Poonam Pandey-chem Vingllem Chitr

PRESENTS AITARACHEO KATKUTLEO Lapitt Poonam Pandey-chem Vingllem Chitr   2011 vorsa Kriket Vivx Kop Bharot ttim jikhlear, tust thoknay korunk, vingllem zaun rostear nachtelem mhunn, filmi sonvsarant vhoir sortolem Kingfisher model Poonam Pandey-n utor dilelem. Tea vorsak Bharot ttim jikhli, punn tea vellar kriket zoit ‘celebrate’ korunk, Poonam vingllem zavn rostear mat disunk nam. Ani atam, Kolkata Knight Riders porchea IPL finalint zoitivont zatoch, Poonam Pandey-n ek voros adim utor dilelem tem nibhailem. Apnnalem vigllem chitr ‘twitter’ hea websitir dilam. Khorench tem chitr, tagelea angar kopdde nasun kaddlam vo kompuitor teknnikecho vapor korun chitr nagddem dista toxem kelam? Ho zaitea zannank proxn poddla. Mhoji curiosidade (curiosity) vaddli. Chitrachi topasni korunk kompuitor photoshop-acho adar ghetlo. Angar aslole kopdde nanch korun chitr vigllem korcheli tora kosi korunk zata tem pollevn ghetlem. Ani mhozo dubhav khorench khoro tharlo. Poonam Pandey-chem ‘twitter’ hea somaz-mavle thollar dilelem vigllem chitr, asli nhoi, punn; kompuitor teknnikecho upeog korun dilam. Kitlem sot, kitli fott? Kuddichi chorbi bazarant ugtalar ghalun fukot nanv ani fank mellche khatir, film sonvsarantli choli kitem-i korunk toyar? Sitiment Kaddtta Mhozo Mitr Mhojea kama purtem hanv kompuitorachem yontr choloitam. Noveo kompuitoracheo teknniki zannam zavnk thodde khepek hanv kompuitor fixal (computer expert) asloleancho adar ghetam. YouTube, Facebook, Twitter, Orkut, Google, Liked ani her sabar social network service toyar zalelean choddso lok hea mavle thollancho upeog korunk lagla. Mhojea poisulea ixttank hanv FaceBook-ar melltam ani tanchea borim vanttekar zatana, tannim Facebook-ar choddoylolea chitrancher kivam sondhexancher nodor martam. Ani poir, oxech eka khas mhojea ixttachea nanvancher ek be-moriadik (vulgar) chitr aslolem pollelem. Tem pollevn hanv ojeaplom. Mr. XYZ watched sexy bla…bla…on Chill. Ho mhozo ixtt zaka hanv porxim vollkotam to toslim hollxigi chitram apllea nanvancher, Facebook-ar post korpi nhoi. Mhoji curiosidade vaddli. Tannem kitem ghatlem tem pollevnk dilolo link klik kelo. Zalear? Chill, hi ek mavle tholl, fokot vaddleleank pollevnchim chitram dita. Tim chitram pollevn, hanv chilled zalom. Hanvem taka veg-vegim fon kelo. Tor tannem kitem sangchem? Hanvem sanglam toxem. Hea innosent mhojea Mr XYZ ixttak khoboruch nam koxem ani konnem tachea nanvacher choddoylem poi tem. Ani aiz Son’varak (Jun 2ri, 2012) mhakai tea CHIL-an soddlolo nam. Mhojea nanvar tochloch Lino Dourado watched sexy bla…bla on Chill, kitem kai asa mhunn, mhojem borem chintpi Mr. J-an mhaka fon korun kolit kelem. Mhaka khup mandtta to. Tacho motto husko. Facebook-ar ailolo vo mhojea nanvacher choddoylolo moriadi bhailo ‘post’ nhoi-thoim pavun mhojea vixim borelo lok kitem chintolo? Sarkem dislem mhaka tachem. Chuk itlich. Facebook-ar dusro kitem korta tem pollevpak hanv ghelolom punn atam hanv kitem korta tem lok polleta. Hey Bhagwan… Kompuitor fixal-ak sompork (contact) kelo. Tannem mhaka sanglem. Facebook-ar aslole ixttacho post ugto kelolo tea vellar ‘fokot vaddleleank’ mavle thollan, mhojem nanv automatic zopt kelem ani tanchea websiticho prochar korunk tannim mhojea nanvan Facebook-ar post kelo. Mogacheano, oxe toren tumchea ixtt-mitram sovem kitem dislem zalear tankam soroll kollit korchem. Mhaka zagrut kortolea mhojea borea deknnar ixttak Dev borem korum mhonntam. Toxench tumkam. Moladik vell ibaddun tumi ho lekh vachlo ani tumkai gomlem mhunn khuxeal zatam. Upkaran social network service mavle thollar distelim chitram samballun ugdunk tumchea ixtt-mitr-ank xiddkavnni dili tor, konnakui faidexir zait. Lino B. Dourado Lapitt http://aitaracheokaskuleo.blogspot.com/

Ostorecho Rag Toklek Choddta Tedna

PRESENTS

AITARACHEO KATKUTLEO

Lapitt

Ostorecho Rag Toklek Choddta Tedna

Ghoddallir donparchea bara vorancho somoy zalo mhonntoch, amgele ixtt Lapitt kaju fenicheo glass ghevn bolkavant bostat. Kaju-feni ghonttana, borobor chonne-bhiknna nam tor kajubhiyeo khavpachi tageli sonvoym. Tevui disa matiechea pel’leant aslele chonneank chopko marun hatant mat dorlele. Sotasot xezarche ixtt Samsonachea ghorachem fuddle dar ugtem zalem ani Samson jiv aslear bhik magit mhunn Lapittachea ghora dixen, rostin dhanvdi dorli. Itlea rostin, khorench; fuddle Olympik bhangra medal mellpa sarkeli tachi dhanvnni kai distali. Okosmat borelo monis oxe toren kiteak dhanvunk laglo tem pollevnk, kodelir boslolo Lapitt ubo zalo. Osle doxer dhanvpachem kharan, Samsonank ulo marun vicharlem. Dhanvpachem soddun Lapittak zap divnk taka vell naslo. Dekun, tannem Lapittak apleak sangat divnk upkar maglo.

