PRESENTS
AITARACHEO
KATKUTLEO
Lapitt
|
|
|
Mon
Pollevn Dev Dhan Dita
Jugar vo
gambling ek marrekar veson (vice) mhonntat. Jugaravelean somajik
jivitacher bhomyenkor vaitt porinam zata tea khatir koslai-i jugar khellacher
somaz virodh dakoita. Zori jugar hem utor Povitr Pustokan mellona, tori; tea
utracho ullek korunk nam mhunn poiz lavon khellop, ek patok vo nam tem sarkea
orthan amchean sangunk zaina. Zaite pavtti ami sort (lottery) kaddtat.
Ani sortincher amkam duddvanche inam’ melltat. Hovui-i ek onek
torecho poiz lavon khellop zata. Tori astana sorti kaddop ho ek jugar khell koso
ami tharainant. Adlea kallar jugar khellpi jugarak duddu piddear zalo zalear,
kumsarak vetalo khoim. Thodde dis to jugar khello
nastona ravo. Punn ek pavtt vavrache poixe hantant poddtoch, portean sodam porim
jugaracha patkant poddtalo.
Amchea
Mazodd’de ganvancho sorgest Padre Basilio Andrade ek kodok xisticho Padri
Vigar zaun ghelo. Tea kallar tachea oslo koddok padri ak’khea Gõyant naslo
mhonntat. Cheddvam-ostoreamni mottve vistid ani ugte golle blousam nhessun
Igorjent yevnk zai naslem. Dev mondirant nhespachi moryada samballunk to poilo
padri zaun aslo. Tache lagim kumsar zaunk vetolea mha-patki mon’xan, patkanchi
dukh dorchea adim, toklecher ‘kutti’ poddta tachi dukh poili sosunk zai
asli.
Majorda-Utorda-Calata ganvchea, dor ek ghorabeak ani
ghorantle mon’xak to bhes boro volkotalo. To paim-vatt cholun ganvbhor
bhonvtalo. Poiz marun khelltolea khellancher to sapuch virodh aslolo.To ganvant
yeta mhunn gomlear godd’ddeani poiz marun khellpi tornatte, khell bond
kortale. Tablanim khellpi tablam soddun, poll kaddtale. Ten’nache tavern vo
sorea dukannache bollkavant kardancho khell khellpi taka biyun hea ani tea
adosak vochun liptale. Punn ekleach mon’xak Mari-Pidad (nanv bodol’lam)
padri vigarachi bhirant diso nasli.
Mari-Pidad
vevsayen dukrank marun mas vikpi ani chevrisam kortalo. Tache lagim sotache
redde-padde asle ani lokacha xetamni zotam ghalchem-i kam’ to
kortalo. Mazodd’de igorjechim xetam ani bhattancho kuidad to kortalo. Kamank
bhouch huxar mhunn Padrebab taka boro kortalo. Taka ek ogunn aslo. To Mumbaicho
sot’to (adim sot’to mhonntale, atam Mumbai Main Matka) chukoinastana
khelltalo. Ani matkache number khellunk sanjecha
vellar to Moddganv dispottim saikolin vetalo. Choddso matka jugaracher, to poixe
hartalo.
Adventacho
kall. Natalanchi porob darant tenkloli. Jezu
ballkacha yenneanchi toyari korunk Mari-Pidad kumsarak ghelolo.
Soglea patkanchi dukh dorun nimnne kumsar sov mhoinnem adim kelolem mhunn Padri
Vigarak sangona fuddem to vag koso chalvulun mottean ‘kutti’ Mari-Pidadicher
tokler marli ani mhontlem:
“Sov
mhoinnem kumsar zainastona asa? Melolo zalear uboch infernan vetolo aslo papia
tum. Patkanchem pirachit kor. Patkam bhogsunk, mhoinnache 6 Sunkrar kor (holy hour/first Friday) ani
Saibinniche dukhiche mister mhunnon, segid 5 ruzai
korâ€
Padre
Vigaran dilolem koddok prachit tachea mathear vozem dovorlolea porim zalem.
Zugar khellpi ek pidda somazak ani noxtt ghorabeak oxi xiddkavnni ditana,
fuddarak zugar nam khellpak Padrebaban taka sol’lo (advise) dilolo. Vigaran
kutt’ti marli mhunn Mari-Pidadik vhodd sintment zal’lo ani hea sintimentan
sorea pompar vochun ek kotor potant jiroilem ani nitt Moddganv vochun matka
mandar pirachitache ankdde 6 Sunkrar ani 5 ruzai Matka Jodi korun, adlea
disa dukrache mas/chevrisacher ani zott kosun mell’lole purai duddu 65
ankddear udoile.
Ani dusrea
disa Mari-Pidadicha ghora samkar fogotteancho ghonnghonn zalo. Kitem tori
boreponn tachea gharant bhitor sorlam mhunn fogotteancho avaz kollit kortalo.
Hoi! Ankddo 65 noxibacho zaun to hozaramni duddu jikhlolo. Padre Vigarachem
pirachit tannem noxibache ankde korun 'sort' khel’lo ani tache lagim zaite
duddu zale mhunn tannem Vigarache abar mandle ani fuddarak ken’nach sott’to
vo matka khelchona mhunn taka bhas dili. Ten’nancho lok zugar khell’lear
infernant vetat mhunn, hi chukichi somzonen aslo. Taka sorgar vochunk zai aslem.
Ani urlole jivitan to portean ken’nanch sott’to khellunk
naslo.
Lino B.
Dourado
Lapitt
