortanam, tannem mhaka moskoreamni mhollem.


“Klasint, lakdda kuddke sonspotalo mhonn aikolam”


Tticherin mhoje tokhler marlole kuttichi dukh taji asli, ani te dukhicher mangasanvanchea utranim kenntinacho dhoni odik thomble martalo. Chodd vell zaunk nam. Ghoddie 3 vo 4 minutanchi forok. Santanachea kannar poddloli gozal rokhddich ujea agtea porim akh’khea iskolak bhogbhogunk lagli. Ani Luizak nove nanvacho batizad dilo, ‘kisor’ Tichean opman sonsunk zai nasle. Punn aplem dukh ti konnank ugti kori nasli. Oslea vellar tika hanv odik lagim zaunk kori punn tinnem mhaka poisailolo, ani hachem kharann tich bori zanam asli.


Lok gozali (gossips) kiteak uloitat? Aplo rikamo vell kosoi toren sorunk zai mhonn lok khobranchea manddar bostat. Gorje bhair lokacheo gozali ani nanv piddear korop hem amchea dhei (principles) bhailem asunk zai. Konnank tori sokoll ghalpacho ho mukhi hetu monan dovorun thodde lok khobrank survat ditat ani tacho porinnam inosent mon’xachea sobhavacher poddun taka/tika vaittak poddtolem hem mat lokxan ghenastanm apli jib uklit thambonastanam boddboddaitat. Khobranim marloleo fotaxeo teo uprant khoim vochun xirkom. Khobro kortoleank tem mat poddun vochunk nam.


Ani tea vorsa ami sogott 9vi klas pas zal’lim. Abril-May sutti khobar zaun Junhache 7ver, 10vea vorgan bhitor sortanam amchem modim mat Luiza dislem nam. Oi! Koslench sot naslolea khobranim tichem nanvar dhag diun nanv piddear kel’lem. Porot amchea iskolantlea bhurgeank fuddo korun tika zomlem nam. Uprant mhaka kollun ailem tem onath mhonn. (ticho avoy-bapui tem lhan astanam somplolim ani vhoddlo bhav tika polletalo). Odhikuch mhaka dukhlem. Ani mhojim dukhi bhavnnam kolit korunk, Luiza sarkeli ixttinn anink mhaka mellunk nam……….




Lino B. Dourado
(Utorda, Goa/Kuwait)
www.goa-world.com

Jan 24 2009

AITARACHEO KATKUTLEO: Lift Please !

AITARACHEO KATKUTLEO:


LIFT PLEASE !


Ghelea attvoddean Saliganv-Pilerne ganvan ghoddloli ghozal. Gas-cylinder haddunk ghel’le kodden eka tornatte cheddvacher akromon zalem. Tilsamni vellar gas bhorchea dukonnar ubem astona, number plate nasloli tourist taxi thoim thambli, ani motorin aslolea chogantlo eklo desi tourist cheddvachea onkola thaim ulovpan gul’l astona dusre desi tourist zobordosten cheddvak ubarun funkot lift divnk kotpot kortale tech vellar thoim ek ttrok pavun sorlo ani tem cheddum tea dharun tounnaxi tornatteantlea chopkantlem vattovlem.


Halinchea kallar amchea Goyant osle kauz nhoinch tholavea ostoreancher punn bhailea desantlea bhonvddekarancher antre-poirean zatat te ami potrancher vachtat. Amchea ostoreank, bhirant nastonam adle toren Goychea rosteancher eksurem bhonvunk anink magr uronknam. Daddleacho sangat nam tor hatak-golleak bhangar ghatlolea ostoreacher disa uzvaddan chorio ani kunn zatat tednam, Purtugez Salazareche koddok kaide ani hukumecho ugddas yeta. Innocent until proven guilty hea broxttoracher attapun aslole kaide amkam fugar korun martat. Bosichi vatt pollevn astona konnui on-vollki mon’xan lift dita mhotlear, ti nakarpak khubdam potrancher xiddkavnni dil’li astona, thoddo lok funkott mell’loli lift svikar kortat ani uprant naka aslolea trasant poddtat. Punn vhoili gozam mat veglli.


Adlea Goyant surya poddlo mhonntoch kallkhi rostear eksuri chollun vetole ostoreak tigelea ghora porian pavounk ganvant bore Samaritan asle. Punn aichea Goyant ganvchea lokam vonn bhailea lokacho ankddo odik vhaddlolean kallokhacho faido ghevn ostoreancher motte promonnan kuddi ani lingichem akromon zata tem pollelear, kaide ani hukume viret Goychem raj cholta kai dista.


Amche tornne pirayer ami saikolin bhonvpi. 1970 doskean tujea thaim saikol asop mhonnchem tum king aslo. “Hey, mhaka matxe saikolir bosoun vor mure” tuka sarki vollkonam, torui vatten cholun vetoli choli, tuje saikolichi lift mago. Konnagher veta tem vicharun adlo ganvcho saikolkar, surokxit taka/tika tanchea soireanchea ghora pavoitalo. Saikol aslolea mon'xam thaim sezarcho lok boro astalo. Posrear vochun vostu haddpak vinonti kori ani tarvotti onkolachi bail aslear “baba tum ek cold drink piye ham” oxem sangun tuji posreaveli trip funkot vochunk dinasli. Xezarchea cheddvanchi amizad tujea sovem dupett zatali. “uxir zata mure. matxe bosik/trainink pavoi re. Bab boro.” Ani zaitea zonnank saikollichi lift borich faideachi zaun, saikolivelo mog kazari jivitachea bandpasan ghott zal'lo, hem ami dollebhor pollelam.