Samson ek somaz-sevok. Rokddoch konnachai adarak pavpi. Kalliz tachem vhodd. Hat tor eksarkele lamb. Durbolleank apnnale ganttichem poixe moddpi. Ganvche somudayecho fuddari. Gorjek sampoddleleank vegllochar korinastana fukot budd ani artik (financial) mozot divpi. Tea khatir upott Devachim besanvam tachea dhonddeacher astalim. To ek famad antrsamprechi purvonno korpi (caterer) aslo. Tachi ghorkarnn tachea vonn dupett mogall ani borea utra xivay tiche jiber dusrem utor yenaslem. Ti konnacher ragar zai nasli vo tika rag yenaslo. Hanstem mukamollan soglleam thaim vagtali. Tea khatir, tanger kamank aslelim kamcharam, tika khub mandtalim.

Veg-vegim kaju-feni pottant ghonttli ani Samsonank sangat divnk Lapitt-ui tache bharim dhanvunk laglo.

“Arre zala kitem tujem? Konnnank bhievn dhanvtta tum?” Konn oddchonenk sampoddla?”, dhanvpachem kharan zanna zavunk Lapittan ekar ek proxn ghatle.

“Lapittbab, fatlean polle.”, ani fattlean volun polloit tor Samsonachi ghorkarnn Delaila, nall solpacho koito hatant ghevn Samsonacha fattik lagleli.

“Tuji bail mure ti. Zalam kitem?”, thondd sobhavachi Samsonachi ghorkarnn, avchit he toren pixea porim kiteak tachea fattik laglea tem zannun ghevcheak Lapittan vicharlem.

“Lapittbab, zori hanvem tuka mhontlem, tum mhozo choddan chodd mogacho ixtt. Tum kitem somzotolo?”

“Tujea sogllea ixttam modlo hanv ek tuzo boro ixtt”

“Hench tem, hench tem…”

“Polle, tuji dhanvpachi gotti (speed) dhenvlea ani fattlean tuji bail tenklea. Sarkem sang kitem sangunk sodtam tem”

“Aiz kosli umed aili ti hanv nichit sangunk nokom. Punn hanvem mhojea bailek mogan mhontlelem. Tum mhoji choddan chod mogachi bail. Itleakuch mure ti challvolun poddli”
“Samson dhanv…dhanv. Tin metr pois tuji bail tujea fattlean asa. To koito tujea tokler poddchea adim tuji gotti choddoi papia. Mhaka naka ghov-bailechea kestanvan poddlolo.”, Samsonachi dhanvpachi gotti choddtokoch tachi ghorkarnn thambli ani vhoddlean arodd ghalun mhontlem

“Suttonk nam tum mhojea hatantlo chora. Choddan chodd mogachi bail hanv tuji. Anik kitleo asat tor tuka? Ghara yeo. Khatortam ani boroso ek prat korun makddanchea kazarak catering soboytam”

Lino B. Dourado

JIVIT Niz Goykaranchem mhoinallem atam Kuwaitant vikhrek melltta.

Vikhrecho zago:
(1) Souk-al Watiya Complex, Shop no 58, Adidas Building
(2) Usha Book Shop, Maliya main Bus Stop, UTC Main lane, Shop no. 20, Al Rabiya Building, Maliya.
Odik mahiti vo jahirat dinvche khatir fon kor:
Domnic Fernandes 66468570.

Lapitt

http://aitaracheokaskuleo.blogspot.com/

Bil Konn Farik Kortolo?

PRESENTS AITARACHEO KATKUTLEO Lapitt Bil Konn Farik Kortolo? Aiz Aitar ani sutti. Fantodder zag zali. Yera kamachea disamni, nideche lotuch yetat. Nidui mhunn boro denvchari khell khellta. Sutti mhunn susegad nidtolom mhonllear, surya udevnchea poilim meleli nid apunn zagron korta. Magir yevtin-tevtin portochea bodla uton ek nitt kofi ghonttun kompuitorar boslear konn tori mitr dhoddtele opekxa zata. Internet-ar osoch addpolop (browse) kortana mhoje ekdam vollkiche teg mitr, itlea sokallim facebook-ar kitem sonspotat kai? Ani hanvui zagrut zalam mhunn kollchea khatir tankam ek lhanso sondhex ghalo. Thoddea vella uprant (sokalchea nnov tem dha voram modim) Salmiya, Amman bhellpuri khannavolint nosto ghevnk vetolom vo distolom. Konnank khuxi (vach: bhuk) laglea tannim thoim mhaka muzrot mellchem. Tiatrachea vosrean keddnach fuddlea sitir bosona to. Tachea fattlean boslolea mottvea tiatr pollevpichi dandholluch zata mhunn, fattlea sitir bosunk taka umed. Itlo lamb ixtt to mhozo. Tannem mhojea sondexak zap dili. Hanv toyar asam ani justuch sanglolea vellar Amman khanavolint melltam. Punn ek. Bil mat mhojer ghetolom. Khub tempan ami ektthaim zatat. Tumcheo borpavolli mhojem mavle tholl (web-site) soboyta. Dekhun, tumchea borobor bosun nosto ghevpachem ek bhag mhaka favta tea pasot, bilacho korch mhojer soddat. Mhojea dusrea mitracho svadik tallo English kantorist Engelbert Humperdinck haka doddtolean taka Gõycho Engelbert mhonntat. Aikopeank, tachim mon bullgavpi kantaram portean-portean aikunk distat. Jem konnem tachea svadik talleak English kantoristachem nanv dilam tem sarkem dilam oxem mhaka zalear dista. Tannem mhojea sondhexak oxi zap dili. Amontron svikar kortam. Punn tujea Lambu ixttak bila vixim huske kaddi naka mhunn sang. Tumchea borovpan mhojea kantaracho vo CD-cho fukot prochar mavle thollar zata. Upkar attovpak hi ek sondhi ditat mhunn tumche abari. Pottbhor khavun parcelui magunk zata. Tisrea mitrachea kodd’deak ek purean kens nam punn bezo mat zoran cholta. Ani hea kodd’dean aplea sondhexan kitem sangchem? Konnench konnachem bil farik korpachi goroz nam. Amerikan style apnnavchi. Zonn eklean ap-aplo nosto korcho ani bil farik korchem. Kodd’dea ixttacho sondhex vachtoch mhaka eka pornnea vinodachi yad zali. Eka khannvolin bhitor sorche adim mahiti tokttear (signboard) vachunk mellta. “Zata titlem kha ani bil tujea natrank (grandchildrens) farik korum di” Khannavolint ek monis bhitor sorun, pott funtosor jevta ani jen’na veiteran taka bil ditoch, toktteak bott dakoun mhonnta. “Tuka disona, hem bil fokot natram farik kortelim mhunn?” “Senhor, hem bil tujem nhoi. Hem bil zaun asa tujea xapaichem” Hea vinodachi yad zatoch mhagelea mitrank sondhex pattoilo: Bil farik korpachem kestanv upraslem tor, mhaka soddun sort ghalun mittovchem.   Lino B. Dourado Lapitt http://aitaracheokaskuleo.blogspot.com/

Tum *****Pavnaka

Tum *****Pavnaka

Tum vochunk pavnaka. Tum khavunk pavnaka. Tum khellunk pavnaka ani her sabar chalik lavpache vixei nam-nam toren, veg-vegle prokar yetat ten’na, apo-ap koslich malis nastona, thoddeanchea jiber utram funtat. Khorem mhonllear, konnuch tim utram ghombirponnim laun ghena ani mhontoloy monis mudd’dom monantlean tim mhonnona.

Orxim pollevnk ghelear ani kholl chintlear thodde khepek pavnaka utor koxem ani kiteak lagon mhonntat tem niyallchem asta. Ek-ek pavtti tem utor nhoi thoim boslem zalear aikotoleak tiddok choddta ani ken’nai tonddak-tondd zavn uzoticher poddta. Dekik: Somoz ek monis nidlolo asta. Ani taka vegim utthchem nasta. Tea vellar konn eklo taka utthavpachi tozvit korta.

“Arre utth re. Matxe vochun rokhddech yevum-ia”

“Voch tum. Hanv yena. Mhaka utthpak naka?”

“Tum utthonk pavnaka”

Hangasor, tum utthonk pavnaka hacho orth, nidlolo monis portean bixanavelo utthonk pavnaka vo dusre bhaxen nidlolo zagear moron yevn sasnank nidcho. Oso somoz kaddlo zalear, nidlolea mon’xak kosle sontap marchenant?

Tuji hajri nastana dogam vo tegam modim tujem nanv ailem ani tech vellar tum thoim pavon sorlo tor, tuka pollevn tuje vollkiche mhontole: Tuka moron nam. Tum anik xembor vorsam jiyetolo. Him utram jiber yetat, jeddna tuji bori bazu uloitat teddnanch. Chukleo kaddun uloitat tea vellar pavon sorlo tor, tanchea tonddancho rong dakoita tujea vixim kitlem joi gaitalet poi te.

Konnuch mhonnchona ani hanvem zalear ken’nanch aikun nam konnem tori mhontlolem, tum morunk pavnaka. Zait ghoddie oxem mhonnpan koslem tori kharan mellona vo mhontlem zalear monis moronastona urot mhunn, oxem sozmun mhonnonant kai? Hivui-i sarki khobor mhaka nam.

Ek adli punn khori gozal:

Tornni piray mogan poddpachi. Mogacheo bandgoddieo nakat mhunn hanv pois ratalom. Torui punn mogachea livrar (pustokar) nanv boroun distalem. Mhojea boroborche ixtt mogachea pageran poddlole. Mhaka bhitor sorunk forse kortale. Oi naka, oi naka korun lojek lagon konn ekleachi ixttagott zhoddli. Fokot ixttagott. Punn te choliek fuddaracho sangatti zai aslo. Ten’na tinnem ek dis gombirtayen mhaka vicharlem.

“Tuka mhozo mog asa?”

“Mhaka tuji fokt ixttagott zai”, hanvem sanglem

“Dusre ani nimnne pavtti vichartam. Tuka mhozo mog asa?”