Adim keddea ganvantlea bhitorlea rosteancher, atanchea bhaxen Kadambha bosio choltat te toren private bosi cholonasleo. Bhitorlea vaddeantlea ganvchea lokak bosik yevpak-vochpak khub cholchem poddtalem. Rostear saikolkar dislo zalear, tache thaim lift magun uskea mekllean saikolir boso. Koslich malis nastona saikolkar zababdaren saikol choloitalo ani lift dilolea mon’xak, bore toren surokxit tichea vo tachea zagear pavoitalo. Punn atanchea kallar soglem urfatem dista. Ganvchea vadd-vaddeamni upott iskutor ani motor-gaddi zaleat. Atanchem jivit chodd sompem zalam. Cholun veche vatter posrear vochunk skuttor zai poddta. Igorjek vetolo zalear motori xivai zainam. Punn xezareak konn tori duent poddlo ani tujea darar marlem tor tea vellar mat tuje skuttorin vo motorin petrolacho unnav zata.


Vattsuro lift magtta tednam, tuji skuttor vo gaddi tamboun poilea svater to konn ani khoim veta ti sodpus korunuch lift divnchi. Goyant chodd lok bhailo zalolean, vattsurean hat dakhoilo tor, don-tin pavtti chintun tunvem thambchem asa. Thodde pavtti motor vo skuttorichi lift magtolo monis koslea sobhavacho tem ami nokllo astat. Boreak ghel'le kodden fattir poddtta tosleo-i ghoxtti zatat. Ghoddie to vo tem ek kunni, chor, atankvadi, provodari ostori vo anink kitem zaum xokta. Trasant poddchea adim on-vollki mon'xank lift nam divop odik borem zatlem, hem mat mhaka monamposont dista.


Colva praayer beat show aslo. Vaddeantle bhurgeamni saikoli ghevn thoim vechem aslem. Konna thaim saikoli nant tankam saikolir lift dinvchi ani oxe toren ami sat zonn, char saikoli ghevn vospache toyaren astona okosmat mhoje saikolik fur poddlolo pollevn hanv niraxi zalom. Vell zatalo. Mhaka lagun heranchea beat show-achi urbha bigoddloli naka dekhun, hanvem tankam vochunk sanglem. Ponchar zalolea tubak fur marun beg-begim saikoilichim peddalam marit Berpatte Khrisnachea posreaxim pavlolom. Konn ek cholien mhaka hat dakhoun lift magli. Goddie zait hivui mhoje toren beat show-ak veta astoli. Tika mhoje saikolir bosoili.


Amchea ganvcho ek tarvotti mhojea fattlean Rajdhoot motor-saikolin yetalo. Tannem mhaka pollevn motor-saikol slow keli ani mhontlem. "tum mure Lino. Khoim veta? Ani hem konn re?", mhojea saikolir boslole choliek pollevn tika vollkotolea porim tannem portean mhonnlem. "Aago tum go? Hey Lino. Korpoi, korpi", oxem mhunnit tannem aplea motor-saikolichi gotti choddoili. Tea vorsak sanjechea vellar cheddo-cheddum saikolicher borobor dislim tor 'korpoi-korpoi' hem utor mhonnpan borench famad zal'lem. Tem kiteak zal'lem ti mhaka khobor nam. Ghoddie zait hench monant dorun tea tarvottean mhaka mhonllem asot. Punn mhoji zababdari asli tika hanvem surokxit Colva praayer pavoipachi. Ani hanvem toxem kelem.


Don disam uprant to tarvotti tachea ghorkanni sangata mhaka posrear ghavlo. Tea disa mhoje saikolir bosloli choliek hanv vollkotalo kai mhunn tannem mhaka vicharlem. Tika vollkona ani vollok korun ghevnchi mhoji itsa nasli mhunn taka sanglem. To dis Aitar aslolean ani tea vogtar tea vatteatlean bosi naslolean, tinnem mhojea thaim Colva praayer meren lift magli mhunn taka kollit kelem.


"Arre tem cheddum sarkem nhi. Eka vorak 300 rupia gheta", posrear vostu vorunk ailole lokam uzram tannem mhonnlem.


"Tuka koxem koll'lem? Tunvem ken'na tori 300 rupia hea adim, tika farik keleat?", tachea ghorkanni uzram mhozo ulot vichar aikun, taka motti loz zali.


Mogacheano, tea disa on-vollki choliek hanvem dil'li lift-ik lagon tea tarvotteak katkutleo zal'leo teo, ken'na-ken'na lift bangoddecho bhatmi paperancher vachtoch, yad zata.


 
Lino B. Dourado
http://www.goa-world.com/


September 4, 2010
 
 
[As archived by gaspar almeida, http://www.goa-world.com/]