“Mhaka mog korchi khuxi nam”

“Tum mog korunk pavnaka”, tikxelea avazan tinnem mhonnlem ani cholot ravli. Sot mand vo mandinaka. Cheddvancho mog mhonntat to, hanv ken’nanch korunk pavonk nam. Mhajem logn soiriken zalem.

Lino B. Dourado

Lapitt

http://aitaracheokaskuleo.blogspot.com/

Moskoreo Zhoddar Poddtat Tednam

PRESENTS AITARACHEO KATKUTLEO Lapitt Moskoreo Zhoddar Poddtat Tednam Kaim monis dusreancheo moskoreo vo fokandam korunk bhouch huxar astat. Dusreancheo moskoreo korunk tankam sond mellot tor moskoreo korpak koxech fattim soronant. Gorjebhair osokt mon’xancher fokandam korun tankam sobemazar lojen ghalop hi tanchi ek paddi sonvoim zavn asa. Punn dusreani, tancheo moskoreo kelear tea vellar mat, tanchea dopram thavn tankam tidhok choddta. Unch totvancho monis (a man of high principles) dusreank lojez ghalpachim fokandam ken’nanch korinam. Bullbullit nisrun zomnir apttololeak to hat divn vhoir kaddta ani adar korta. Punn thodde zann, ghosrott zomnir poddtoleank pollevn, bhouch mottean hanstat. Tankam fokot dusreancheo chuki distat. Bori doyea tanchea totvamni xenleli asta. Tuka naka dusreani tujeo moskoreo keloleo zalear, tunvem dusreanchim fokaddam korchi nhi astat. Amchea bhurgeaponnar ugtea moidanar ami jinsavar khell khelltale. Hea khellant xezarchea ghorantlea cheddvanchoi aspav astalo. Cheddvam paryani-lobiani, langdi kivam apa-lipanim khelltalim zalear ami chedde goinda-bal, logorio, futboll ani godd’ddeani khelltale. Amcha modim thodde moste bhurge asle. Tanche khell vegllech toreche astale. Tankam moskoreo odik korun cheddvancheo bhouch umedin korpak, movza distali. Tannim jive xirle haddun cheddvachea vistidar soddun tancheo bobo uyeli ghalcheo nam tor, toll (grasshoppers) cheddvanchea polkean (blouse) bhitor soddun ani babddim nachunk noko aslelelim cheddvam tollachea bhirantin yevtin-tevtin udki ghetana dekhnni dans nachtat kai distalim. Heo tancheo mansugebhaileo moskoreo mhaka avodd nasleo. Tea khatir khub pavtti toxem vo tosleo azneri korinaka zavnk borea utramni, mostea bhurgeank xiddkaytalom. Tanchea vangnnucher sodanch hanv virodh dakoitalom mhunn, tannim mhaka ‘pativ’ (hi khobor mhaka poili nasli) nanv dovorlolem. Hanv khella moidanar lagim pavta-pavtam mhojeach idadir pavlele te moste bhurge, adim rostear ganvcho vigar dislear ami besanv ghetale te toren, mhojem besanv ghevnk boslele ube zatale, ani herankui mhoje besanv ghevnk fors kortale. To dis Aitar aslo. Chodd-so lok tandull korchea khatir Aitarachem bhatt ukodtalo. Tea disa, tin familichem ukoddlolem bhatt, panch atorancher suktalem. Amkam khellunk zago unno poddtalo. Her lok bakinacher bosun bhatt raktalo zalear, xezarchea Sakru timaichi novi kazari sun kodelir bosun bhatt polletali. Amchea modim khelltolea eka cheddvak thoddea vella khatir kodelir bosun upkar maglo ani laginch aslolea tichea ghoran bhitor gheli. Ti koddsorun gheleli astona kaim bhurgim tea kodelik sorvbhonvtolo ghatlo ani ek-ek zaun utop-bosop korun onek torecho khell khellunk laglim. Konn kodelir bosunk ghelear fattlean kodel oddun bostoleak dornir poddta sarke kortale. Sumar panch minutani Sakru timainchi sun ghorantli bhair sorun aplea zagear aili ani kodelir boschea vellaruch konn eka mostean kodel fattlean oddun kaddli ani ti ekdom nibran kulle dhadlun zomnir poddli. Lagim aslolea cheddvamni ubi zavnk tika adar kortana, konn eka bhurgean akantachea avazan mhontlem. “Agge mhoje maim!!! Tichea payancher rogot poddta mugo yea.” Veg-vegim Sakru timaim aili ani kitem zalem tem vichartoch tichea sunen, sot lipoun mhontlem. “Kodelir bosunk hanv chuklim ani dotorer aptolim” Sogott bhurgim tothakun eka-mekachea tonddank pollevnk urlim. Thoddeanchea dolleanim dukham ubzolim. Sasumaink fott sangun xezarchea bhurgeanchi kallzam tinnem jikhun ghetlim. Tea vellar vo te disa amkam kollunk nam bhitorlean rogot koxem vhanvunk laglem tem. Uprant vhoddilam uloitalim tem ami aikolelem. Sakru timaichi sun gorbest asli ani tika tisro mhoynno choltalo. Poddlele dukhecher tika gorbpat (miscarriage) zalo mhunn ten’nache Kansavleche voiz Barbosan sangun dilelem. Ti ghoddnnuk zalelea disa savn bhurgim moidanar khellunk disona zalim. Apleak lagun bhurgim bhirantin vo lojen moidanar yenant mhunn tika kollun yetoch, porxim bhugeanchea ghora vochun tankam portean adle toren ekdam moidannar khellpachi umed dili. Ani mhaka ‘pativ’ mhunn nanv dilole te moste bhurge, zaitech sudorle. Hanv khellam moidonar bhitor sortana adle toren mhojem besanv ghevunk lagim yenasle. Ani sompoitana: Sakru timaim boreak bori asli. Zori tea disa teach vogtar tika ghomlelem konn eklean kodel oddun sunek zomnir udoiloli mhunn, ti sunek tras zatat te visrun kodel oddtoleak poili sodta asli. Ani donui vattamni kitlem vaitt zait aslem tem sangunk kothin aslem. Punn tika zaitea tempan khori ghoxtt kollun aili ten’na, ragachea vellar marekar vaitt zatelem aslem tem, suneche fottin nirvarlem mhunn, ticho guneanv korinastana tiche doyal kornni ani bore gunn vakandle. Lino B. Dourado Lapitt http://aitaracheokaskuleo.blogspot.com/

Nusteakarnnink Ubarli Tedna

PRESENTS

AITARACHEO KATKUTLEO

Lapitt

Nusteakarnnink Ubarli Tedna

Adlea tempar choddan chodd ghor-dhar polletolea ghorkarnnincho (housewives) kimticho vell, ganv-ganvamni nustem ghevn bhonvtoleo nusteakarnnink lagun samballun urtalo. Choddxeo ghorkarnni ganvant bhonvtolea nusteakarnnicher nimbun (depend) astalim. Ghor-ghoramni bhonvtolea nustekarnnink lagon, tankam, ganvantlea tintear vo xarantlea bazarant dispottim vochunk poddo naslem.

Amcho Utodd’decho ganv dorya vatarant poddtolean adim amkam tajem-tajem nustem doryantlem kaddun koddiyechea kunean vo tovlen kivam kailir poddtalem. Ganvantlea kharveanchea rampnni xivay adim ami, atanche toren jelantlem vo borfantlem nustem khavunk naslem. Rampnnint poddlolem nustem beg-begim molavnni korun ani pantlo mathear marun zata titlea vegim ganvchea ani ganvantlea tintear giraykank nustem pavta toxem korunk adleo nusteakarnni ekdom taktiken astalim.

Mhageli avoy dogam nusteakarnni xivay dusrea lagchean ken’nanch nustem ghenasli. Ek nusteakarnn Mazodd’dechi aslear dusri fokot Mungllarak Kuttale sakun Mandvi nodichem nustem-bovchim ani sungttam ghevn yetali. Ken’nai ‘lak’ asleleo koddpantleo kulleo haddtali. Pavsachea disamni doryant rampnni ghalinasle tea somoyar Kuttalechi nustekarnn sumantle don dis (Mungllar ani Sunkrar ) amchea ganvan pavtali. Mhagele avoychem mottem giraik sodanch tika aslem dekhun, amkam nustem dilea xivay ti fuddem vocho nasli.

Dis Mungllar. Kosli tori iskolak sutti asli. Xirxirean pavs zhoddtta mhunn hanv ghora bhitoruch aslom. Bhailean, barik talleachea ostorecho avaz aikunk ailo. Ani to tallo mhojea avoyk sodtalo. Mhoji avoy fattlem dar ugddun bhair gheli ani mhontlem:

“Kitem baye tum ailam?”

“Oi ghe auntie. Maink khub hodd’dean thonddi bhorlea ani zor ailolea bhaxen dista. Sodanchem giraik piddear korinam zanvk tinnem mhaka dhaddlam. Tumgher ghelea xivay ravum naka mhontlolem.”, itlo modur tallo konnacho kai mhunn pollevnk hanv bhair sorlom. Sundor disteli nusteakarnnichi tornatti dhuv ti asli.

Mathavelo pantlo dotorek dovorpak mhoje avoyn tika adar kelolo zait ghoddie. Pantlear dovorlo nusteacho vantto ghevn, mhoji avoy nusteache poixe farik korchea khatir bhitor gheli. Nustekarnninche dhuven, tiche dolle mhojea dolleank lavn mhonttlem.

“Matxe mhaka ubar baba”

Khoincho tornatto cheddo, eke sudor cholichi itsa puri korcho naslo? Ani hanvem tika (nhoi ticho nusteacho pantlo) ubarchea vogtar mhoji avoy thoim pavon sorli ani ticho dhengso khavnchea khavun ‘tokulo’ khailolo to aiz meren, ganvant nustem ghevun bhovntelea nusteakarnnink polletoch, ajun purponnan (simply) dukhtta.

Lino B. Dourado

JIVIT Niz Goykaranchem mhoinallem atam Kuwaitant vikhrek melltta.
Vikhrecho zago:
(1) Souk-al Watiya Complex, Shop no 58, Adidas Building
(2) Usha Book Shop, Maliya main Bus Stop, UTC Main lane, Shop no. 20, Al Rabiya Building, Maliya.

Lapitt

http://aitaracheokaskuleo.blogspot.com/

zobordast lekh "Sonvarachim Sungttam" Monant xizlea bogor panar vaddop nam!

PRESENTS

AITARACHEO KATKUTLEO

Lapitt

Mogachano.

Kalcho zobordast lekh "Sonvarachim Sungttam" Monant xizlea bogor panar vaddop nam! ekdom mon divn hanvem vachlo. Tumi vachunk nam? Chuklo zalear hea linkar vachat. http://sonvarchimsungttam.blogspot.com. To lekh vachun hanvemnui aichea Aitarak mhoje hat pangurleat….Sodanch amchem mot vo vixei tumche somor dovortat ani tumi tem vachun monank lagpa sarkem aslear ugddasache ganttik marun dovortat.

He khepek hanvem fokot chitr dilam ani chitracher vixei dila, Milant Poddlear Penddo Marunk Zata. (Godd'ddeancho khell) Bore toren obheas korun vachpeamni lojum nastona Konknnileant don utram boroun amkam dhadhun divnchem. Hanv dor Aitarak Katkutleo vachpeank kortam. Hea pavtti tumi mhaka korcheo osi mhoji opekxa………..Cholat tor borounk suru korat

CHOTRAY: Hea sombomdim tumchim motam hangasor uzvaddak haddpak ho vixei fuddle Aitarak chalu astolo. Dekun likhnni hatan dovrun borovnk suru kor.

Lapitt

http://aitaracheokaskuleo.blogspot.com/

Sunim Poryan Mogan Poddtat.

PRESENTS AITARACHEO KATKUTLEO Lapitt Sunim Poryan Mogan Poddtat. Sunim sodanch apnnale dhonyank visvaxi ani mogachim astat. Thoddim sunim ghorchea lokachim mitr zatat zalear, xezarchea lokan suneank bori avdhan (attention) dilear to lok disti poddlele pavtti sunim xempddi haloun zapoitat kai distat. Suneachim bhavnnam (feelings) amchean molavunk ani tharavunk zainant. Zeddna ghorchem zonvar sunem, ghorvam kivam mazor eka mekak melltat teddna tanchea modim sombond ghoddun yetat. Zaite pavtti ami pollelam, sunim bhettlim mhonntoch boncheak boncho tekoun tim kitem tori eka-mekak sangtat vo ekamekachi vollok ditelea porim distat. Dekun, suneanchim bhavnnaxil odd (emotional attraction) pollevn tanchea ixttagottik ami puppy love mhonntat. Ani heach khatir sunim poryan mogan poddtat mhonnpan, hanv chukttam oxem mhaka zalear disona. Amchea xezarchea vaddean ravteli Sacrament timaim igorjek, posrear kivam bosik vetoli zalear, amchea ghor-bhattantlea paim-vatten tika vochunk poddtalem. Amchem ghor upptana mhoje avoyk zapoilea xivay arpar zainasli. Tea vellar ticho tallo aikun amcho kutro M-dem, boslolea koddcho ubo ravun ekuch dhanvnni bhair ghaltalo ani porot bhitor yevn mhoje avoyk vo mhaka hum-hum-hum korit kitem tori sanglolea porim lagmaro zavn porot bhair vetalo. Tea vogttar mhaka distalem M-dem-ank, Sacrament timaychi ekdom vollok asa mhunn. Sacrament timai-ank ek dhuv asli. Khoinchay cheddeak dipkavpa sarki, tiche kuddir akaran rosroxit sobitay pankleli. Tichea suropaek bulpak konnai ektea xezarchea cheddeak, tichea lagsor ubo ravun ulovpak kivam ghorachea durga lagim sorpak, kaposidad zai nasli. Ani hachem kharan mhonnlear tangeli kutri (female dog) Izmoll, Sacrament timaimche ektech dhuvechi koddok rakon kortali. Cheddo vo dhaddlo dislear, te pois astanach kutri bhukunk suru kortali. Ken’nai durgache getixim vochun dant korkoraytali. Punn hanv dislo zalear mhaka ti kutri ken’nanch bhonknasli, nam mhunn, dant korkorainasli. Vellean, haddki-tiddki xempddi korit ani tokli vhoir kaddit ghorant bhitor sorunk yevkar dita kai diso. Ani thodde khepek ghorjechea kama khatir hanv pavun sorlom zalear, Sacrament timaichi dhuv ani hanv hatak dorun gozali martat tor, kutri Izmoll amkam mekllim soddun bhair vochun bostali. Ek dis, amchea bolkavant bosun teddnanchem Uzvadd disalem vachtalom. Sanjeachea panch voranche bosir Moddganv thavn Sacrament timai pavun sorleli. Mhaka zapoilea uprant mhoje avoyk motten ulo marun khobor ghetli. Tea vogttar tichea avazar, amcho kutro M-dem tika mellunk bhair yetolo kai dislem. Punn tacho pott’toch naslo. Uzvadd potr vachpan hanv gul’l zalolo astana, ken’na Sacramentachi dhuv yevun mhojea fuddean ubi zali hi bilkull mhaka zannui na zali. Jeddna tinnem mottean mhaka zap keli teddnam mat bhitor aslolo amcho M-dem jet-speed-ir bhair yevn timaiche dhuveche vistidak aplem ang ghostilem ani tichea sangatak aileli kutri Izmoll-a sondder apli sondd tenkoili (beij dilelea porim) ani paim vhoir kaddun don-tin pavtti udna ghetlim ani tim dogaim pand upptton dusre vatten igorjixim pav meren, thoinch ubo ravun tankam polloit ravlo. M-Dem-achi vagnnunk mhaka vichitr disli. Sacarment timai Moddganv savn aileli ten’na tinnem avaz kelolo tea vellar, M-Dem ghorantlo bhair sorunk nam. Atam tichi dhuv igorjek dhormik zomatek vetali tea vogttar, tichea sangata kutri Izmoll asli. Amgelo chor Izmoll-achea mogan bha poddunk nam mhu? Mhoji kurusidad vaddli ani hanv bariksannin pollevnnik (observation), vella pormonnem bolkavant bosunk laglom. Sacrament timai igorjek, posrear kivam bosik vetali ten’na tigeli kutri tichea sangata astali. Avoyk zapoitali tea vogttar amcho premi M-Dem khinna bhitor bhair yetalo. Timainxim lagmodi kelea uprant kutri Izmoll-ak kismitaylo. Hem natok sodanchem zaun ghel’lem. Mhonnchem, amcho kutro timaiche kutriche mogan aslo. Agostachi 15 tarik. Bharot des svotontr zalolo itihasik dis. Tech porim Saibinn Maimche kuddi-otmeasoit sorgar choddlole porbe dis. Hea disa, amchea ganvant xetta pikecher axirvadd ghalun poilem konos katortat. Ganvche vhoddil dol-tas vazoun vadd-vaddeant bhovun povitr udkan benjar kelelem poilem konos vanttat. Tea vorsakui donparchea 12.10 vaztam, amche ghoraxim dol-tas vazoit pavle. Bharotachi svotrontrai punn amchea M-Dem-ank mat tea disa suttka mellonasli. Ghoraxim yevn dol-tas vazoitoleank attakar korta mhunn, mhoji avoy taka bandunk ghaltali. Konos ghevn oltorir dovortana M-Dem khoim asa ti vaspus hanvem, avoy lagim keli. Dol-taschea avazar bandlole kodden mottean bhonkpi kutro, kiteak ogi zalo tem hanv chintunk poddlom. Avoyn mhaka sanglem, tinnem sokall savn taka pollenvk nam. Tika dislem to mhojea sorxim asa vo hanvem taka bandunk ghatla. Hanv tenxonnar poddlom. M-Dem dusrea suneam porim hanga thoim heddpi nhoi aslo. Mhozo husko vaddlo. Avoychea dolleant dukham bhorlim. Taka sodunk bhair sorlom. Sacrament timaychea kutri Izmoll-achi yad zali. Tanchea ghora dixen cholunk laglom. Timaychea ghoraxim pavunk ek lhanso sankov pandi velean veta. Sankvar ubo ravun uzvea bazun pollelem. Timaigele kutrichi sondd (boncho) disli, punn; tichea fattlean dusrem sunem konnalem tem zanna zaunk lagim sorlear, amcho hero M-Dem svotontrayen sansanith mogacho lab ghetalo. Lino B. Dourado JIVIT Niz Goykaranchem mhoinallem atam Kuwaitant vikhrek melltta.Vikhrecho zago: (1) Souk-al Watiya Complex, Shop no 58, Adidas Building (2) Usha Book Shop, Maliya main Bus Stop, UTC Main lane, Shop no. 20, Al Rabiya Building, Maliya. Lapitt http://aitaracheokaskuleo.blogspot.com/

Aitaracheo Katkutleo: Ek kovita: Tollmolltam

PRESENTS AITARACHEO KATKUTLEO Lapitt Aitaracheo Katkutleo: Ek kovita: Tollmolltam  JIVIT Niz Goykaranchem mhoinallem atam Kuwaitant vikhrek melltta.Vikhrecho zago: (1) Souk-al Watiya Complex, Shop no 58, Adidas Building (2) Usha Book Shop, Maliya main Bus Stop, UTC Main lane, Shop no. 20, Al Rabiya Building, Maliya. Odik mahiti vo jahirat dinvche khatir fon kor: Domnic Fernandes 66468570. Goa-World.Com TEAM , Amche LAPITT ixtta sangata, Somestank Vhodd Khuxallbhorit Ixttagoticho Dis Anvddeta Lapitt http://aitaracheokaskuleo.blogspot.com/

Jive Astana Turturi Gavchi

PRESENTS

AITARACHEO KATKUTLEO

Lapitt

Jive Astana Turturi Gavchi

Gorje purte hi-bye ixttagottiche sombond aslole ixttinnik, kalchea Sunkrarak mhaka dislem tika sompork (contact) korcho. Ghelea mhoynneant, aili-poili gozalim vixim husko dakoun tinnench zavn mhaka don pavtti fon kel’lo. Tigelo lhor (mood) pormonnem suttecho Sunkrar suru zata. Chintlem, tichi ani tigelea ghorcheanchi khobor ghetlom. Fonank hat mat ghatlolo. Mhojea monancho patth (mind-reading) tinnem vachun kaddlolea porim, tigelo fon aslo.

“Uzvaddlo dis tuka boro magun”, hanvem mhonnlem

“Tukai-i melloleak boro dis. Zorgea, azun nidlolo asa re?, sodam porim tigeli monsthiti (mood) tullmullit asa mhunn tichi zap ani vichara velean kollun ailem

“Konnacho-i fon ailo zalear, utthpachem kel'lem Allxayecho podd'do kuxin kaddun hanvem mhonnlem

"Nam tor?", tinnem vicharlem

"Sogllo dis nidhun kaddta aslom. Nidhechi odik as dakoun hanvem sanglem

Tujea pottachi bhuk thoddi nidonk tuka di-it? Zannam hanv. Chodd nhoi punn vellar thoddembhov khavun tugele pottantlea bhuke undrank tum somadan kortay. Ani tem korchea adim, hanvem kiteak lagon fon kel'lo tem sangtam

Vell kiteak? Sang begim

Tuji ek kovita Melea Uprant (ugddas korit) hummmm???

Dhol-Tas Vazoi Nakat. Khoinchea tori Goyche eke mavle thollar vo mhoynnalear uzvaddak ailea. Oxem mu?

Modinch zap ghalinaka chora. Poilim sarkem aik. Mhojea ugddasa pormonnem tuje te koviten, melea uprant vakann’nni gaichi nhi mhunn tum boroyta. Punn atam oslo ek triput aila…….”

Triput? Triput mhonnchem? Tin put?

Vhoddlo Konknni borovpi mure tum? Konknnilean triput utor noko? Teg zann stegir yevn gaitat tankam….”

Aggo baye, hanv Konknni bhasecho pandit nhoi. Tori astana sangtam. Tankam triput mhonnonant. Trikutt vo trio. Sorry!!! Modich tondd ghatlem hanvem?”

Mhojem mhakach dita mure?”

Toxem nhoi yea”

Mhaka karektt kelem mhunn thankx. Kitem sangunk sodtalim? Ham!!! Ugddas ailo. Poir tedus bazarant novich ailele VCD-ir, amgelea igorjichea fadar Domnic-achea borea vavrachi ani gunnanchi vakhann’nni korun famad thollave trikuttan ek trio gaila. Ganvchea somudayea koddlean, trio gaitoleank charui konxeamni xebaski favlea. Atam tuji kovita melea uprant dhol-tas vazoi nakat, vorun dobeant mar”

Kantaracho koslo vixei, kosli vakhann’nni ani konn gaitat hem sarkem sangonastana, panch vorsam adim uzvaddak ailele mhoje kovitek, halinch VCD-ir gailolea trio modim sombondh kosle zhoddleat te mhaka sarke kolloinastana, mhoji likhnni dobean mar mhunn sangpak, tuji karandai kiteak?”

Eksarke kitlech guspagonddolache proxn mure tugele. Ok, ok--- Aik!!! Tum sangta tea pormonnem choddan chodd lok, monis melea uprant dhol-tas vazoitat. Punn fadar Domnic-acho, Devachea mollan ani Tachea xelleancho kel’lo ani korta to vavr fadarachea dollea somor vakhannlo tem zaitea zanank posond zalam”

Toklle fattlean hat ghalun tujea nakak kiteak dorunk zai aslem? Hi lambeli karandai mottvea utramni sompunk zatali. Sangchem aslem, jive astana turturi gavchi ani nhoi melea uprant” Fadar Domnic-an, Kristi somudayek dil’lem yogdan ani vavrachi tust kortat titlich, thoddi zait. To ek mahan ani Dev bhoktti padri. To jivo astana VCD-ir trio gaitoleamni taka sangatak ghevn, tachem zoi-zoi gailem mhunn, mhaka zalear ekdom borem dislem”

 Tum sangta tea pormonnem VCD-ir gavpi trikuttan, ghoddie, mhojea koviteleant kitem tori vachun ani niyallun, kantar ghoddun gailem astelem”

Ho,ho,ho….makodd aplem thamddench mhonnta. Puro puro dor tugelem”

Toxem nhoi yea!!! Konnachem borem uloitolo tor, to monis jivo astona ulovchem hem mhojea dhoronant bosta. Mellea uprant turturi gailear orth nasleli zata. Tuka hem kantar bore avoddle mhunn tuji karandai nichit kollit korta. Mhonntoch, hanvem ani dusreamni ti VCD mudd’dom pollevnchich poddli. Punn, ek sangunk visorlem tum”

Ugddas kor mure. Sangttam”

Trio gavpeanchim nanvam ani VCD albumanchem nanv sanglem nam tunvem”

Tanchim nanvam re??? Ham---hm---hum eklo Kaitan dusro Anton tisro ugddas nam. Fadar Domnic-achi VCD mhonnlear ditat te.” Igorjeche kocherin (offisan) fukot VCD vanttlelea porim mhoji ixttin uloili.

Panch dis poilim poloilele VCD-ir kantar gailolea kantoristanchim nanvam yad uronam zalear, panch vorsam adim vachlele kovitechi yad kosi urteli? Kovita, email kortam. Vach ani nigtench hanvem kitem sanglam ani te koviten kitem boroilam tem sor korun polle. Borem tor. Tuka email dhaddunk, fon dovortam ham!!!^^^^^^^^^^^^

Melea Uprant Dhol-Tas Vazoi NakatKitem sangchelem asa
Tem atanch sang,
Mhoje kan bhere zatle
teddna aikunk yevnchem nam
Kitem dakovnchem asa
Tem atanch mhaka pollevn di,
Dolle dhample mhonntoch
Mhaka dixtti poddche nam

Kitem divnchelem asa
Tem atanch di,
Hat bandle zalear
Mhojean ghevnk zavnchem nam
Mhoji bodai gaita tor
Atanch tujem git toyar kor
Hanv melea uprant
Dhol-tas vazoun faido nam.
 

Lino B. Dourado

Aug 26, 2012

DALGADO KONKNNI AKADEMICHO

Rupea Utsovacho Ugtavnnecho Dobazo

28.08.2012

Ravindra Bhovon, Moddganv Goy

Sanjechea 4:30 vaztam

Ghorcheam, soiriam ani ixttam vangdda

hajir zaunk vinoti

Mukhel Soiro

Bhou Manest Manohar Parrikar

Goycho Mukhel Montri

Manacho Soiro

Manadik (Pa.) Pratap Naik

DKA-cho Sthap'pi Vangddi

Ani Konknni Sod-vavr Korpi

Kherit Amontrit

Manest Caitano R. D'Silva (urf Caitu)

Ban'navle Motdarsongacho Amdar

Lapitt

http://aitaracheokaskuleo.blogspot.com/